Notisia di polis di djárason 7 di febrüari te ku djabièrnè 9 di febrüari 2024
Kralendijk - Detenshon pa manehá bou di influensia - Riba djaweps 8 di febrüari a detené un hòmber di inisial R.M.E. di 57 aña di edat, na Kaya Shastan, pa manehá bou di influensia di alkohòl. E sospechoso tabata enbolbí den un aksidente entre dos outo riba e kaya menshoná. Durante di kòntròl di e dokumentunan por a nota vários karakterístika di un persona bou di influensia di alkohòl, i a detené. No tabatin herido durante e aksidente.
Selebrá karnaval na un manera seif i responsabel
E dianan benidero ta den kuadro di karnaval; awe nochi e parada di ‘teener’, djasabra marcha grandi na Rincon, djadumingu marcha grandi na Playa, djaluna e parada di despedida di karnaval hubenil i djamars esun di marcha grandi. Ta tempu pa fiesta i alegria pero laga nos respetá e reglanan vigente i tuma responsabilidat pa no mes i otronan.
P’esei Kuerpo Polisial Hulanda Karibense ta duna algun tep pa por selebrá karnaval di manera seif:
- Husa kùp re-usabel pa bebe aden i no glas òf bòter.
- Paga bon tinu riba muchanan. Siñ’é ken ta e persona
konserní pa yud’é (polis) i kiko e mester bisa si e
pèrdè.
- Sera bo kas bon promé ku sali i para bo outo na un
lugá seif; no laga kos balioso den outo.
- Bebe na midi. Si bo ta bebe, traha sita ku un hende pa
hiba bo kas i no stür.
- No para bo outo tras di barikada. Bo ser kerí por tin
mester di ayudo urgente.
- Hóbennan palabrá ku bo mayornan unda bo ta òf ta
bai. Evitá uso di alkohòl i droga.
- Manehá responsabel, husa bo faha di seguridat i
baha velosidat
Mirando e periodo largu ku bo ta for di kas durante di karnaval, ta rekomendabel pa sera bo kas bon i pa sòru pa e tin sufisiente iluminashon ora bo sali. Stashoná bo outo na un lugá seif, pero no tras di barikada i no laga kos balioso den outo. Asina nos por selebrá un karnaval seif i responsabel.
Kuerpo Polisial Hulanda Karibense ta deseá un i tur un felis Karnaval.
