Notisia di polis di djaluna 19 di febrüari te ku djabièrnè 23 di febrüari 2024
Kralendijk - Detenshon pa violashon di Lei di Identifikashon - Riba djabièrnè 23 di febrüari, alrededor di 6.10 or di mainta, a detené un hòmber di inisial T.A.C.O. na Kaya Soeur Bartola. Un patruya a bai na e adrès menshoná despues di a risibí notifikashon tokante un persona no deseá i a topa ku e hòmber. E personal di seguridat a deklará ku e edifisio tabata será i ku di un òf otro manera e hòmber a drenta e edifisio. Na momentu ku e agentenan kier a papia ku e sospechoso, por a konstatá vários karakterístika ku ta indiká ku e tabata bou di influensia di un òf otro supstansia. E agentenan a puntra e sospechoso pa su nòmber di kua e no tabata ke koperá. A dun’é òrdu pa mustra un prueba di identifikashon pero ku esaki tampoko e no a kumpli. Seguidamente e sospechoso a kana bai pafó i a dun’é òrdu atrobe pa mustra un prueba di identifikashon. E sospechoso no a duna oido na òrdu di polis i tabata ke sigui kana bai. E agentenan a par’é pa kual motibu e sospechoso a tira un moketa ku su man robes den direkshon di e agente. E agentenan na e momentu ei a partisipá na e sospechoso ku ta detené. E sospechoso no kier a koperá i a resistí fuertemente kontra su detenshon, motibu pa kua mester a usa forsa brutu di forma apropiá pa detené. A detené e hòmber pa violá Lei di Identifikashon BES i pa drenta un edifisio públiko ku na e momentu ei tabata será, sin pèrmit.
Sushi gròf na kandela
Den oranan di anochi riba djaweps 22 di febrüari, alrededor di 9.30 or di anochi, ‘meldkamer’ sentral a risibí notifikashon tokante un kantidat grandi di sushi gròf ku tabata na kandela banda di un kònteiner riba tereno di un akomodashon turístiko situá riba Bulevar J.A. Abraham. Esaki tabata un kandela grandi ku tabata menasá di ekspandé. Na yegada di patruya i brantwer a resultá ku tabata restunan di palu di konstrukshon ku tabata na kandela. E kandela tabata bou di kòntròl i brantwer a paga esaki. Polis a sera kaya di manera ku brantwer por a hasi su trabou trankil.
Detenshon pa manehá bou di influensia
Riba djaweps 22 di febrüari, alrededor di 1.15 or di mardugá, a detené un hòmber di inisial M.M.G. pa manehá bou di influensia di alkohòl. Pa motibu di su komportashon di manehá, un patruya a par’é pa un kòntròl riba Kaya Theresa F. Ilario. Despues di un investigashon, por a konstatá ku e shofùr tabata bou di influensia di alkohòl i a hasi un tèst di supla kuné. A konsekuensia di e resultado di esaki a detené. E sospechoso a haña un prohibishon di manehá di 1 ora.
Ladronisia di skuter
Riba djárason 21 di febrüari a drenta keho di ladronisia di un skuter koló pretu di e marka Senzo, modelo Sport, ku plachi di number MF-3648. E skuter tabata stashoná ku kadena na e tayer patras, pegá na kurá di un kompleho di apartamento riba Kaya P.N. Antonio Neuman. Deskonosínan a bai ku e skuter entre 8.15 or di anochi riba djamars 20 di febrüari i 11.45 or di mainta riba djárason 21 di febrüari. Ta investigando e kaso.
Kòntròlnan di tráfiko planiá
Riba djárason 21 di febrüari, entre 4.30 or di atardi i 8 or di anochi, agentenan di Kuerpo Polisial Hulanda Karibense (KPCN) a tene kòntròlnan di tráfiko planiá riba Kaya Korona i riba Kaya Industria. E kòntròlnan tabata dirigí riba tin ámbos plachi di number pegá na e lugá konserní riba e vehíkulo. Durante e kòntròlnan aki a duna diferente shofùr but pa manehá sin plachi di number. A duna tambe diferente shofùr but pa manehá entre otro sin faha di seguridat bisti, pa uso di telefòn tras di stür, pa manehá sin hèlm bisti, pa manehá sin reibeweis bálido i pa manehá sin seguro bálido.
Algun shofùr ku tabatin nan plachi di number huntu ku nan, por a pega esaki na e sitio.
A bai ku un outo warda di polis pa motibu ku e shofùr tabata manehá sin plachi di number i no por a mustra un reibeweis i seguro bálido.
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.
Landadó ta fayesé
Riba djaluna 19 di febrüari, alrededor di 6.45 or di anochi, ‘meldkamer’ sentral a risibí notifikashon ku un persona a bira malu durante ku e tabata landa na e pisina flotante na altura di Parke Tului situa riba Kaya J.N.E. Craane. Na promé instante personal di ambulans i polis no por a yega na e persona, pa motibu ku e waf ta será pa mantenshon. Al final personal di ambulans a logra pa subi e waf i a kuminsá ku reanimashon. Algun ratu despues a transportá e víktima pa hòspital pa kontinuá ku e reanimashon, pero esaki tabata en bano. Despues di un investigashon di e departamentu forénsiko di KPCN, dòkter a konstatá morto di e hòmber di inisial E.G.D.C. di 26 aña di edat nasé riba 29 di novèmber 1997 na Kòrsou.
KPCN ta hasi un yamada na un i tur pa no landa na e pisina flotante, miéntras esaki ta será.
