Notisia di polis di djaluna 22 di yanüari te ku djárason 24 di yanüari 2024
Kralendijk - Pistol di kèlki konfiská durante kòntròl - Riba djamars 23 di yanüari, alrededor di 6.30 or di anochi, a spòt dos ‘crosser’ riba Bulevar Miguel A. Pourier. Kara di e promé shofùr tabata kompletamente tapá ku un flanèl i su wowonan so tabata visibel. E patruya a rekonosé e di dos shofùr sí. Algun ratu despues e patruya a mira e di dos shofùr pará na un kas na Bulevar Miguel A. Pourier. E shofùr tabata riba e ‘crosser’ i tabata papia ku un persona den kurá di e kas. E patruya a disidí pa aserká e shofùr pa un kòntròl. Na momentu ku e agente a aserká e shofùr, el a trata na kore bai. Despues a dun’é òrdu pa mustra un reibeweis bálido i un seguro bálido. E no por a kumpli ku esaki. Despues e no por a mustra un prueba di identifikashon tampoko. Durante e kòntròl, e shofùr a kuminsá komportá di forma sospechoso. El a keda ku su tas di lomba duru tené. Na e momentu ei un otro patruya a yega na e sitio. Na momentu ku e shofùr a mira e koleganan aki, el a tira su tas di lomba riba pòrch di e kas i a bai para un tiki mas leu. E agentenan a disidí pa kontrolá e tas i a mira un probabel arma di kandela den e tas. Na e momentu ei mesora e sospechoso a kore bai. E patruya a bai su tras pero sin resultado. A konfiská e tas di lomba ku e arma di kandela i e ‘crosser’ i a hiba nan warda di polis. Algun ratu despues, e departamentu di Investigashon Forénsiko (FO) a hasi un investigashon i a resultá ku e arma tabata un pistol di kèlki. Investigashon den e kaso ta andando.
Aksidente Kaminda Gurubu
Riba djamars 23 di yanüari, alrededor di 11.50 or di mèrdia, ‘meldkamer’ sentral a risibí notifikashon tokante un aksidente entre dos vehíkulo riba Kaminda Gurubu. Na yegada di e patruya a resultá ku outo 1 a dal den outo 2 ku tabata kore su dilanti. Na promé instante brantwer tambe a akudí na e sitio komo ku posiblemente tabatin un di e okupantenan pega den e outo, pero esaki no tabata e kaso. E shofùr i e pasahero di outo 2 a resultá heridá i ambulans a transportá ámbos pa hòspital pa tratamentu médiko. Polis a sera e kaya temporalmente pa e servisionan konserní por a hasi nan trabou. Koninklijke Marechaussee tambe a asistí na esaki.
Kachó ku ta kana lòs a ataká hòmber riba skuter
Riba djamars 23 di yanüari, un hòmber a presentá na warda di polis i a deklará ku un kachó a atak’é i mordé riba su skuter na Kaya Sabana. E víktima tabata heridá na su pia i a bai huntu ku polis na e sitio kaminda e insidente a tuma lugá. Aki el a indiká kua tabata e kachó ku a atak’é. Miéntras polis tabata na e sitio, un otro notifikashon di un habitante den besindario a drenta. E notifikadó aki tambe a indiká ku e mesun kachó a drenta su kurá i a morde su kachó. Dor di tur e notifikashonnan aki i pa seguridat di habitantenan di e bario, a skohe pa dòkter di bestia pasa e kachó aki angua.
Detenshon pa manehá bou di influensia
Riba djaluna 22 di yanüari a detené un hòmber di inisial H.V.V. di 68 aña di edat pa manehá bou di influensia di alkohòl. E sospechoso tabata enbolbí den un aksidente entre dos outo riba Kaya Rofina. A hasi un tèst di supla kuné i a resultá ku e tabata bou di influensia. A detené i a hib’é warda di polis pa un análisis di rosea. A konsekuensia di e resultado di esaki a konfiská su reibeweis.
A topa kurpa sin bida
Riba djaluna 22 di yanüari , alrededor di 9 or di anochi, ‘meldkamer’ sentral a risibí notifikashon pa manda un patruya na Kaya Caiquetio pa asistí personal di ambulans ku mirónes ku tabata presente na e sitio. Na yegada di e patruya, personal di ambulans tabata bezig ku reanimashon di e víktima ku tabata benta abou riba kaminda públiko. Algun ratu despues personal di ambulans a stòp ku e reanimashon. A transportá e kurpa sin bida pa kas mortuario i despues di investigashon dor di e departamentu di Investigashon Forénsiko (FO), dòkter a konstatá un morto natural. Ta trata di un hòmber di inisial A.A.A. di 62 aña di edat, nasé riba 9 di febrüari 1961 na Boneiru.
Bringamentu ta kondusí na detenshon
Alrededor di 3.50 or di atardi riba djaluna 22 di yanüari, ‘meldkamer’ sentral a risibí notifikashon tokante un bringamentu entre un grupo di hóben na altura di un parke riba Kaminda Lagun. Na yegada di e patruya a topa ku un grupo di persona bou di un palu na Kaya Rebecca. Na promé instante niun hende no kier a deklará nada na polis tokante e bringamentu. Despues di un investigashon, e agentenan a mira un hòmber ku tabata ful na sanger. E tabatin un flanèl na su man robes pa stòp sangramentu. E víktima i un testigu a deklará na polis kiko a sosodé. E patruyanan despues a bai buska e dos sospechosonan. Algun ratu despues a topa ku e sospechosonan den kurá di un kas na Kaya Papa Cornes. A detené e hòmber di inisial J.F.A.C. di 23 aña di edat pa destrukshon i maltrato ku un arma i a detené un hòmber di inisial J.R.B.T. di 28 aña di edat pa maltrato ku un arma. Ta investigando e kaso.
Detenshon pa violashon Lei di Opio BES
Riba djaluna 22 di yanüari a detené un mucha muhé menor di edat na Kaya Frater Odulfinus pa violashon di Lei di Opio BES. A gara e sospechoso ku supstansianan probablemente narkótiko. Ta trata di un mucha muhé di inisial S.S.A.S.D. di 15 aña di edat. A konfiská e supstansianan probablemente narkótiko. En konekshon ku e kaso aki, den oranan di atardi riba djamars 23 di yanüari a tene un entrada hudisial na Kaminda Nieuw Amsterdam. No a topa ku nada partikular. Investigashon den e kaso ta kontinuá.
Kòntròl di tráfiko planiá
Den oranan di mainta riba djaluna 22 di yanüari, a tene un kòntròl di tráfiko planiá riba Kaya Nikiboko Nort. E kòntròl tabata dirigí riba reibeweis bálido i prueba di seguro bálido. Durante e kòntròl a para i kontrolá 11 vehíkulo. En total a duna 4 shofùr un but.
Esaki tabata pa lo siguiente:
1x pa manehá sin faha di seguridat bistí;
2x pa manehá sin seguro bálido;
1x pa manehá sin reibeweis bálido.
KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Bo a mira algu sospechoso? Yama 717 8000 òf e liña di tep anónimo 9310.
