Notisia di polis di djabièrnè 16 di febrüari te ku djaluna 19 di febrüari 2024
Kralendijk - A topa ku kurpa sin bida - Riba djaluna 19 di febrüari, alrededor di 7.30 or di mainta, 'meldkamer' sentral a risibí notifikashon ku a topa ku un persona ku no tabata duna señal di bida na un akomodashon turístiko situá na Bulevar Gobernador N. Debrot. Personal di ambulans ku a akudí na e sitio a kuminsá ku reanimashon pero esaki tabata en bano. Despues di un investigashon di e departamentu forénsiko di KPCN, dòkter a konstatá morto natural di un hòmber di inisial B.W.C. di 70 aña di edat, nasé riba 9 di yüni 1953 na Estados Unidos.
Detenshon pa manehá bou di influensia
Riba djaluna 19 di febrüari, alrededor di 2 or di mardugá, a detené un dama di inisial L.d.B. di 36 aña di edat riba Kaya J.N.E. Craane pa manehá bou di influensia di alkohòl. Un patruya a para e sospechoso pa un kòntròl despues ku a mir’é ta kore zeilu riba kaminda. Durante e kòntròl por a nota vários karakterístika ku ta indiká ku e tabata bou di influensia di alkohòl. A konsekuensia di e resultado di un tèst di supla ku a hasi kuné, a detené i hib’é warda di polis pa hasi un análisis di rosea. En konekshon ku e resultado, a kita su reibeweis.
Ladronisia di dos baiskel
Riba djadumingu 18 di febrüari a drenta keho di ladronisia di dos baiskel koló pretu (E-Bike), tipo ‘Fatbike’ ku tabata stashoná patras di un establesimentu di hóreka na Sorobon. E baiskelnan tabata di lòk huntu,ku dos kadena, pegá na un kurá. Deskonosínan a bai ku nan entre 9.10 or di anochi i 9.50 or di anochi. Ta investigando e kaso.
But pa violashon den tráfiko
Entre djárason 14 di febrüari i djaluna 19 di febrüari a duna vários but pa violashon den tráfiko durante di kòntròlnan rutinario.
Esakinan tabata lo siguiente:
7x pa manehá sin reibeweis bálido;
4x pa tene telefòn den man miéntras ta stür;
7x pa manehá sin seguro bálido;
8x pa manehá sin hèlm bisti;
14x pa manehá sin faha di seguridat bisti;
1x pa manehá sin plachi di number;
1x pa kore ku lus di brek dañá.
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.
