Notisia di polis di djabièrnè 31 di mei te ku djaluna 3 di yüni 2024
Kralendijk - Detenshon pa enkubrimentu - Riba djadumingu 2 di yüni, alrededor di 5.45 or di atardi, a detené un hòmber di inisial S.C.F.W. di 22 aña di edat riba Kaya Gilberto F. Croes pa enkubrimentu. Un patruya a mira e sospechoso na momentu ku e tabata manehá un skuter riba Kaya General Carlos Manuel Piar. E patruya a rekonosé e sospechoso ku ta konosí pa manehá vehíkulonan motorisá sin reibeweis. Algun ratu despues e patruya a mira e sospechoso atrobe na momentu ku el a sali for di Kaya Internashonal pa subi Kaya Gilberto F. Croes i para na altura di un sitio di laba outo. E patruya a bai para banda di e sospechoso ku tabata hopi nèrvioso. Na momentu ku e agentenan a kana bai serka dje, a dun’é òrdu pa mustra un reibeweis i prueba di seguro pero e no por a kumpli ku esaki. Despues di investigashon mas aleu a resultá ku en berdat a duna e sospechoso but diferente biaha pa manehá sin reibeweis. A poné na altura ku ta konfiská e skuter paso ta trata aki di tres biaha ku e ta manehá sin reibeweis. Ademas por a konkluí dor di diferente karakterístika ku e skuter probablemente ta prosedente di ladronisia i a konfiská esaki pa mas investigashon. Ta investigando e kaso.
Detenshon pa manehá bou di influensia
Riba djadumingu 2 di yüni, alrededor di 1.35 or di atardi, a detené un hòmber di inisial L.D.v.P. di 27 aña di edat riba Kaya L.D. Gerharts pa manehá bou di influensia di alkohòl. E sospechoso a dal ku su vehíkulo den un otro outo ku tabata stashoná riba e kaya menshoná i a sigui kore bai. Algun ratu despues el a yama ‘meldkamer’ sentral i a duna di konosé ku t’e a okashoná e aksidente riba Kaya L.D. Gerharts i dor di spantu el a kore bai. E tabata na e momentu ei na e sitio di e aksidente. Na momentu ku e patruya a yega, tabatin indikashon ku e tabata bou di influensia di alkohòl i seguidamente a pasa over pa 'botsen is blazen'. A hasi un tèst di supla kuné di kua a resultá ku el a konsumí mas alkohòl ku ta permití. A hib’é warda di polis pa un análisis di rosea i a konsekuensia di e resultado di esaki el a haña un prohibishon di manehá di 3 ora.
Aksidente entre outo i bròmer
Riba djasabra 1 di yüni, alrededor di 10.15 or di anochi, ‘meldkamer’ sentral a risibí notifikashon tokante un aksidente ku herido riba Kaminda Lagun. Na yegada di e patruya a resultá ku un mini-vèn i un bròmer a dal den otro. E shofùr di e mini-vèn a deklará ku e tabata kore riba Kaminda Lagun i ke a kita na man robes pa drenta Kaya Susana. Na e momentu ei diripiente el a sinti ku algu a dal den su vehíkulo. Pa e motibu aki e shofùr di e bròmer a kai i a resultá heridá. Ambulans a transportá ámbos shofùr pa hòspital pa tratamentu médiko.
