Notisia di polis di djárason 17 di yanüari te ku djabièrnè 19 di yanüari 2024
Kralendijk - Aksidente entre pikòp i siklista - Riba djárason 17 di yanüari, alrededor di 12 or di mèrdia, ‘meldkamer’ sentral a risibí notifikashon di un aksidente entre un pikòp i un siklista riba Kaya Nikiboko Sùit. Na yegada di e patruya, e shofùr di e pikòp a deklará ku e tabata kore direkshon nort riba Kaya Nikiboko Sùit i na momentu ku el a bai pasa banda di dos siklista, el a tende un zonido na e banda drechi di e baki di su pikòp. Na e momentu ei el a wak den spil ku e siklista a kai na suela. E siklista a deklará ku e pikòp a dal den stür di su baiskel. Pa e motibu aki el a kai i a resultá levemente heridá. Personal di ambulans a trata e siklista na e sitio mes.
Disfrutá, pero bebe na midi
Atrobe ta kasi wikènt. KPCN ke avisá pa konsumí alkohòl ku límite si bo ta partisipá den tráfiko. Asina bo ta prevení situashonnan fèrfelu pa bo mes i pa otronan. Ta prohibí pa partisipá den tráfiko si bo a konsumí mas ku e kantidat máksimo permití. Si bo mester bai warda i ta haña un but ta dependé di e resultado di e tèst di supla.
Tèst di supla
Ku un tèst di suplá polis ta kontrolá si bo ta bou di influensia di alkohòl. Bo ta obligá di partisipá na e tèst di supla. E tèst aki ta mustra si bo a bebe mas ku ta permití pa lei. Resultado di e tèst aki ta determiná si bo mester bai warda investigashon mas aleu. Bo ta nenga di hasi e tèst? E ora ei bo ta haña un prosèsferbal. Dependiendo di e resultado di e tèst di supla bo mester bai warda di polis pa un análisis di rosea. Durante e investigashon aki polis ta midi presis kuantu alkohòl bo a konsumí ku un aparato spesial.
Bo ta manehá bou d influensia di alkohòl? E ora ei bo ta haña un but, un prohibishon (temporal) pa manehá, un kastigu di prisòn òf un kombinashon di e kastigunan aki. E peso di e kastigu ta dependé di e seriedat di e situashon. Bo ta involukrá den un aksidente? E ora ei ta tèst bo mas lihé pa konsumo di alkohòl ku durante di un kontrol rutinario.
Mi ta kastigabel si mi ta fuma komo peaton?
Esaki ta posibel. Polis por duna un prosèsferbal pa buracheria públiko. Polis a topa bo den estado burachi? E ora ei polis ta uza bo aparensia di buracheria i bo aktitut. E ora ei no ta hasi un tèst di supla.
KPCN ta deseá un i tur un wikènt seif i plasentero!
