Notisia di polis di djárason 10 di aprel te ku djabièrnè 12 di aprel 2024
Kralendijk - Detenshon - Riba djaweps 11 di aprel, alrededor di 1.40 or di mèrdia, a detené un hòmber di inisial C.L.A. di 53 aña di edat na warda di polis. Esaki den kuadro di un kaso kaminda un víktima ku tabata enbolbí den un bringamentu na un bar riba Kaya Korona, a presentá na hòspital ku diferente herida. Esaki a sosodé den oranan di anochi riba djaweps 29 di febrüari. A detené e sospechoso pa maltrato severo, maltrato ku un arma i intento di asesinato. Investigashon den e kaso ta kontinuá.
A topa ku kurpa sin bida
Riba djaweps 11 di aprel, alrededor di 9.45 or di mainta, ‘meldkamer’ sentral a risibí notifikashon ku a topa ku un kurpa sin bida den un kas riba Kaya Korona. Un patruya, personal di ambulans, personal di e departamentu forénsiko di KPCN i dòkter a bai na e sitio. Despues di un investigashon di e departamentu forénsiko, dòkter a konstatá morto di e hòmber di inisial J.E.C.M. di 56 aña di edat, nasé riba 9 di aprel 1968 na Colombia.
Aksidente ku skuter
Riba djaweps 11 di aprel, alrededor di 3.15 or di mardugá, ‘meldkamer’ sentral a risibí notifikashon tokante un aksidente ku un skuter na altura di e rotònde riba Kaya Internashonal i Kaya Industria. Na yegada di patruya, e shofùr di e skuter tabata drumi heridá riba kaya. Despues di un investigashon di e departamentu di tráfiko a resultá ku e víktima tabata kore direkshon sùit riba Kaya Internashonal for di Kralendijk i na e rotònde el a dal kontra asera ku konsekuensia ku el a pèrdè kòntròl. Pa e motibu aki el a kai for di e skuter. Ambulans a transportá e víktima pa hòspital pa tratamentu médiko.
Detenshon pa menasa i maltrato
Riba djaweps 11 di aprel, alrededor di 1.10 or di mardugá, a detené un hòmber di inisial R.M.S. na Kaya Apache pa menasa i maltrato. Investigashon den e kaso ta andando.
Kiebro den negoshi
Riba djárason 10 di aprel a drenta keho di kiebro den un negoshi situá na Kaminda Lagun. Entre 6.30 or di anochi riba djamars 9 di aprel i 7 or di mainta riba djárason 10 di aprel, deskonosínan a bai ku diferente mata for di e tereno. Ta trata di 50 palma ‘Areca’, 5 palma ‘Rubelina’ i 50 mata ‘Ixora’. Ta investigando e kaso.
Polis ta urgi un i tur ku por a mira, tende òf ku tin mas informashon ku ta relevante ku lo por yuda ku e investigashon, pa tuma kontakto ku polis via 715-8000 òf via e liña di tep anónimo.
