Notisia di polis di djaluna 17 di yüni te ku djárason 19 di yüni 2024
Kralendijk - Kòntròl di tráfiko Kaya Internashonal - Riba djamars 18 di yüni, entre 9 or di mainta i 10.30 or di mainta, e aspirantenan di polis di Kuerpo Polisial Hulanda Karibense (KPCN) bou di supervishon di un dosente di akademia di polis i algun guiadó di práktika, a tene un kòntròl di tráfiko dirigí riba seguridat den tráfiko.
E kòntròl di tráfiko tabata parti di nan èksamen di tráfiko, durante kua nan mester a kumpli ku diferente punto. E kòntròl a tuma lugá riba Kaya Internashonal.
Durante di e kòntròl a paga tinu prinsipalmente riba infrakshonnan den tráfiko. A kontrolá 22 vehíkulo i a duna 2 but pa e siguiente infrakshonnan:
1x pa manehá sin faha di seguridat bistí;
1x pa manehá sin reibeweis bálido i sin un prueba di seguro.
A duna tambe sinku shofùr un atvertensia pa manehá sin faha di seguridat bistí i pa tene telefòn den man miéntras ta manehá.
Na final di e èksamen di tráfiko tur e aspirantenan di polis a slag!
KPCN lo kontinuá ku e tipo di kòntròlnan aki na diferente parti di nos isla i ta atvertí tur outomobilista pa e dokumentunan nesesario, ta na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Detenshon pa menasa
Riba djamars 18 di yüni, alrededor di 9.40 or di mainta, a detené un hòmber di inisial E.T.B. di 52 aña di edat riba Kaya Guyaba pa menasa. E sospechoso a menasá algun persona ku morto riba djamars 11 di yüni i a tira piedra den nan direkshon. Ta investigando e kaso.
