Notisia di polis di djárason 4 di desèmber te ku djaluna 9 di desèmber 2024
Kralendijk - Detenshon pa manehá bou di influensia - Djadumingu 8 di desèmber, alrededor di 8.40 or di anochi, a detené un dama di inisial N.A.M.K. di 34 aña di edat na Bulevar Miguel Pourier pa manehá bou di influensia di alkohòl. E detenshon a tuma lugá despues ku ‘meldkamer’ sentral a risibí notifikashon tokante un aksidente riba e kaya menshoná. Na yegada di polis e agentenan a konstatá ku un outo a kore drenta mondi. E shofùr a deklará ku el a bai purba desviá pa un buraku riba kaya i a resultá den mondi. Konforme e maneho ‘botsen is blazen’, a hasi un tèst di supla ku e shofùr i a resultá ku e sospechoso a konsumí mas alkohòl ku ta permití ora ta manehá un vehíkulo. A detené i a hib’é warda di polis pa un análisis di rosea. A konsekuensia di e resultado di esaki a konfiská su reibeweis.
Aksidente ku skuter
Djadumingu 8 di desèmber, alrededor di 1.05 or di mardugá, ‘meldkamer’ sentral a risibí notifikashon tokante un aksidente na altura di e bògt di Kaya Grandi i Kaya L.D. Gerharts. Shofùr di un skuter a dal den un pilá. Pa motibu di esaki, e shofùr a resultá heridá i na yegada di polis i ambulans e tabata for di su konosementu. Segun testigunan, e víktima a pèrdè kòntròl riba su skuter i a kore stret bai den direkshon prohibí i dal den un pilá. Ambulans a transportá e víktima pa hòspital pa tratamentu médiko. A hiba e skuter warda di polis.
Bringamentu ku un herido
Djasabra 7 di desèmber, alrededor di 9.55 or di anochi, ‘meldkamer’ sentral a risibí notifikashon tokante un bringamentu entre algun persona na un establesimentu di hóreka na Kaya Dr. Jose G. Hernandez na kua un persona a resultá heridá. Na yegada di polis nan a topa ku un hòmber ku a resultá di ta e víktima. E hòmber aki, ku e agentenan a rekonosé ku tabata den un bringamentu un dia anterior, a nenga na promé instante di papia ku nan. E otro personanan enbolbí a hui. Debí ku e hòmber ku e agentenan a topa tabata heridá, ambulans a transport’é pa hòspital pa tratamentu médiko. Ta investigando e kaso.
Detenshon pa ladronisia di skuter
Djasabra 7 di desèmber, alrededor di 8 or di anochi, a detené un homber di inisial C.C.C.S. di 19 aña di edat na Kaya Karpitan riba sospecho di ladronisia i enkubrimentu di un skuter. Ta investigando e kaso.
Detenshonnan pa maltrato
Djabièrnè 6 di desèmber, alrededor di 7 or di anochi, ‘meldkamer’ sentral a risibí notifikashon tokante un bringamentu entre dos persona na un establesimentu di hóreka na Kaya Dr. Jose G. Hernandez. Na yegada di polis a resultá ku dos hòmber tabatin diskushon tokante sèn despues di kua esaki a resultá den un bringamentu. A detené tantu e hòmber di inisial J.A.M.S. di 44 aña di edat i e hòmber di inisial M.C. di 52 aña di edat pa maltrato. Ta investigando e kaso.
Kiebro den kas
Djabièrnè 6 di desèmber a drenta keho di kiebro den un apartamentu na Kaya Mamore. Entre 12.45 or di mèrdia i 6.15 or di atardi riba e fecha menshoná, deskonosínan a bai ku entre otro, un Apple Airpods Max, un Go Pro Hero 11, diferente prenda, un Laptop Chromebook di e marka Dell ku su kargadó, un laptop/notebook di e marka Lenovo i un oloshi di marka Seiko. Ta investigando e kaso.
Ladronisia di baiskel
Djabièrnè 6 di desèmber a drenta keho di ladronisia di un baiskel (fatbike) koló pretu di e marka Bikers Choice. Denter di 10 minüt entre 6 or di mainta pa 6.10 or di mainta, deskonosínan a bai ku un baiskel, ku e doño a stashoná patras di un outo na Kaya Kuarta. Ta imvestigando e kaso.
Intento di ladronisia di vehíkulo
Djárason 4 di desèmber a drenta keho di intento di ladronisia di un vehikulo. Ta trata di un vehikulo di e marka Giana, modèl 3500 Smart ku tabata stashoná den kurá di un kas na Sabadeco Crown West. Deskonosínan a kòrta algun waya i a purba bai ku e vehíkulo. Ta investigando e kaso.
Ladronisia di skuter
Djárason 4 di desèmber a drenta keho di ladronisia di un skuter koló blou skur di e marka Sym, modèl Mio, ku plachi di number MF-3492. Entre 11 or di anochi riba djamars 3 di desèmber i 8.45 or di mainta riba djárason 4 di desèmber, deskonosínan a bai ku e skuter. E skuter tabata stashoná riba un sitio di stashoná situá na Kaya Yuma. Ta investigando e kaso.
