Notisia di polis di djabièrnè 2 di febrüari te ku djaluna 5 di febrüari 2024
Kralendijk - Detenshonnan pa manehá bou di influensia - Alrededor di 2.35 or di mardugá riba djaluna 5 di febrüari, a detené un dama di inisial S.G.N. di 27 aña di edat. Despues di un mediashon riba Kaya Korona, e dama a kore bai mustrando komportashon di manehá imprudente. Dor di esaki e patruya a bai tras di outo i na diferente okashon a duna señal pa para, na kua e dam ano a duna oido. Riba Bulevar J.A. Abraham e outo a para, kaminda a detené e dama pa manehá di manera imprudente i pa no duna oido na òrdu di un ámtenar den funshon, despues ku el a duna algu di opstrukshon pa ku su detenshon.
Riba djabièrnè 2 di febrüari a detené un hòmber di inisial J.A.M. di 42 aña di edat pa manehá bou di influensia di alkohòl. A spòt e outo di e sospechoso na momentu ku e tabata zeilu riba Kaya Nikiboko Nort. Pa esaki a para e outo riba Kaya Macario (Cai) Sint Jago pa un kòntròl. Por a nota vários karakterístika ku ta indiká ku e tabata bou di influensia di alkohòl pa kua motibu a disidí pa hasi un tèst di supla kuné. Despues di a purba sinku biaha e sospechoso no por a hasi e tèst di supla i a detené.
Riba djadumingu 4 di febrüari alrededor di 3.30 or di mardugá, a detené un hòmber di inisial J.G.D. di 33 aña di edat riba Kaya J.N.E. Craane pa manehá bou di influensia. E sospechoso tabata enbolbí den un aksidente kaminda el a a kore dal patras di outo ku tabata stashoná. Durante di kòntròl di su dokumentunan por a nota vários karakterístika ku ta indiká ku e tabata bou di influensia di alkohòl. Pa e motibu aki a disidí pa hasi un tèst di supla kuné despues di kua detené.
Ladronisia di skuter
Riba djadumingu 4 di febrüari a drenta keho di ladronisia di un skuter pretu di marka Kymco, modèl Agility, numerá MF-607. E skuter tabata stashoná pafó di un establesimentu nokturno situá na Kaminda Lac. Entre 00.45 or i 2.45 or di mardugá deskonosínan bai kuné.
Algu mas lat riba e mesun dia a drenta keho di ladronisia di otro un skuter. E biaha aki ta trata di un skuter kolo shinishi di marka Kymco, modèl Agility, numerá MF-93. E skuter aki tambe tabata stashoná pafó di un establesimentu nokturno situá na Kaminda Lac. Entre 22.30 or di djasabra 3 di febrüari i 2 or di mardugá di djadumingu 4 di febrüari deskonosínan bai kuné.
Karnaval hubenil a bai trankil
Wikènt tras di lomba e paradanan hubenil a tuma lugá na Rincon i na Playa.
Riba djasabra tur kos a kana trankil na Rincon i no tabatin niun partikularidat.
Riba djadumingu na Playa a papia ku algun shofùr en konekshon ku stashonamentu tras di barikada. Tambe a papia ku kuater shofùr di stèp pa baha i kana ku e stèp na man komo ku nan tabata koriendo riba kaminda públiko ku tabata será en konekshon ku karnaval. Mas aleu a kita un baiskel hiba warda. Esaki pa motibu ku a pidi e siklista pa kana ku e baiskel na man despues di kua el a bolbe subi bek. Alrededor di 9 or di anochi tur karetera tabata habri pa tráfiko.
Outo ta bòltu despues di aksidente
Riba djasabra 3 di febrüari, alrededor di 2 or di atardi un aksidente entre dos outo a tuma lugá riba Kaminda Djabou. Outo 1 tabata manehando den direkshon nort na momentu ku outo 2 a sali for di Kaya Tintorero pa subi Kaminda Djabou sin duna preferensia ku konsekuensia ku outo 1 a dal den outo 2. Outo 2 a bòltu riba su banda dor di klap. Ambulans a transportá shofùr di outo 2 pa hospital pa tratamentu médiko.
Detenshon pa maltrato
Riba djasabra 3 di febrüari a detené un hòmber di inisial E.A.E. di 37 aña di edat pa maltrato riba Kaya Neerlandia. E sospechoso a dal un dam ku moketa será den su kara.
Kòntròl di tráfiko plania Kaya Nikiboko Sùit
Riba djabièrnè 2 di febrüari alrededor di 6.15 or di atardi, a tene un kòntròl di tráfiko plania riba Kaya Nikiboko Sùit. Aki a kontrolá 15 vehíkulo motorisá, di kua 4 shofùr a haña but.
E butnan tabata pa lo siguiente:
2x pa manehá sin reibeweis bálido
2x pa manehá sin seguro bálido
1x pa manehá sin plachi di number
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.
