Notisia di polis di djárason 29 di mei te ku djabièrnè 31 di mei 2024
Kralendijk - Ladronisia di kahanan di webu - Riba djárason 29 di mei a drenta keho di ladronisia na un kompania situá na Punta Blanku. Den oranan di mardugá deskonosínan a drenta den un depósito via un porta di patras i bai ku 120 dosein di webu. Ta investigando e kaso.
Entrada hudisial ku detenshon
Riba djárason 29 di mei, alrededor di 7 or di mainta, a tene un entrada hudisial den un kas situá na Kaya Demerara na Tera Kòrá. E entrada hudisial tabata den kuadro di un investigashon relashoná ku violashon di Lei di Opio BES. Durante e entrada hudisial a detené un hòmber di inisial G.N.T. di 53 aña di edat. A konfiská diferente artíkulo relevante pa e investigashon i un kantidat di supstansia narkótiko. Investigashon den e kaso ta kontinuá.
Kiebro den kas
Riba djamars 28 di mei a drenta keho di kiebro den un kas mas situá na Kaya Taki. Entre 8.30 or di mainta i 10.45 or di anochi riba e dia menshoná, deskonosínan a drenta e kas via di un bentana di kushina ku tabata habrí i a bai ku diferente joya. Entre otro kadena di oro i plata, oloshi di man di hende hòmber, armbant, renchi di orea i tambe diferente shùrt nobo di marka Nike i Puma. E víktima a sigui deklará ku dos siman pasá tambe deskonosínan a purba kibra i drenta via di un bentana di baño. Ta investigando e kaso.
But pa violashon den tráfiko
Entre djaluna 6 di mei i djabièrnè 31 di mei a duna vários but pa violashon den tráfiko durante di kòntròlnan rutinario.
Esakinan tabata lo siguiente:
19x pa manehá sin reibeweis bálido;
7x pa manehá sin seguro bálido;
4x pa manehá sin hèlm bisti;
3x pa tene telefòn den man miéntras ta stür;
2x pa kore den direkshon prohibí;
2x pa stashoná robes;
2x pa manehá sin faha di seguridat bistí;
1x pa kore sin plachi di number.
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko.
Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
