Notisia di polis di djabièrnè 23 di febrüari te ku djaluna 26 di febrüari 2024

Aksidente Kaya Caribe

Riba djasabra 24 di febrüari, alrededor di 9.30 di mainta, ‘meldkamer’ sentral a risibí notifikashon tokante un aksidente riba Kaya Caribe. Ta trata di un outo di famia i un pikòp. Na yegada di patruya, shofùr di e outo no tabatei mas na e sitio. Shofùr di e pikòp a deklará ku el a stòp un ratu na e parada di bùs i na dado momentu el a tende un lastrá di brek ku seguidamente un klap fuerte. A konsekuensia di e klap, e pikòp a kuminsá drai i a bai para mitar den kurá di un kas. Despues shofùr di e pikòp a mira un hòmber kore bai. Algun ratu despues un persona ku tabata enbolbí den e aksidente a mèldu su mes na hòspital. E persona no kier a deklará nada na polis. E parada di bùs tambe a haña daño debí na e aksidente. A sera e kaya temporalmente pa e servisionan konserní por a hasi nan trabou. Ta investigando e kaso.

Kòntròl di tráfiko planiá

Den oranan di mardugá riba djasabra 24 di febrüari a tene un kòntròl di tráfiko na Kaya Grandi. Aki a para i kontrolá 14 outo i 3 skuter.

A duna 2 shofùr but pa manehá sin un reibeweis bálido i pa manehá sin seguro bálido.

KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.

Bo no ta kumpli ku reglanan? Bo por haña un but.

E suma di un but pa e violashonnan menshoná ta varia entre $30 te ku $225.

Dos outo na kandela

Den oranan di mardugá riba djasabra 24 di febrüari, alrededor di 3.45 or di mardugá, ‘meldkamer’ sentral a risibí notifikashon tokante dos outo ku tabata na kandela dilanti di un kas situá na Kaya Salsa. A evakuá tur e habitante di e kas banda di e outonan na kandela. Brantwer ku a akudí na e sitio a paga e kandela. A resultá ku vlamnan grandi di un di e outonan na kandela, a pega un otro vehíkulo ku tabata stashoná pegá ku esaki na kandela. Alrededor di 6.30 or di mainta, ‘meldkamer’ sentral a risibí un otro notifikashon ku un di e outonan tabata na kandela atrobe. Brantwer a paga e kandela un biaha mas. No tabatin herido. Ta investigando e kaso.

Bo a mira òf tende algu ku por yuda ku e investigashon? Mèldu esaki via 715 8000 òf via di e liña di tep anónimo 9310.

Detenshonnan pa manehá bou di influensia

Riba djasabra 24 di febrüari, alrededor di 3.30 or di mardugá, a detené un hòmber di inisial J.M.L.D. di 30 aña di edat riba Kaya Nikiboko Sùit pa manehá bou di influensia di alkohòl. E sospechoso tabata enbolbí den un aksidente entre dos outo. Durante e kòntròl por a nota vários karakterístika ku ta indiká ku e tabata bou di influensia di alkohòl. A konsekuensia di e resultado di un tèst di supla ku a hasi kuné, a detené i hib’é warda di polis pa hasi un análisis di rosea. En konekshon ku e resultado, a kita su reibeweis.  

Riba djabièrnè 23 di febrüari, alrededor di 7.10 or di anochi, a detené un hòmber di inisial G.R.C. di 66 aña di edat pa manehá bou di influensia di alkohòl. A konsekuensia di mustra un komportashon di manehá di forma peligroso, un patruya a par’é pa un kòntròl na Kaya Gloria. Durante e kòntròl por a nota vários karakterístika ku ta indiká ku e tabata bou di influensia di alkohòl. A konsekuensia di e resultado di un tèst di supla ku a hasi kuné, a detené i hib’é warda di polis pa hasi un análisis di rosea. En konekshon ku e resultado, a kita su reibeweis.  

Riba djabièrnè 23 di febrüari, alrededor di 11.05 or di mainta, a detené un hòmber di inisial J.A.T.O. di 46 aña di edat pa manehá bou di influensia di alkohòl. Durante un intermediashon na un kas situá na Kaya Anna, por a konstatá vários karakterístika ku ta indiká ku e sospechoso tabata bou di influensia di alkohòl. A partisipá klaramente na e sospechoso ku e no por manehá su vehíkulo. Seguidamente e sospechoso a kore bai ku su vehíkulo tòg i un patruya a par’é riba Kaya Calixta.  A detené e sospechoso i hib’é warda di polis pa hasi un análisis di rosea. En konekshon ku e resultado, a kita su reibeweis.  

Ladronisia di baiskel (E-Bike)

Riba djabièrnè 23 di febrüari a drenta keho di ladronisia di un baiskel (E-Bike) koló pretu, tipo ‘Fatbike’ ku tabata stashoná den kurá di un kompleho di apartamento na Kaya Embira. E baiskel tabata na lòk ku un kadena na su wil di patras. Deskonosínan a bai ku e baiskel entre 1.30 or di mardugá i 8.30 or di mainta. Ta investigando e kaso.

But pa violashon den tráfiko
Entre djaluna 19 di febrüari i djaluna 26 di febrüari a duna vários but pa violashon den tráfiko  durante di kòntròlnan rutinario.

Esakinan tabata lo siguiente:
8x pa manehá sin faha di seguridat bisti;

8x pa manehá sin reibeweis bálido;

7x pa manehá sin hèlm bisti;

8x pa manehá sin seguro bálido;

1x pa kore ku lus di brek dañá;

2x pa tene telefòn den man miéntras ta stür.

KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.

Bo no ta kumpli ku reglanan? Bo por haña un but.

E suma di un but pa e violashonnan menshoná ta varia entre $30 te ku $225.