Notisia di polis di djaluna 26 di febrüari te ku djárason 28 di febrüari 2024
Kralendijk - Detenshon pa maltrato - Riba djamars 27 di febrüari, alrededor di 10.30 or di anochi, a detené un hòmber di inisial H.A.E. di 43 aña di edat pa maltrato riba Kaya Orinoco. E sospechoso a maltratá un dama na un bar na e kaya menshoná. Ambulans a transportá e víktima pa hòspital pa tratamentu médiko. Ta investigando e kaso.
Ladronisia di outo
Riba djamars 27 di febrüari a drenta keho di ladronisia di un Toyota Corolla koló blou, numerá B-5663. Entre 6 or di atardi riba djaluna 26 di febrüari i 3 or di atardi riba djamars 27 di febrüari, deskonosínan a bai ku e outo. E outo no tabata na lòk i tabata stashoná dilanti di un kas na Kaya Stormvogel. Ta investigando e kaso.
Ladronisia
Riba djamars 27 di febrüari, un kaso di ladronisia a tuma lugá na Donkey’s Beach riba Bulevar E.E.G.. A bai ku un tas di lomba koló pretu ku strepi shinishi, ku entre otro dos brel di solo di marka Ralph Lauren i Maui Jim, un yabi di outo i un hus di telefòn den dje. E tas tabata pone bou di un duki riba un stul riba e bich i deskonosínan a bai kuné entre 3.50 or di atardi i 4.15 or di atardi na momentu ku e doño nan a bai snòrkel. Ta investigando e kaso.
A topa kurpa sin bida
Riba djamars 27 di febrüari, alrededor di 12.45 or di mèrdia, 'meldkamer' sentral a risibí notifikashon ku a topa ku un persona ku no ta duna señal di bida den un apartamentu na Kaya Sabana. Mesora polis huntu ku e departamento forénsiko a bai na e adrès. Despues di un investigashon, dòkter a konstatá morto di e hòmber di inisial L.J.J. di 75 aña di edat nasé riba 6 di novèmber 1948 na Boneiru.
Turista a fayesé
Alrededor di 10.15 or di mainta, riba djamars 27 di febrüari, ‘meldkamer’ sentral a risibí notifikashon tokante un turista krusero ku a bira malu durante ku e tabata snòrkel na Klein Bonaire. Un boto ku tabata pasando na e momentu ei a trese e víktima kosta kaminda personal di ambulans a tuma e reanimashon ofer, pero esaki tabata en bano. Ta trata di un hòmber di inisial R.M.D. di 74 aña di edat nasé riba 15 di sèptèmber 1949 na Inglatera.
Detenshon pa violashon Lei di Opio
Den oranan trempan di mainta riba djamars 27 di febrüari, alrededor di 5.20 or, a detené un hòmber di inisial A.R.E. di 63 aña di edat riba Kaya Dr. Jose. G. Hernandez pa violashon di Lei di Opio BES. Durante un entrada hudisial den kas di e sospechoso, a konfiská un bleki, un pochi i diferente paki ku probablemente supstansianan narkótiko komo kontenido, un ‘holster’ di pia, un kuchú, un mashin di pisa chikitu i un telefòn. Ta investigando e kaso.
Detenshon pa manehá bou di influensia
Riba djamars 27 di febrüari, alrededor 12:45 or di mardugá, a detené un hòmber di inisial L.T. di 32 aña di edat riba Kaya Sonmontuno pa manehá bou di influensia di alkohòl. E sospechoso tabata enbolbí den un aksidente entre dos outo. Durante e kòntròl por a nota vários karakterístika ku ta indiká ku e tabata bou di influensia di alkohòl. A konsekuensia di e resultado di un tèst di supla ku a hasi kuné, a detené i hib’é warda di polis pa hasi un análisis di rosea. E sospechoso a haña un but pa motibu ku e no por a mustra un reibeweis.
Bo a mira algu sospechoso? Yama 717 8000 òf e liña di tep anónimo 9310.
