Notisia di polis di djaluna 2 di desèmber te ku djarason 4 di desèmber 2024
Kralendijk - Detenshon pa destrukshon - Djamars 3 di desèmber, alrededor di 1.45 or di atardi, a detené un hòmber di inisial K.P.T. di 22 aña di edat na warda di polis pa destrukshon. E sospechoso probablemente a destruí kamaranan di seguridat na un kas. Ta investigando e kaso.
Ladronisia na bich
Djamars 3 di desèmber a drenta keho di ladronisia di dos tas di lomba na Te Amo Beach, situá na Kaya International. Alrededor di 3.30 or di atardi, deskonosínan a bai ku un tas di lomba koló shinishi i un tas di lomba koló blou ku den dje entre otro dos telefòn Samsung A52, un oloshi koló di plata, brelnan di solo, paña, un pòtmòni koló blou ku tarhetanan i sèn kèsh na momentu ku e doñonan tabata snòrkel. Ta investigando e kaso.
‘Hit & run’
Ultimo tempu mas i mas kaso di ‘hit & run’ ta tuma lugá. Bo ta enbolbí den un aksidente? Semper keda na e sitio i mèldu e aksidente mesora na polis. Ta kastigabel pa bandoná e sitio di aksidente sin laga bo datonan òf ofresé yudansa.
Si tòg bo a bandoná e sitio di aksidente, bo tin 3 ora pa mèldu bo mes na warda di polis. Si bo no hasi esaki, e víktima por entregá keho pa violashon di artíkulo 31 di e buki di ‘Wegensverkeersverordening Bonaire’. Esaki por kondusí na un investigashon ku por yega na konsekuensianan penal.
Bo ta víktima di un ‘hit & run’? Purba kompilá mas tantu informashon posibel:
- E plachi di number di e vehíkulo
- e tipo di vehíkulo i koló di vehíkulo
- Un deskripshon di e shofùr (si ta posibel).
- Saka potrèt òf video si ta posibel
Bo a mira algu òf bo tin mas informashon tokante un kaso di ‘hit & run’? E ora ei tuma kontakto ku polis via 715 8000, 911 òf via e liña di tep anónimo 9310.
