Notisia di polis di djabièrnè 26 di yanüari te ku djaluna 29 di yanüari 2024

Detenshon pa manehá bou di influensia i pa maltrato

Riba djaluna 29 di yanüari, alrededor di 2.15 or di mardugá, ‘meldkamer’ sentral a risibí notifikashon tokante un aksidente den ‘centrumgebied’ kaminda tabatin un bringamentu andando entre un grupo di hende. Na yegada di patruya a konstatá ku pa motibunan te ainda deskonosí, un aksidente entre un outo i tres bròmer ku tabata pará kantu di kaminda, a tuma lugá. E agentenan a mira tambe un hòmber ku kara na sanger i un grupo di hòmber ku tabata den diskushon. Na e momentu ei, e agentenan a aserká e hòmber ku kara na sanger i por a sinti un holó fuerte di alkohòl. E hòmber a deklará ku el a okashoná e aksidente i ku despues a sak’é for di su vehíkulo i a bringa kuné. A hasi un tèst di supla ku e shofùr i a resultá ku e tabata bou di influensia di alkohòl. Pa motibu ku e shofùr a resultá heridá i ku ambulans mester a transport’é pa hòspital pa tratamentu médiko, mas despues, alrededor di 3.50 or di mardugá, a detené na Kaya Soeur Bartola pa manehá bou di influensia. Ta trata di un hòmber di inisial B.V/D.L. di 30 aña di edat. A konfiská reibeweis di e sospechoso tambe. Despues di un investigashon, a detené un hòmber di inisial J.I.W. den ‘centrumgebied’ pa maltrato i violensia públiko. E sospechoso tabatin un tas huntu kuné i den e tas a topa ku un kuchú. A konfiská e kuchú. Investigashon den e kaso ta kontinuá.

Shofùr di ‘raptor’ no a duna oido na òrdu di polis

Riba djasabra 27 di yanüari, alrededor di 10 or di anochi, a spòt shofùr di un ‘raptor’ riba Kaya Internashonal na momentu ku el a pasa un patruya miéntras e tabata hòp esaki. Pa e motibu aki e patruya a bai su tras i a dun’é òrdu pa para. E no a duna oido na esaki i a paga e lusnan di e ‘raptor’. E shofùr a hala pasa diferente vehíkulo miéntras e patruya tabata sigui e shofùr for di un distansia. Na dado momentu e patruya a pèrdè shofùr di e ‘raptor’ for di bista. Despues di un búskeda, a topa ku e ‘raptor’ patras di un kas na Kaya Karanjito. E shofùr no tabata presente. A konfiská e ‘raptor’ i a hib’é warda di polis.

Kuater detenshon pa maltrato

Riba djasabra 27 di yanüari, alrededor di 5.30 or di atardi, ‘meldkamer’ sentral a risibí notifikashon tokante un insidente na kua a maltratá un persona ku un arma na Kaya Pos di Amor. Na yegada di e patruya, un hòmber a deklará ku e tabatin un konflikto ku su bisiña i e konflikto aki a eskalá despues di kua a surgi un bringamentu. Durante e bringamentu, dos hòmber a batié. Por a konstatá ku e hòmber tabatin un raskunan riba su lomba prosedente di un opheto. Personal di ambulans a chèk e hòmber na e sitio mes i e no mester a bai hòspital. Despues di un investigashon, e kontrapartido a deklará ku e víktima a dal e wanta den su kara. Despues di esaki a surgi un bringamentu. Despues ku e agentenan a skucha ámbos partido, a detené tur enbolbí. Ta trata di un hòmber di inisial I.M.J.S. di 41 aña di edat, un hòmber di inisial R.A.D.P. di 34 aña di edat ku a detené pa maltrato, maltrato ku un arma i violensia públiko i un hòmber di inisial L.C.M. di 34 aña di edat ku a detené pa maltrato. Algun ratu despues riba e mesun dia, alrededor di 6.30 or di atardi, un dama a bini na bali na warda di polis i a deklará ku e tambe tabata enbolbí den e bringamentu na Kaya Pos di Amor. Riba esaki a detené e dama di inisial D.R.D.P. di 35 aña di edat pa maltrato, maltrato ku un arma i violensia públiko. Investigashon den e kaso ta andando.

Ladronisia lus di patras di pikòp   

Riba djasabra 27 di yanüari a drenta keho di ladronisia for di un pikòp ku tabata stashoná na Kaya Dialma. Entre djabièrnè 26 di yanüari, alrededor di 2 or di atardi i djasabra 27 di yanüari, alrededor di 7.40 or di mainta, deskonosínan a bai ku dos lus di patras di patras di un pikòp di hür di e marka Nissan, modèl Frontier. A kòrta e wayanan di koriente. Ta investigando e kaso.

Detenshon pa menasa ku morto i destrukshon

Riba djasabra 27 di yanüari, alrededor di 1.50 or di mardugá, a detené un hòmber di inisial A.A.E. di 55 aña di edat na un kunuku situá den besindario di Paradijs pa menasa ku morto i destrukshon. E sospechoso a menasá un dama ku morto i a destruí un spil di outo. Ta investigando e kaso.

Detenshon pa maltrato

Riba djabièrnè 26 di yanüari, alrededor di 11 or di mainta, a detené un hòmber di inisial W.A.R. di 34 aña di edat na Santa Clara pa maltrato. Despues di un diskushon riba pir di sùit na Kaya C.E.B. Hellmund, e sospechoso a dal un hòmber ku wanta den su kara. Investigashon den e kaso ta andando.

Diferente but pa violashon den tráfiko
Entre djaluna 22 di yanüari i djaluna 29 di di yanüari a duna diferente but pa violashon den tráfiko durante kòntròlnan rutinario.

E butnan tabata pa lo siguiente:

4x pa manehá sin hèlm bistí;

4x pa manehá sin reibeweis bálido;

5x pa manehá sin seguro bálido;

2x pa manehá sin plachi di number;

1x pa kore den direkshon prohibí;

2x pa tene telefòn den man miéntras ta manehá;

2x pa manehá sin faha di seguridat bistí.

KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. 

Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225

 

Bo a mira algu sospechoso? Yama 717 8000 òf e liña di tep anónimo 9310.