Notisia di polis di djabièrnè 27 di desèmber te ku djaluna 30 di desèmber 2024
Kralendijk - Ladronisia di outo - Den oranan di mardugá di djaluna 30 di desèmber a drenta keho di ladronisia di un outo kolo kòrá kima, di marka Suzuki, modèl Jimny, numerá B-16293. E outo tabata stashoná riba e sitio di stashoná di un establesimentu di hóreka situá na Bulevar E.E.G. i no tabata na lòk. Entre 6 or di atardi i 9.30 or di anochi riba djadumingu 29 di desèmber, deskonosínan a bai ku e outo. Den e outo tabatin tambe un telefòn blou di marka Samsung i un pòtmòni ku vários tarheta i sèn kèsh komo kontenido.
Djasabra 28 di desèmber a drenta keho di ladronisia di un pikòp kolo shinishi di marka Nissan, modèl Frontier, numerá V-6272. E pikòp tabata stashoná den kura di un kas situá na Kaya Raimunda. Entre djabièrnè 27 di desèmber, 10.30 or di anochi i djasabra 28 di desèmber, 7.30 or di mainta, deskonosínan a bai ku e pikòp.
Ta investigando e kaso nan.
Ladronisia na bich
Djadumingu 29 di desèmber a drenta keho di ladronisia di un tas di skouder kolo krèm for di un bich situá na Bulevar E.E.G. entre 10.30 or di mainta i 2 or di mèrdia, deskonosínan a bai ku e tas. Den e tas tabatin dos kos pa warda tarheta ku vários tarheta aden, sèn kèsh, un iPhone kolo ros/pus, un Brel di solo di marka Rayban i algun joya. Ta investigando e kaso.
Vehíkulonan kimá
Den oranan di mainta di djadumingu 29 di desèmber ‘meldkamer’ sentral a risibí notifikashon tokante dos vehíkulo kima den un kunuku situá na Flor de Cuba. Ta trata di un ‘Excavator’ kolo hel di marka Kobelco i un trùk kolo oraño di marka Ford. Entre djasabra 28 di desèmber, alrededor di 8 or di anochi i djadumingu 29 di desèmber, alrededor di 8.45 or di mainta, deskonosínan a pega e vehíkulonan na kandela. E kaso ta bou di investigashon.
Aksidente ku skuter
Djasabra 28 di desèmber, alrededor di 7.30 or di mainta un aksidente ku un skuter a tuma lugá riba Kaya Piedra Presioso. Na yegada di patruya a topa ku un hòmber benta abou. E tabatin rasku na su kurpa i tabata keha di doló. Ambulans a transportá e víktima pa hospital pa tratamentu médiko.
Kandela
den oranan di anochi di djabièrnè 27 di desèmber, ‘meldkamer’ sentral a risibí notifikashon tokante kandela den un edifisio di negoshi situá na Kaya Carlos A. Nicolaas. Na yegada polis a será e kaya pa asina personal di brantwer i WEB por a ehersé nan trabounan. Brantwer a paga e kandela. Kousa di e kandela no ta konosí ainda. No tabatin herido.
Atrako armá
Djasabra 28 di desèmber, den oranan di mainta, un atrako armá a tuma lugá riba un joyería situá den Kaya Grandi. Dos hòmber bistí ful na pretu, kara tapa i armá ku arma di kandela, a drenta e joyería i a kibra vários vitrina. E sospechosonan a logra bai ku diferente prenda despues di kua nan a subi un pikòp dòbel kabina koló shinishi ku a kore bai bou di velosidat haltu den direkshon nort riba Kaya Grandi/Bulevar Gobernador Nicolaas Debrot.
Algun ratu despues a topa ku e pikòp aki, kimá, den besindario di Ser'i Angola.
KPCN ta pidi kualke persona ku por a mira, tende òf sa algu di e suseso aki, pa tuma kontakto ku polis via 715 8000 òf via di e liña di tep anónimo 9310.
A topa ku kurpa sin bida
Djabièrnè, 27 di desèmber, den oranan di anochi 'meldkamer' sentral a risibí notifikashon ku a topa ku un persona ku no tabata duna señal di bida den un kas situá na Rincon. Investigashon dor di e departamentu Forènsiko di Kuerpo Polisial Hulanda Karibense a deskartá ku ta trata di un krímen òf ku tabatin señal di uzo di violensia. Dòkter ku a bin na e sitio a konstatá morto di e dama di inisial A.T. di 39 aña di edat.
