Notisia di polis di djaluna 16 di desèmber te ku djárason 18 di desèmber 2024
Kralendijk - Ladronisia di skuter - Djamars 17 di desèmber a drenta keho di ladronisia di un skuter koló blou di marka Kymco, modèl Agility ku plachi di number MF-4061. Entre 5 or di atardi i 8.30 or di anochi riba djaluna 16 di desèmber, deskonosínan a bai ku e skuter. E skuter tabata stashoná ku un lòk di stür, riba un sitio di stashoná di un kompleho di apartamentu na Kaya Sirena.
Djaluna 16 di desèmber a drenta keho di ladronisia di un skuter koló kòrá di marka Sym, modèl Orbit ku plachi di number MF-3564. Entre 9 or di anochi riba djaluna 23 di sèptèmber i 1 or di mardugá di djamars 24 di sèptèmber, deskonosínan a bai ku e skuter. E skuter tabata stashoná ku un lòk di stür riba e sitio di stashoná den ‘Centrumgebied’.
Ta investigando e kasonan.
Detenshon pa maltrato
Djamars 17 di desèmber, alrededor di 6.05 or di atardi, a detené un hòmber di inisial R.L.M. di 35 aña di edat na un kas den bario Mexico pa maltrato. Ta investigando e kaso.
Aksidente ku herido
Djamars 17 di desèmber, alrededor di 1 or di mèrdia, ‘meldkamer’ sentral a risibí notifikashon tokante un aksidente na e krusada di Kaya L.D. Gerharts i Kaya General C. M. Piar. Na yegada na e sitio, e agentenan a topa ku un skuter i dos outo ku tabata enbolbí den e aksidente. Shofùr di e skuter tabata heridá na suela.
Shofùr di outo 1 ku tabata stashoná riba Kaya L.D. Gerharts, a deklará ku el a duna preferensia na un otro outo (outo 2) ku tabata ke subi Kaya L.D. Gerharts for di Kaya General C. M. Piar. Sinembargo e shofùr di outo 2 no a mira ku na e momentu ei un skuter tabata aserkando. Pa evitá un aksidente ku outo 2, e shofùr di e skuter a desviá i a bai dal parti dilanti di e outo ku a duna preferensia (outo 1).
Ambulans a transportá shofùr di e skuter pa hòspital pa tratamentu médiko. Durante kòntròl di dokumentunan di e shofùrnan di outo, tur kos a resultá di ta na òrdu. Konforme e maneho ‘botsen is blazen’, a hasi un tèst di supla ku e shofùrnan di outo, ku un resultado negativo.
Kòntròl di tráfiko planiá
Den oranan di mainta di djamars 17 di desèmber a tene un kòntròl di tráfiko riba Kaya Amsterdam. A para i kontrolá un total di 37 vehíkulo. Aki a duna dos (2) but. Shofùr di un skuter a haña but debí ku e no por a mustra dokumentunan di seguro bálido i shofùr di un outo a haña but pa manehá sin faha di seguridat bistí.
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin bo dokumentunan na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Detenshon pa violashon di Lei di Arma
Djaluna 16 di desèmber, alrededor di 3.15 or di atardi, e Grupo di Tarea Spesial (Groep Bijzondere Opdrachten, GBO) a detené un hòmber di inisial R.H.C di 34 aña di edat na Kaya Tintorero pa violashon di Lei di Arma di Kandela BES. En konekshon ku e detenshon di e sospechoso aki, a tene un entrada hudisial den un kas situá den bario Nawati. Durante di e entrada hudisial a konfiská diferente artíkulo ku ta relevante pa e investigashon. Investigashon den e kaso ta kontinuá.
Ladronisia di baiskel
Djaluna 16 di desèmber a drenta keho di ladronisia di un baiskel di hür koló pretu (Fat-Bike), modèl Biker’s Choice Helmet, ku tabata stashoná na un kas na Kaya Nikiboko Sùit. E baiskel tabata stashoná na lòk pegá na un palu di mata riba tereno di e kas. Deskonosínan a bai ku esaki entre 1 or di mardugá i 8 or di mainta di djaluna 16 di desèmber.
Djaluna 16 di desèmber a drenta keho di ladronisia di un baiskel di hür koló pretu (Fat-Bike), ku tabata stashoná na un apartamentu riba Kaya Libertador Simon Bolivar. E baiskel tabata stashoná den veranda di e kas ku un lòk di kadena na e tayer di patras. Deskonosínan a bai ku esaki entre 1 or di mardugá i 11 or di mainta di djaluna 16 di desèmber.
Ta investigando e kasonan.
