Notisia di polis di djárason 8 di mei te ku djabièrnè 10 di mei 2024

Vehíkulo na kandela

Alrededor di 10.30 or di mainta riba djabièrnè 10 di mei, ‘meldkamer’ sentral a risibí notifikashon di un bùs ku tabata na kandela dilanti di un kas na Kaya Eindhoven. E doño a deklará ku el a bai start e vehíkulo i a tende un zonido straño. Despues ku el a sinti holó di huma el a baha for di e vehíkulo i a mira kandela ta sali for di e tapa di motor. Seguidamente el a paga e motor lihé i e mes a purba paga e kandela pero sin resultado. Brantwer a bini na e sitio i a paga e kandela. No tabatin herido. E bùs a haña daño material dor di e kandela. Kousa di e kandela no ta konosí.

Detenshonnan pa manehá bou di influensia

Riba djabièrnè 10 di mei, alrededor di 2.20 or di mardugá, a detené un hòmber di inisial R.P.B. di 46 aña di edat den ‘centrumgebied’ pa manehá bou di influensia di alkohòl. Algun ratu promé un patruya a mira e sospechoso den su pikòp riba Bulevar Gobernador N. Debrot na momentu ku el a sali for di un establesimentu di hóreka riba e kaya menshoná i tabata buta fever. E vehíkulo tabata zeilu di lenks pa rèks riba kaminda den direkshon sùit. Pa e motibu aki e patruya a bai mesora su tras. Na altura di ‘centrumgebied’ den Playa e patruya a mira ku e pikòp a bolbe kuminsá buta fever. Aki a duna e sospechoso òrdu pa para pa medio di lusnan óptiko (zwaailicht) i zonido di sirena di kual el a duna oido. Durante kòntròl mas aleu e sospechoso tabata mustra vários karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta permití. A hiba e sospechoso warda di polis pa un análisis di rosea i a konsekuensia di e resultado di esaki, a konfiská su reibeweis.

Riba djaweps 9 di mei, alrededor di 7.50 or di anochi, ‘meldkamer’ sentral a risibí notifikashon tokante un aksidente entre dos outo riba Kaya Rosaura. E persona enbolbí a logra para e vehíkulo ku a okashoná e aksidente riba Kaya Fidelia. Na yegada di e patruya, un di e shofùrnan a deklará ku un vehíkulo koló blanku a dal den spil di su outo riba Kaya Rosaura. Seguidamente el a mira ku e vehíkulo a sigui kore, di kua el a bai su tras pa par’é. Ambos vehíkulo tabatin daño na e spil na banda robes. Na momentu ku e agentenan a bai atendé ku e shofùr ku a okashoná e aksidente i a sigui kore bai, e tabata mustra vários karakterístika di un persona ku ta bou di influensia di alkohòl. E sospechoso tabatin un reibeweis bálido pero e no tabatin seguro bálido. A hasi un tèst di supla kuné i a resultá ku el a konsumí mas alkohòl ku ta permití. A detené e hòmber di inisial C.V.B. di 47 aña di edat pa manehá bou di influensia di alkohòl i a hib’é warda di polis pa un análisis di rosea. Despues di e resultado di esaki, a konfiská su reibeweis.

Molèsternan di kachó

Riba djaweps 9 di mei, alrededor di 4.40 or di atardi, ‘meldkamer’ sentral a risibí notifikashon tokante un dama ku a keda ataká dor di kachónan di su bisiña den Bario Kibrahacha. Segun e persona ku a mèldu, esaki no ta promé biaha ku e kachónan di su bisiña ta atak’é i ku otro habitantenan tambe tin molèster di e kachónan. Na yegada di e patruya, nan a mira kuater kachó den kurá di e bisiña di kua tres tabata Pitbull. A papia ku doño di e kachónan riba esaki i aki resultá ku e kachónan di e persona ku a mèldu tambe ta subi riba kaya i ta ataká hende. Durante e kòmbersashon ku e doño di e kachónan, dos di e kuater kachónan a kuminsá bringa ku otro. E kachónan tabata agresivo i no tabata ke laga otro lòs. Pa lòs e kachónan for di otro, e agente a spùit e kachónan ku ‘pepperspray’, pero esaki no a yuda. E doño a kuminsá spùit awa riba e kachónan pero esaki tampoko no tabatin efekto. Durante ku e kachónan tabata bringa, un di tres Pitbull a purba bula for di kurá pero un agente a strob’é di hasi esaki. Finalmente e doño a logra kita e kachónan for di otro i a mara tur na kadena. Polis a intermediá entre e bisiñanan despues di kua ámbos a haña un atvertensia por eskrito. A traha palabrashonnan bon kla ku ámbos bisiña i a notifiká nan tambe ku si polis mester haña notifikashon atrobe di e kachónan, lo tuma medida.

Riba djárason 8 di mei, alrededor di 4.30 or di atardi, e hòmber a bini warda di polis i a deklará ku kachónan di su bisiña a morde i mata su kabritu. E agentenan a bai na Kaya Jivaro i aki a resultá ku e kabritu menshoná a bai den kurá di e bisiña dor di kua e kachónan a mat’é. A mustra e doño di e kabritu riba e echo ku su kabritunan no por kana lòs kaminda esaki no ta permití i ku e mester sòru pa e kabritunan keda riba su tereno. E atendé ku doño di e kachónan tambe debí ku su kurá no ta será i ku e tin mas o ménos ocho kachó di kua dos no ta mará na un kadena. A intermediá entre e bisiñanan despues di kua nan a mustra komprenshon.

Den oranan di atardi riba djárason 8 di mei, ‘meldkamer’ sentral a risibí notifikashon tokante un kachó ku a ataká nuebe karné den un kunuku den besindario di Kaminda Lagun. Di e nuebe karnénan, e kachó a mata tres. E persona ku a mèldu mes a yama dòkter di bestia pa bini na e sitio. El a deklará ku na su yegada na e kunuku, el a mira un kachó koló maron. E patruya a kore buska e kachó den besindario pero sin e resultado deseá.

Riba djárason 8 di mei, polis a ha؜ña notifikashon tambe di un kachó riba Kaya Pos di Amor ku tabata mará na un kabuya largu pero e kachó tabata yega te pafó riba kaminda públiko. Pa e motibu aki, e kachó ta ataká hendenan ku ta kana den e kaya. A papia ku doño di e kachó riba esaki i el a bai mara e kachó otro kaminda, p’asina e no sali pafó di kurá mas.

KPCN ke hala atenshon di doñonan di kachó pa tene kachónan den kurá dor di sòru pa un kurá bon será for di kua e kachónan no por sali i/òf pa mara e kachó pa prevení tipo di situashonnan asin’aki. Abo komo doño ta responsabel pa e komportashon i treinen di bo kachó.

Ladronisia di skuter

Riba djaweps 9 di mei a drenta keho di ladronisia di un skuter koló pretu di e modèl La Souris City S 49.9 CC, ku plachi di number MF-3175. E skuter tabata stashoná den kurá di un apartamento riba Kaya Arauco. Entre 7 or di anochi riba djárason 8 di mei i 9.30 or di mainta riba djaweps 9 di mei, deskonosínan a bai ku e skuter. Ta investigando e kaso.

Kòntròlnan di tráfiko planiá

Den oranan di mainta riba djárason 8 di mei, agentenan di Kuerpo Polisial Hulanda Karibense (KPCN) huntu ku e aspirantenan di polis, a tene un kòntròl di tráfiko planiá riba Kaya Korona. Durante e kòntròl aki a kontrolá 24 outo i dos skuter di kua 6 shofùr a haña un but.

E butnan tabata pa e siguiente infrakshonnan:

1x pa manehá sin faha di seguridat bistí;

2x pa manehá sin reibeweis bálido;

3x ba manehá sin seguro bálido.

Mas lat den oranan di mèrdia a tene tambe un kòntròl di tráfiko riba Kaya Industria. Aki a kontrolá 7 vehíkulo di kua 3 shofùr a haña un but. E butnan tabata pa manehá sin reibeweis, pa manehá sin seguro bálido i pa manehá sin faha di seguridat bistí.

Algun ratu despues a bolbe tene un kòntròl di tráfiko planiá riba Kaya Industria. Durante e kòntròl aki a kontrolá 14 vehíkulo di kua 5 shofùr a haña un but.

E butnan tabata pa e siguiente infrakshonnan:

2x pa manehá sin reibeweis bálido;

2x pa manehá sin faha di seguridat bistí;

1x pa no transportá mucha den stul pa mucha.

Durante e kòntròl aki a bai ku un outo warda di polis debí ku esaki tabata e di dos biaha ku e shofùr ta haña un but pa manehá sin reibeweis.

KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko.

Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko. Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.