Notisia di polis di djabièrnè 13 desèmber te ku djaluna 16 di desèmber 2024
Kralendijk - Aksidente entre outo i skuter - Djadumingu 15 di desèmber, alrededor di 6.45 or di atardi, ‘meldkamer’ sentral a risibí notifikashon tokante un aksidente entre dos vehíkulo riba Kaya Industria. Na yegada di polis a resultá ku un outo, ku a subi kaya for di un sitio di stashoná, a dal den un skuter. E shofùr di e outo a deklará ku un otro vehíkulo a dun’é chèns pa subi kaya pero e no a mira e skuter ku tabata aserkando, debí ku esaki no tabatin lus visibel. E shofùr di e skuter a haña raskunan na su kurpa i personal di ambulans a dun’é tratamentu na e sitio mes. E no mester a bai hòspital. Durante di kòntròl a resultá ku dokumentunan di ámbos shofùr tabata na òrdu.
KPCN ta atvertí doñonan di bestia
Djadumingu 15 di desèmber, polis a risibí notifikashon tokante un kachó ku a venená i a fayesé. Despues di investigashon a resultá ku na vários sitio den e área di Lagun, deskonosínan a pone kuminda di kachó mesklá ku e pestisida ilegal "Tres Pasitos".
Kuerpo Polisial Hulanda Karibense(KPCN) ta atvertí doñonan di bestia pa ta alerta pa ku e fenómeno aki. Paga bon tinu pa nan no kue òf kome nada for di suela den e área menshoná. Ademas ta pidi un i tur ku tin mas informashon tokante e ponementu di venenu aki pa tuma kontakto ku polis na 715 8000 òf via di e liña di tep anónimo 9310.
Atrako ku violensia
Djadumingu 15 di desèmber, alrededor di 4 or di mardugá, 'meldkamer' sentral a risibí notifikashon tokante un kaso di atrako ku violensia severo ku a tuma lugá na altura di un bankomátiko riba Kaya Monseigneur Nieuwindt. Algun ratu despues, a detené dos persona en konekshon ku e kaso aki. Ta trata di dos hende hòmber di inisial R.R.A.F. di 25 aña di edat i J.R.V. di 26 aña di edat.
En konekshon ku e investigashon, a tene un entrada hudisial na kas di un di e sospechosonan den bario Nawati. Na e adrès a konfiská diferente artíkulo relevante pa investigashon.
Polis ta pidi un i tur ku tin informashon ku por ta relevante pa e investigashon pa mèldu esaki via 715 8000 òf e liña di tep anónimo 9310.
Detenshonnan pa manehá bou di influensia
Djasabra 14 di desèmber, alrededor di 10 or di anochi, ‘meldkamer’ sentral a risibí notifikashon tokante un aksidente entre dos vehíkulo riba Kaya Korona. Durante kòntròl riba dokumentunan di ámbos shofùr a resultá ku un di nan no tabatin reibeweis ni dokumentunan di seguro bálido. E shofùr a haña un but pa esaki. Durante kombersashon ku e shofùr aki e agentenan a tuma nota ku e tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta permití ora ta manehá un vehíkulo. A detené e hòmber di inisial W.A.R. di 44 aña di edat i a hib’é warda di polis pa un análisis di rosea.
Djabièrnè 13 di desèmber, alrededor di 9.55 or di anochi, un aksidente entre un pikòp i un outo a tuma lugá riba Kaya Korona. Konforme e maneho ‘botsen is blazen’, a hasi un tèst di supla ku ámbos shofùr di kua a detené ámbos pa manehá bou di influensia di alkohòl. A hiba un hòmber di inisial K.A.J.A. di 54 aña di edat i un hòmber di inisial J.M.C.V. warda di polis pa un análisis di rosea. A konsekuensia di e resultado di esaki, e sospechoso di inisial K.A.J.A. a haña un prohibishon pa manehá di 5 ora i e resultado a konfirmá ku e sospechoso di inisial J.M.C.V. a konsumí alkohòl, pero no riba e kantidat di alkohòl legalmente permití ku un shofùr por konsumí.
Djabièrnè 13 di desèmber, alrededor di 5 or di atardi, meldkamer’ sentral a risibí notifikashon tokante un aksidente entre dos pikòp riba Kaminda Turístiko. Despues a drenta notifikashon ku e partidonan enbolbí tabata den diskushon ku otro. Na yegada di polis, konforme e maneho ‘botsen is blazen’, a hasi un tèst di supla ku ámbos shofùr. For di esaki a resultá ku un di nan a konsumí mas alkohòl ku ta permití ora ta manehá un vehíkulo. A detené un hòmber di inisial G.C.H. di 53 aña di edat i a bai kuné warda di polis pa un análisis di rosea. A konsekuensia di e resultado di esaki a konfiská su reibeweis.
Ladronisia di outo ku detenshon
Den oranan trempan di anochi riba djabièrnè 13 di desèmber, ‘meldkamer’ sentral a risibí notifikashon ku a hòrta un outo na Kaya Prinses Marie. Ta trata di un Hyundai Grand i10 koló pretu ku plachi di number B-16998. E outo ku no tabata na lòk, tabata stashoná dilanti di un diskotèk riba e kaya menshoná, ku yabi den dje. Na momentu ku e doño a regresá, e no a haña su outo kaminda ku el a lag’é. Riba kaminda pa bai entregá un keho na warda di polis, el a mira su vehíkulo ku dos okupante den dje. El a sigui e outo i a yama polis. Riba Kaya Isla Ariba e sospechoso a stashoná e outo di kua e doño a blòkia esaki miéntras ku e tabata warda riba polis. Un pasahero femenino a baha mesora for di e outo i a kore bai, pero e doño a logra tene e shofùr maskulino. Esaki a kondusí na un konfrontashon físiko. E doño finalmente a logra tene e sospechoso te ora ku polis a yega. A detené e hòmber di inisial C.L.B.S. di 26 aña di edat pa ladronisia di vehíkulo, investigashon den e kaso ta kontinuá.
Ladronisia di skuter
Djabièrnè 13 di desèmber a drenta keho di ladronisia di un skuter di e marka Kymco, modèl Agility ku plachi di number MF-3958. Entre 1 or di mèrdia i 4 or di atardi riba e fecha menshoná, deskonosínan a bai ku e skuter. E skuter tabata stashoná dilanti di un skol básiko na Kaya Mississippi. Ta investigando e kaso.
Entradanan hudisial
Djaweps 12 di desèmber, den oranan trempan di mainta a tene entradanan hudisial na tres(3) diferente adrès den e bario di Nikiboko. E entradanan hudisial tabata den kuadro di e investigashon relashoná ku kasonan di tiroteo di último tempu. No tabatin detenshon. Investigashon den e kasonan ta kontinuá.
