Notisia di polis di djárason 18 di desèmber te ku djabièrnè 20 di desèmber 2024
Kralendijk - Kòntròl di tráfiko planiá - Djaweps 19 di desèmber un kòntròl di tráfiko a tuma lugá riba Kaya Korona. A para i kontrolá un total di 12 outo di kua e dokumentunan di e shofùrnan tabata na òrdu.
Algu mas lat a tene un kòntròl di tráfiko na Kaya Nikiboko Sùit na altura di Kaya J.C. van der Ree. Aki a para i kontrolá un total di 10 vehíkulo, di kua 8 outo, 1 skuter i 1 ‘crosser’. A duna kuater (4) but di kua tres (3) pa manehá sin faha di seguridat bistí i un (1) pa e echo ku no por a mustra un reibeweis bálido.
KPCN ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin bo dokumentunan na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Aksidente entre outo i skuter
Djaweps 19 di desèmber, alrededor di 10.20 or di mainta, un aksidente entre un outo i un skuter a tuma lugá riba Bulevar J.A. Abraham. Shofùr di e skuter na promé instante tabata mustra ku e tabata herida, pero un ratu despues el a kuminsá haña kehonan. En konekshon ku esaki a notifiká ambulans i a transportá e víktima pa hospital pa kòntròl médiko.
Aksidente Kaminda Lagun
Djaweps 19 di desèmber, alrededor di 9.25 or di mainta, ‘meldkamer’ sentral a risibí notifikashon tokante un aksidente riba Kaminda Lagun. Na e sitio e agente nan a topa ku un trèker ku kònteiner, dos outo i un pikòp ku tabata enbolbí den e aksidente.
E trèker (vehíkulo 1) no tabatin daño material pero e shofùr a deklará ku e tabata manehá riba Kaminda Lagun i bai lora na su man robes. Na momentu ku e tabata mitar riba kaminda ainda ku e kònteiner, el a nota un pikòp (vehíkulo 2) ta bini den su direkshon ku velosidat haltu. Pa prevení un aksidente, shofùr di e pikòp a purba desviá i a subi e banda kontrali di kaminda. Hasiendo esaki el a bai dal den un outo (vehíkulo 3) ku tabata kore tras di e trèker ku kònteiner.
Shofùr di e di kuater outo, ku tabata manehá tras di vehíkulo 3, tambe mester a desviá. Dor di e maniobra aki e pasahero di e di kuater outo a dal su kabes den e winshil.
Ambulans a transportá dos persona pa hospital pa tratamentu médiko. Konforme e maneho ‘botsen is blazen’, a hasi un tèst di supla ku tur shofùr, ku un resultado negativo. Un di e shofùrnan a haña un but pa manehá sin seguro bálido.
A haña skuter hòrta bek
Den e mardugá di djaweps 19 di desèmber, un patruya a nota un skuter sin plachi di number ku tabata stashoná dilanti di un edifisio situá na Kaya Victoria na Antriol. Na e edifisio tabatin un grupo di persona.
Na momento ku e agentenan a dirigí nan mes na e personanan tokante e skuter, niun hende no a identifiká su mes komo doño di e skuter. Durante kòntròl di e skuter e agentenan a konstatá ku tantu e number di chasis komo e suich tabata mustra sospechoso. Mirando e sirkunstansianan a konfiská e skuter pa investigashon.
Despues di investigashon mas aleu a resultá ku a hòrta e skuter den e anochi di 6 pa 7 di òktober na Kaya Kòrsou. Investigashon den e kaso ta andando.
Insidente di tiroteo
Djaweps 19 di desèmber, alrededor di 2.30 or, ‘meldkamer’ sentral a risibí notifikashon tokante un problema den kua tabatin un grupo di persona enbolbí den besindario di un establesimentu di hóreka situá na Kaya Boneiru.
Despues di insidente personanan presente a mèldu ku nan a tende tiru. Na yegada di agentenan na e sitio nan no a topa ku niun partikularidat. Ta investigando e kaso.
Detenshon pa ladronisia di skuter
Djárason 18 di desèmber, alrededor di 3.20 or di atardi, a detené hòmber di inisial R.F.M di 18 aña di edat na Kaminda Lagun en konekshon ku un investigashon tokante vários ladronisia di skuter ku ta andando. Ta investigando e kaso.
Detenshon pa enkubrimentu
Djárason 18 di desèmber, alrededor di 2.20 or di atardi a detené un mucha hòmber menor di edat di inisial G.R.J.C. di 15 aña na Kaminda Lagun pa enkubrimentu. Na momento ku e sospechoso a mira polis el a trata di skonde un skuter den mondi i despues a trata di hui pa polis. Mirando ku e skuter no tabatin plachi di number i tambe un slòt kibra, a hasi un investigashon despues di kua a resultá ku a hòrta e skuter aki djabièrnè 13 di desèmber. Ta investigando e kaso.
Aksidente Kaminda di Rincon
Djárason 18 di desèmber, alrededor di 11.50 or di mainta, un aksidente entre dos vehíkulo a tuma lugá riba Kaminda di Rincon na altura di Onima. Na yegada agentenan a topa ku un SUV mei mei di kaminda i un outo di hür ku a resultá den mondi. Ambos vehíkulo tabatin basta daño material na e parti drechi dilanti.
Personal di ambulans a chek e pasahero di e SUV i e shofùr di e outo di hür na e sitio i nan no mester a bai hospital. Dokumentunan di ambos shofùr tabata na òrdu.
Detenshon pa pegamentu di kandela
Djárason 18 di desèmber, alrededor di 9.20 or di mainta, a detené un mucha hòmber menor di edat di inisial Q.J.T. di 16 aña na warda di polis. E detenshon aki tabata en konekshon ku e investigashon di pegamentu na kandela di un palapa sitúa na Chachacha bich djabièrnè 27 di sèptèmber. Investigashon den e kaso ta andando.
