Notisia di polis di djabièrnè 20 di desèmber pa djaluna 23 di desèmber 2024
Kralendijk - Ladronisia for di kònteiner - Djadumingu 22 di desèmber a drenta keho di ladronisia for di den un kònteiner situá riba un tereno di konstrukshon na Kaya Leiden. Entre djasabra 21 di desèmber pa 5.30 or di atardi i djadumingu 22 di desèmber pa 7.30 or di mainta, deskonosínan a drenta e kònteiner dor di a forsa e slòt i a bai ku entre otro 3 mashin di bora, 2 mashin di zag, 1 drelbor grandi i 1 chikitu, 1 mashin di sleip grandi i 1 chikitu. Tur e mashinnan menshoná ta di marka Makita. Ta investigando e kaso.
Detenshonnan pa manehá bou di influensia
Djadumingu 22 di desèmber alrededor di 3.35 or di mardugá a detené dos shofùr di skuter na Kaya Grandi pa manehá bou di influensia di alkohòl. Ta trata di un dama di inisial R.S. di 19 aña i un hòmber di inisial T.L.B. di 20 aña di edat. E sospechosonan tabata zeilu riba kaminda na momentu ku un patruya a nota nan. A para nan pa un kòntròl durante kua ámbos shofùr tabata mustra karakterístika di un persona ku a konsumí mas alkohòl ku ta permití ora ta manehá. A hasi un tèst di supla ku ámbos shofùr despues di kua a detené nan tur dos i bai warda ku nan pa hasi un análisis di rosea. A konsekuensia di e resultado di e análisis di rosea e sospechoso R.S. a haña prohibishon pa manehá di 1 ora i a kita reibeweis di e sospechoso T.L.B.
Djabièrnè 20 di desèmber a detené un dama di inisial M.M.B. di 31 aña di edat riba tereno di stashoná di un akomodashon turístiko situá na Bulevar Gobernador Nicolaas Debrot. E sospechoso tabata enbolbí den un aksidente riba e tereno di stashoná aki. Konforme e maneho ‘botsen is blazen’, a hasi un tèst di supla ku e shofùr, ku un resultado positivo. A detené i bai warda kuné pa hasi un análisis di rosea. A konsekuensia di e resultado di esaki el a haña prohibishon pa manehá di 2 ora.
Detenshon pa menasa
Djasabra 21 di desèmber a detené un hòmber di inisial R.A.d.J. pa menasa. E sospechoso a menasa un hòmber na un establesimentu di hóreka despues di kua a sigui un bringamentu. Ta investigando e kaso.
Aksidente Kaya Grandi
Alrededor di 3.35 or di atardi di 21 di desèmber un aksidente entre dos outo a tuma lugá riba Kaya Grandi. Un outo ku tabata koriendo den direkshon nort riba Kaya Grandi kier lora na man robes pa subi Kaya Aruba. E outo ku tabata biniendo for di direkshon kontrali a kore bin dal den dje. Shofùr di un di e outonan a sufri un herida na su kabes i ambulans a transporte pa hospital pa tratamentu i kòntròl médiko.
