Kòntròl multidisiplinario na Saba i Sint Eustatius
Kralendijk - Den e simannan tras di lomba vários kòntròl multidisiplinario a tuma lugá den hafnan di Saba i Sint Eustatius. Durante di e kòntròlnan aki a kontrolá tur pasahero ku a yega, e ekipahe ku a bin kuné i tambe e tripulashon di e fèri Makana. A kontrolá e fèri mes tambe.
Na dos sitio di konstrukshon na Saba tambe a tene kòntròlnan multidisiplinario. Durante di e kòntròlnan aki a kontrolá tur trahadó presente riba e dokumentu di estadia korekto i tambe a chèk pa trafikashon di hende.
E akshonnan aki ta resultado di e intenshon di e partnernan di kadena di RIEC pa atendé ku ‘ondermijning’* mihó respektivamente den hafnan i den konstrukshon riba e área di trafikashon di hende i eksplotashon laboral riba e islanan.
Un tim multidisiplinario ku ta konsistí di Kuerpo Polisial Hulanda Karibense, Koninklijke Marechaussee, Duana Hulanda Karibense, Entidat Públiko Saba, Wardakosta, e Servisio di Imigrashon i Naturalisashon (IND) i e ministerio di Asuntunan Sosial i Labor, sostené pa RIEC CN (Sentro di Informashon i Ekspertisio Regional) a ehekutá e kòntròlnan.
Durante di e kòntròlnan no a konstatá ningun violashon i no a duna but.
RIEC CN ta hunga un ròl krusial den atendé ku ‘ondermijning’* na Saba i Sint Eustatius. Dor di kolaborashon i kompartí informashon entre diferente instansia ta engrandesé e efektividat i kòntròl i intervenshon, ku komo meta garantisá e seguridat i integridat den haf i den konstrukshon.
RIEC CN ta un akuerdo di kolaborashon unda RIEC CN ta un aktor sentral relashoná ku konekshon di e partnernan di kadena ku otro. Entre otro dor di interkambiá informashon pa atendé ku kriminalidat ku ta ‘ondermijnend’, prevenshon i sostené ku preparashon i ehekushon di kòntròl i akshon konhunto.
*Kriminalnan ta hasi uzo di negoshi i servisionan legal pa aktividatnan ilegal. Dor di esaki norma i balor i e sentido di seguridat i abitabilidat ta disminuí. E efekto aki yama tambe ondermijning.
