A detené 3 empleado di KPCN den investigashon penal
Kralendijk - Den un investigashon penal den un insidente ku uso di violensia, kondusí pa Reshèrshi di Reino, awe djaluna 13 di mei, a detené tres empleado di Kuerpo Polisial Hulanda Karibense (KPCN). Ta sospechá nan di maltrato i froude por eskrito.
Anteriormente KPCN a inisiá un investigashon disiplinario pa motibu di un insidente violento kaminda tabatin miembronan di kuerpo inbolukrá. Tantu for di konklushonnan interno komo for di siudadanonan señal di violashon/infrakshon di integridat a bini dilanti relashoná ku e insidente. Kuerpo ta tuma e tipo di señalnan aki hopi na serio i p’esei a inisiá un investigashon disiplinario. Despues di a topa ku komponentenan penal den e investigashon disiplinario dor di KPCN, konsulta ku Ministerio Públiko (OM) a tuma lugá. Seguidamente OM a pasa e informashon ofer pa Reshèrshi di Reino. Esaki a kondusí na un investigashon penal den kua awe mainta a hasi e tres detenshonnan. Komo ku e investigashon penal ta andando no por bai den detaye tokante e insidente violento, e inbolukrashon di e empleadonan i e investigashon mes.
No opstante ku den e fase aki pues por kompartí informashon limitá pa no hasi daño na e investigashon penal, hefe di kuerpo Alwyn Braaf ke enfatisá ku maneho di kuerpo ta intervení na momento ku tin señal di violashon/infrakshon di integridat. Braaf: ”Integridat ta e base di bon trabou di polis. Komo polis nos tei pa komunidat i pa ku esaki miembronan di kuerpo tin un funshon ehemplar. Algu ku nan a primintí durante di nan seremonia di huramentashon i promesa (eed en belofte). Pues komunidat por spera di nos ku nos lo aktua di manera metikuloso i adekuá, ku nos ta tuma responsabilidat pa esaki i ku nos ta transparente tokante esaki. Nos ta tuma señal ku tin di haber ku aktuashon ku no ta adekuá of ku no ta kompatibel ku un funshon na polis hopi na serio i ta laga investigá esaki a fondo. Naturalmente nos ta warda riba e resultadonan di e investigashon, pero komo maneho di kuerpo nos por bisa kaba ku nos ta aktua di manera determiná i fuerte kontra komportashon inapropiá i/of kastigabel.
Banda di e investigashon andando, kuerpo lo empeñá su mes tambe pa prevení situashonnan indeseá den futuro pa garantisá ku komunidat por konfia den un organisashon íntegro kaminda bienestar i seguridat di e siudadano semper ta na promé lugá. “Aktuashon profeshonal i obligatorio di miembronan di kuerpo dirigí na e siudadano ta di importansia krusial pa garantisá nos legitimidat komo organisashon di polis. Pa ku esaki nos tin e obligashon na komunidat i na nos mes empleadonan pa komo maneho di kuerpo, empeñá nos mes di forma aktivo pa prevenshon di kuestionnan di integridat i pa aktua kaminda ta nesesario. E realisashon ku komo organisashon ainda nos tin pasonan di tuma riba e tereno di integridat ta doloroso, pero nos no ta bira kara p'é. Al kontrario: hustamente nos kier tuma e pasonan aki’, segun Alwyn Braaf.
