Notisia di polis di djaluna 15 di aprel te ku djárason 17 di aprel 2024
Kralendijk - Entradanan hudisial ku detenshon - Riba djamars 16 di aprel, alrededor di 5 or di atardi, a tene entrada hudisial na dos kas situá na Kaya Johanna den Antriol. E entradanan hudisial tabata den kuadro di violashon di Lei di Opio BES. Durante e entrada hudisial un sospechoso a trata na hui for di e sitio, pero a gar’e’. A detené un hòmber di inisial M.G.A. di 48 aña di edat pa violashon di Lei di Opio BES. Durante e entradanan hudisial a konfiská supstansianan probablemente narkótiko i sèn kèsh. Investigashon den e kaso ta kontinuá.
Kachó peligroso
Riba djamars 16 di aprel, alrededor di 6.20 or di atardi, ‘meldkamer’ sentral a risibí notifikashon tokante un kachó ku a morde i mata un porko riba Kaminda Jato Bako. Na yegada di e patruya, e persona ku a mèldu a deklará ku no ta promé biaha ku e kachónan di su bisiña ta ataká i mata su porkonan. A papia ku e doñonan di e kachónan tokante di esaki. Nan tabata konsiente ku nan kurá no ta bon será. Ambos partido a traha palabrashon ku otro i entre otro a skohe pa dòkter di bestia pasa un di e kachónan angua.
KPCN ke hala atenshon di doñonan di kachó pa tene kachónan den kurá dor di sòru pa un kurá bon será for di kua e kachónan no por sali i/òf pa mara e kachó pa prevení tipo di situashonnan asin’aki. Abo komo doño ta responsabel pa e komportashon i treinen di bo kachó.
Detenshon pa destrukshon
Riba djaluna 15 di aprel, alrededor di 9.50 or di anochi, a detené un hòmber di inisial R.G.C. di 24 aña di edat na un kas den Bario Mamparia Kutu pa destrukshon. E sospechoso a destruí diferente biennan den e kas i a detené pa esaki. Investigashon den e kaso ta andando.
Aksidente ku herido
Riba djaluna 15 di aprel, alrededor di 9 or di anochi, ‘meldkamer’ sentral a risibí notifikashon tokante un aksidente na altura di Kibra’i Montaña riba Kaminda di Rincon. Pa motibunan ainda deskonosí, shofùr di un outo a kore dal den un kurá despues di kua el a dal den un skuter ku tabata stashoná ku pa e motibu aki a kai riba un outo ku tambe tabata stashoná. E shofùr a resultá heridá i tabata mustra vários karakterístika di un persona ku ta bou di influensia di alkohòl durante e kòntròl. A hasi un tèst di supla ku e sospechoso i a resultá ku el a konsumí mas alkohòl ku ta permití. Ambulans a transportá e shofùr pa hòspital pa tratamentu médiko.
Mèldu
Bo ta testigu di un situashon sospechoso? Bo ta mira komportamentu sospechoso òf un echo kastigabel ta tuma lugá? Mester di yudansa mesora? Mèldu esaki na polis. Polis ta evaluá kiko e posibilidatnan ta pa tuma akshon.
Unda mi ta mèldu kiko?
Por mèldu tantu via number di telefòn 717 8000, 715 8000 komo na bali di warda di polis. Naturalmente bo por mèldu serka e agente polisial riba kaya tambe.
Bo ta preferá keda anónimo? E ora ei por uza e number di telefòn 9310.
Kon e liña di tep anónimo ta traha?
Ora bo yama 9310, bo ta haña un aparato di kontesta na liña ku ta risibí bo i ta pidi bo pa graba bo mensahe. Seguidamente e sistema ta manda un meil pa un ‘inbox’ spesial ku den dje solamente e grabashon di bo mensahe. No tin niun number di telefòn aserka. Bo mensahe ta keda entregá kompletamente anónimo, pues bo no mester menshoná bo nòmber.
Kontribuí na seguridat di bo komunidat i no duda pa yama e liña di tep anónimo den kaso ku bo ta testigu di un echo kastigabel.
