Notisia di polis di djaluna 23 di desèmber te ku djabièrnè 27 di desèmber 2024
Kralendijk - Aksidente Subi Blanku - Den oranan lat di atardi di djaweps 26 di desèmber un aksidente entre tres (3) vehíkulo a tuma lugá riba Kaminda Rincon na altura di Subi Blanku. Shofùr di vehíkulo 1 tabata manehando riba Kaminda Rincon bayendo den direkshon di Playa na momento ku e kier a pasa un pikòp (vehíkulo 2) ku tabata manehá su dilanti. Pero el a nota un outo (vehíkulo 3) biniendo for di direkshon kontrali i a purba bai bek patras di vehíkulo 2. Esaki no a logra e dor di kua el a dal patras di vehíkulo 2, a pèrdè kòntròl i bai terminá kantu di kaminda.
Shofùr di vehíkulo 2 na su turno tambe a pèrdè kontrol dor ku vehíkulo 1 a dal su tras i a bai terminá den mondi kantu di kaminda.
Shofùr di vehíkulo 3 ku tabata manehando den direkshon kontrali den direkshon di Rincon, a mira tur e suseso pa despues sinti kon vehíkulo 1 a dal den su outo parti patras.
En konekshon ku e aksidente aki a sera e kaminda parsialmente pa asina polis i CRS por a ehekutá nan trabounan.
Shofùr di vehíkulo 1 a haña un but pa motibu ku e no por a mustra un reibeweis bálido. Konforme e maneho ‘botsen is blazen’, a hasi un tèst di supla ku tur tres shofùr, ku resultado negativo. Ma aleu tur dokumentu di e shofùrnan tabata na òrdu i no tabatin herido.
Listramentu preventivo ta kondusí na detenshon i entrada hudisial
Den oranan di anochi di djaluna 23 di desèmber durante un kòntròl den kuadro di listramentu preventivo, a detené un hòmber di inisial J.M.A.H. di 59 aña na un establesimentu di hóreka situá na Kaya Avelino (Abechi) Cecilia, en konekshon ku violashon di Lei di Opio BES. A konfiská diferente tipo di droga i tambe sèn kèsh.
En konekshon ku e detenshon aki a tene un entrada hudisial na un kas situá den e bario Nikiboko. Aki a konfiská diferente artíkulo ku ta relevante pa e investigashon. Investigashon den e kaso ta kontinuá.
