Notisia di polis di djárason 24 di yanüari te ku djabièrnè 26 di yanüari 2024
Kralendijk - Detenshon pa menasa i violensia públiko - Riba djaweps 25 di yanüari, alrededor di 9.45 or di mainta, a detené un hòmber di inisial E.P.R.A. di 42 aña di edat riba Kaya Libertador Simon Bolivar pa menasa i violensia públiko. Esaki ta relashoná ku un bringamentu entre dos dama ku a tuma lugá riba djadumingu 21 di yanüari na altura di un bar riba Kaya Korona, na kua e sospechoso a maltratá i menasá un di e damanan. Investigashon den e kaso ta andando.
Outo na kandela
Riba djaweps 25 di yanüari, alrededor di 2.20 or di mardugá, ‘meldkamer’ sentral a haña notifikashon tokante un outo na kandela na Kaya Mandolin. Brantwer a logra paga e kandela. Ta trata di un outo di servisio di Kuerpo Polisial Hulanda Karibense. No tabatin herido. Kousa di e kandela no ta konosí. Investigashon den e kaso ta andando.
Disfrutá, pero bebe na midi
Atrobe ta kasi wikènt. KPCN ke avisá pa konsumí alkohòl ku límite si bo ta partisipá den tráfiko. Asina bo ta prevení situashonnan fèrfelu pa bo mes i pa otronan. Ta prohibí pa partisipá den tráfiko si bo a konsumí mas ku e kantidat máksimo permití. Si bo mester bai warda i ta haña un but ta dependé di e resultado di e tèst di supla.
Tèst di supla
Ku un tèst di suplá polis ta kontrolá si bo ta bou di influensia di alkohòl. Bo ta obligá di partisipá na e tèst di supla. E tèst aki ta mustra si bo a bebe mas ku ta permití pa lei. Resultado di e tèst aki ta determiná si bo mester bai warda investigashon mas aleu. Bo ta nenga di hasi e tèst? E ora ei bo ta haña un prosèsferbal. Dependiendo di e resultado di e tèst di supla bo mester bai warda di polis pa un análisis di rosea. Durante e investigashon aki polis ta midi presis kuantu alkohòl bo a konsumí ku un aparato spesial.
Bo ta manehá bou d influensia di alkohòl? E ora ei bo ta haña un but, un prohibishon (temporal) pa manehá, un kastigu di prisòn òf un kombinashon di e kastigunan aki. E peso di e kastigu ta dependé di e seriedat di e situashon. Bo ta involukrá den un aksidente? E ora ei ta tèst bo mas lihé pa konsumo di alkohòl ku durante di un kontrol rutinario.
Mi ta kastigabel si mi ta fuma komo peaton?
Esaki ta posibel. Polis por duna un prosèsferbal pa buracheria públiko. Polis a topa bo den estado burachi? E ora ei polis ta uza bo aparensia di buracheria i bo aktitut. E ora ei no ta hasi un tèst di supla.
KPCN ta deseá un i tur un wikènt seif i plasentero!
Bo a mira algu sospechoso? Yama 911/112 òf e liña di tep anónimo 9310.
