Notisia di polis di djárason 3 di aprel pa djabièrnè 5 di aprel 2024
Kralendijk - Detenshonnan pa manehá bou di influensia di alkohòl - Riba djabièrnè 5 di aprel, alrededor di 1.30 or di mardugá, un patruya a mira un vehíkulo nan dilanti ta kore zeilu riba kaminda i sin lus. Den Kaya Grandi e shofùr a purba stashoná su vehíkulo, pero no a logra. Pa e motibu aki a aserká e shofùr di e vehíkulo menshoná pa un kòntròl. Durante e kòntròl, e shofùr no por a mustra un reibeweis. Durante e kòmbersashon por a konstatá ku e sospechoso tabata bou di influensia. A hasi un tèst di supla ku e sospechoso i a resultá ku el a konsumí mas alkohòl ku ta permití. A detené e hòmber di inisial C.A.B. di 31 aña di edat pa manehá bou di influensia di alkohòl i a transport’é pa warda di polis pa un análisis di rosea. A konsekuensia di e resultado di esaki, a pone e sospechoso na altura ku e mester entregá su reibeweis. Ademas e sospechoso a hasi uso di su derecho pa hasi un kontra investigashon riba su propio gastu. Ta investigando e kaso.
Riba djaweps 4 di aprel, alrededor di 7.30 or di anochi, a detené un hòmber di inisial E.N.C. di 59 aña di edat riba Kaya Dominico Herrera pa manehá bou di influensia di alkohòl. E sospechoso tabata enbolbí den un aksidente riba Kaya Pos di Amor i a sigui kore bai. Pa e motibu aki un patruya a bai su tras i a para e vehíkulo riba Kaya Dominico Herrera. Durante e kòntròl por a konstatá ku e sospechoso tabata mustra vários karakterístika di un persona ku ta bou di influensia di alkohòl. A hasi un tèst di supla ku e sospechoso i a resultá ku el a konsumí mas alkohòl ku ta permití. A detené e sospechoso i a transport’é pa warda di polis pa un análisis di rosea. A kita su reibeweis.
Riba djaweps 4 di aprel, alrededor di 2.10 or di mardugá, a para shofùr di un skuter riba Kaya Grandi pa un kòntròl rutinario. Durante e kòntròl a hasi un tèst di supla ku e shofùr i a resultá ku el a konsumí mas alkohòl ku ta permití. A detené e dama di inisial A.G.H.P. di 19 aña di edat pa manehá bou di influensia di alkohòl. A konsekuensia di e resultado di un análisis di rosea, el a haña un prohibishon di manehá di 2 ora.
Kachónan peligroso
Riba djaweps 4 di aprel, alrededor di 6.20 or di atardi, ‘meldkamer’ sentral a risibí notifikashon tokante un kachó ku a ataká hende riba Kaya Karina. E persona ku e mèldu a deklará ku pa motibu ku un kurá di kas ta habrí, e kachónan ta sali i ataká hende. Na yegada di e patruya a papia ku e doño di e kachónan riba e situashon aki i a dun’é un atvertensia por eskrito. Nan tabata konsiente di e problema di e kachónan ku ta subi kaya.
Riba djárason 3 di aprel, alrededor di 11.05 or di mainta, ‘meldkamer’ sentral a risibí notifikashon tokante un kachó peligroso den kurá di un kas na Kaya Macario Sint Jago. Na yegada di e patruya, e persona ku a mèldu a deklará ku e kachó di su bisiña a atak’é i su dos nietunan riba su tereno i a hera morde nan. Na momentu ku e agente tabata den kòmbersashon ku e persona ku a mèldu, e kachó peligroso a bula riba muraya di e kurá di e kas. Despues mesora e doño di e kachó a bin pafó i a yama e kachó. A papia ku e doño di e kachó riba e situashon aki i a notifik’é ku si polis mester haña notifikashon atrobe di e kachó, lo tuma medida.
KPCN ke hala atenshon di doñonan di kachó pa tene kachónan den kurá dor di sòru pa un kurá bon será for di kua e kachónan no por sali i/òf pa mara e kachó pa prevení tipo di situashonnan asin’aki. Abo komo doño ta responsabel pa e komportashon i treinen di bo kachó.
Aksidente krusada Kaya Flamingo i Kaya Pos di Amor
Riba djaweps 4 di aprel, alrededor di 6.05 or di atardi, un aksidente entre dos outo a tuma lugá na e krusada di Kaya Kanari, Kaya Pos di Amor i Kaya Flamingo. Na yegada di e patruya, un di e outonan tabata stashoná riba Kaya Pos di Amor i e otro riba Kaya Flamingo. Despues di un investigashon a resultá ku pa motibu di no duna preferensia, e outonan a dal den otro. Personal di ambulans a hasi un chekeo médiko ku ámbos shofùr na e sitio mes i nan no mester a bai hòspital. Polis i KMar a dirigí tráfiko temporalmente te na momentu ku e servisionan konserní a kaba ku nan trabou.
Aksidente entre pikòp i ‘buggy’
Riba djaweps 4 di aprel, alrededor di 2.15 or di atardi, un aksidente entre un pikòp i un ‘buggy’ a tuma lugá riba Kaya Gilberto F. (Betico) Croes. E pasahero di e ‘buggy’ a resultá levemente heridá i personal di ambulans a dun’é tratamentu médiko na e sitio mes. Tur dokumentu di e vehíkulonan tabata na òrdu. Polis a dirigí tráfiko temporalmente te na momentu ku e servisionan konserní a kaba ku nan trabou.
Hòmbernan pèrdí
Riba djaweps 4 di aprel, alrededor di 11.20 or di mainta, ‘meldkamer’ sentral a risibí notifikashon tokante dos hende hòmber ku e pèrdè den e mondi di Ser’i Piedra Krus pegá ku Fontein riba Kaminda di Rincon. E hòmbernan a bai yag yuana i a pèrdè. Nan a deklará na ‘meldkamer’ sentral ku nan tur dos tabata sin awa i nan tabata kansá. Despues di e ‘melding’, polis a kuminsá inmediatamente ku un akshon di reskate pa lokalisá e hòmbernan. Dor ku e mondi tabata hopi será ku mata, a pone ku e agentenan no por a yega serka e hòmbernan. P’esei a manda pidi yudansa di e helikòpter di Wardakosta pa asistí den e akshon di reskate. A tene kontakto telefóniko ku e hòmbernan te na momentu ku e helikòpter a yega for di Kòrsou. Na momentu ku e helikòpter a yega Boneiru, a lokalisá e hòmbernan pèrdí mesora, i seguidamente a hisa nan i a hiba nan na un sitio mas seif. Personal di ambulans a hasi un chekeo médiko ku ámbos na e sitio mes. Despues polis a hiba e hòmbernan kas.
Entrada hudisial ku detenshon
Den oranan trempan di mainta riba djaweps 4 di aprel, a tene un entrada hudisial na un kas situá na Kaya Monseigneur Nieuwindt na Tera Kòrá. E entrada tabata den kuadro di un investigashon relashoná ku violashon di Lei di Opio. Durante e entrada hudisial a detené un hòmber di inisial C.S.M. di 41 aña di edat pa Violashon di Lei di Opio BES. A konfiská sèn kèsh i supstansianan probablemente narkótiko. Investigashon den e kaso ta kontinuá.
Ladronisia for di vehíkulo
Riba djárason 3 di aprel a drenta keho di ladronisia for di un outo ku tabata stashoná na un pòmp di gasolin riba Kaya Neerlandia. Na momentu ku e doño a baha for di su outo i bai e bentana pa paga, deskonosínan a bai ku sèn kèsh ku tabata riba e stul di pasahero, for di e outo. Ta investigando e kaso.
Detenshon
Den oranan di anochi riba djaweps 28 di mart, a detené un di dos sospechoso den e kaso di kua riba djamars 26 di mart un víktima ku herida di bala a presentá na hòspital. E sospechoso ta un hòmber di inisial A.M.R.d.C. di 25 aña di edat. Investigashon den e kaso ta kontinuá.
