Notisia di polis di djárason 28 di febrüari te ku djabièrnè promé di mart 2024
Kralendijk - Ladronisia di pòtmòni - Riba djaweps 29 di febrüari a drenta keho di ladronisia di un pòtmòni di kueru koló pretu, ku kontenido, ku deskonosínan a bai kuné. Esaki na momentu ku e pòtmòni a kai for di saku di karson di e doño dilanti di un restourant riba Kaminda Lagun. Ta investigando e kaso.
Outo ta dal den baiskel
Riba djaweps 29 di febrüari, alrededor di 8 or di mainta, un aksidente entre un outo i un siklista a tuma lugá riba e krusada ku ta konektá Kaya Grandi ku Bulevar Gobernador N. Debrot, Kaya Neerlandia i Kaya Herman J. Pop. Na momentu ku e patruya a yega na e sitio, personal di ambulans tabata bezig ku kòntròl i tratamentu médiko di e siklista. E shofùr di e outo a deklará ku e tabata kore den direkshon nort i diripiente el a mira un hòmber riba un baiskel a krusa kaya. El a purba desviá pero no a logra, ku konsekuensia ku el a dal den e baiskel. E siklista a deklará ku e no a paga bon tinu na momentu ku e tabata bai krusa kaya. E auto a dal den e tayer di dilanti di e baiskel, ku konsekuensia ku el a kai riba su kabes. Polis a dirigí e tráfiko temporalmente te na momentu ku e servisionan konserní a kaba hasi nan trabou.
Detenshon pa manehá bou di influensia
Riba djaweps 29 di febrüari, alrededor di 1.45 or di mardugá, a detené un hòmber di inisial D.A.C.H. di 37 aña di edat na Kaya Bonaire pa manehá bou di influensia di alkohòl. E sospechoso tabata enbolbí den un aksidente riba un sitio di stashoná outo. Durante e kòntròl riba dokumentonan por a nota vários karakterístika ku ta indiká ku e tabata bou di influensia di alkohòl. A konsekuensia di e esaki, a detené i hib’é warda di polis pa hasi un análisis di rosea. Ademas, e sospechoso a haña un but pa motibu ku e no tin reibeweis.
Kòntròl di tráfiko planiá
Riba djárason 28 di febrüari, entre 9.30 or di anochi i 11.30 or di anochi a tene un kòntròl di tráfiko planiá riba Bulevar J.A. Abraham. Aki a para i kontrolá 12 outo i 8 skuter, di kua 7 shofùr a haña un but.
E butnan tabata pa lo siguiente:
4x pa manehá sin reibeweis bálido;
3x pa manehá sin seguro bálido.
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko.
Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.
Bo a mira algu sospechoso? Yama 911/112 òf 715 8000 òf e liña di tep anónimo 9310.
