Notisia di polis di djárason 17 di aprel te ku djabièrnè 19 di aprel 2024
Kralendijk - Detenshonnan pa manehá bou di influensia - Riba djabièrnè 19 di aprel, alrededor di 2.05 or di mardugá, un patruya a nota un skuter ku dos persona riba dje riba Kaya Internashonal. E shofùr tabatin un hèlm bistí pero e pasahero nò. Pa e motibu aki a duna e shofùr òrdu pa para. Despues di un investigashon por a konstatá ku e shofùr tabata bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta permití. A konsekuensia di esaki a detené e hòmber di inisial K.B.T. di 22 aña di edat pa manehá bou di influensia di alkohòl. A transportá e sospechoso pa warda di polis pa un análisis di rosea i el a haña un prosèsferbal pa manehá bou di influensia di alkohòl. Tambe el a haña un prohibishon di manehá di 2 ora. E pasahero a haña un but pa no tin un hèlm bistí.
Riba djaweps 18 di aprel, alrededor di 1.35 or di mardugá, a para shofùr di un skuter pa un kòntròl rutinario riba Kaya Internashonal. Durante e kòntròl a hasi un tèst di supla ku e shofùr i a resultá ku el a konsumí mas alkohòl ku ta permití. A detené e dama di inisial D.v.d.H. de 20 aña di edat pa manehá bou di influensia di alkohòl. A konsekuensia di e resultado di e análisis di rosea, el a haña un prosèsferbal pa manehá bou di influensia di alkohòl. Tambe el a haña un prohibishon di manehá di 1 ora.
Detenshon pa enkubrimentu
Riba djaweps 18 di aprel, alrededor di 3.55 or di atardi a detené un hòmber di inisial L.D.F. di 61 aña di edat riba Kaya Patrushi pa enkubrimentu. E sospechoso tabata den poseshon di un bòter di gas ku a hòrta for di den kurá di un kas riba e kaya menshoná. Ta investigando e kaso.
Molèster di kachó
Riba djaweps 18 di aprel a hasi notifikashon na warda di polis tokante kachónan ku a morde i mata lamchinan na Kaminda Nieuw Amsterdam. E persona ku a mèldu a deklará ku e kachónan di su bisiña a ataká i mata su lamchinan. Pa esaki el a pidi intermediashon di polis entre e i su bisiña. A atendé ku e doño di e kachónan tokante esaki i a skohe pa laga dòkter di bestia pasa un di e kachónan angua. E polis di bario a traha palabrashonnan bon kla ku e doñonan di e kachó pa tene e di dos kachó mará na kadena pa motibu ku e kurá patras no ta bon será. A notifiká e doño di e kachó tambe ku si polis mester haña notifikashon atrobe di e kachó, lo tuma medida.
KPCN ke hala atenshon di doñonan di kachó pa tene kachónan den kurá dor di sòru pa un kurá bon será for di kua e kachónan no por sali i/òf pa mara e kachó pa prevení tipo di situashonnan asin’aki. Abo komo doño ta responsabel pa e komportashon i treinen di bo kachó.
A haña hòmber pèrdí
Alrededor di 7 or di anochi riba djárason 17 di aprel, 'meldkamer' sentral a risibí notifikashon tokante un persona pèrdí. Tabata trata di e hòmber Silvrick Martha, di 70 aña di edat. A mira e hòmber último biaha na altura di un snèk situá riba Kaminda Lagun na momentu ku el a bandoná e sitio ku su outo alrededor di 1 or di mèrdia.
Alrededor di 10.45 or di anochi riba e mesun dia, un habitante di Lagun a mèldu na ‘meldkamer’ sentral ku el a topa ku e hòmber pèrdí i su vehíkulo den área di Lagun. Na yegada di patruya por a nota ku e hòmber no tabata bon bei i tabata papia 'wartaal'. P'esei ambulans a transport’é pa hòspital pa chekeo médiko.
Polis ta gradisí un i tur ku di un forma òf otro a kontribuí na hayasgo di e persona.
Kiebro den kas
Riba djárason 17 di aprel a drenta keho di kiebro den un kas na Kaya Mississipi. Entre 8.10 or di mainta i 11 or di mainta, deskonosínan a fòrsa un bentana di kushina pa drenta den e kas i a listra den e kambernan. Nan tabata en buska di probablemente kosnan di balor. Ta investigando e kaso.
