Notisia di polis di djaluna 29 di yanüari te ku djárason 31 di yanüari 2024
Kralendijk - Detenshon pa manehá bou di influensia - Riba djárason 31 di yanüari, alrededor di 2 or di mardugá, a spòt un outo sin niun plachi di number riba Kaya L.D. Gerharts na momentu ku e outo a pasa un patruya. Pa e motibu aki e patruya a bai su tras pa kontrolá e shofùr. Seguidamente e agentenan a mira ku e shofùr a hisa velosidat i a kuminsá manehá di forma imprudente. Na e momentu ei e patruya a keda sigui e outo for di un distansia. Riba Kaya Berlin e agentenan a mira ku e vehíkulo a baha velosidat i riba Kaya Kanari a dun’é òrdu pa para. Na esaki e shofùr a duna oido. Na momentu ku e agentenan a aserká e shofùr, a hasi un tèst di supla kuné i a resultá ku e tabata bou di influensia di alkohòl. A detené e hòmber di inisial E.C.Q. di 37 aña di edat pa manehá bou di influensia di alkohòl i a hib’é warda di polis pa un análisis di rosea. A konsekuensia di e resultado di esaki, el a haña un prohibishon di manehá di 2 ora. A hiba e outo warda di polis.
Den oranan di mardugá riba djamars 30 di yanüari, alrededor di 2.35 or di mardugá, a detené un hòmber di inisial M.K. di 24 aña di edat pa manehá bou di influensia di alkohòl. E sospechoso tabata kore riba un skuter riba Kaya Grandi i un patruya a par’é pa un kòntròl. Durante e kòntròl riba e dokumentunan konserní, e shofùr no por a mustra un reibeweis. Despues di un investigashon, a konstatá ku e shofùr tabata bou di influensia di alkohòl i a hasi un tèst di supla kuné. A konsekuensia di e resultado di esaki a detené. E sospechoso a haña un but tambe pa manehá sin un reibeweis.
A topa ku kurpa sin bida den kas
Riba djaluna 29 di yanüari, alrededor di 4.45 or atardi, 'meldkamer' sentral a risibí notifikashon ku a topa ku un persona ku no tabata duna señal di bida den un kas situá na Kaya Proud. Un patruya, personal di ambulans, personal di e departamentu forénsiko di KPCN i dòkter a bai na e sitio. A konfiská e kurpa sin bida i despues di un investigashon di e departamentu forénsiko, a resultá ku e dama a haña un insidente dor di kua el a risibí leshonnan ku a kousa su morto. Ta trata di un dama di inisial M.B.S., di 62 aña di edat, nasé riba 11 di novèmber 1961 na Hulanda.
