Notisia di polis di djabièrnè 1 di mart te ku djaluna 4 di mart 2024

Detenshon pa enkubrimentu i violashon di Lei di Identifikashon

Riba djadumingu 3 di mart, alrededor di 7.20 or di anochi, a detené un mucha hòmber di inisial T.M.A.K. di 17 aña di edat na Kaya Andres A. Emerenciana pa enkubrimentu i pa violashon di Lei di identifikashon BES. Un patruya a duna dos hòmber, unu riba un skuter i e otro riba un ‘E-bike’, òrdu pa para pa un kòntròl riba Kaya Andres A. Emerenciana. Esaki pa motibu ku e skuter no tabata disponé di un plachi di number. Ambos hòmber no a duna oido na e òrdu pa para i a hisa nan velosidat. Shofùr di e skuter a logra kore bai. Despues di diferente intento i òrdu pa para e shofùr di e ‘E-bike’, el a hañ’é obligá pa para. A duna e sospechoso òrdu pa mustra un prueba di identifikashon, pero e no kier a koperá i a duna informashon falsu. E sospechoso no por a mustra tampoko na unda el a hür e ‘E-bike’. Pa e motibu aki a detené i a hib’é warda di polis. A konfiská e ‘E-bike’ pa mas investigashon.

Ladronisia di skuter

Riba djadumingu 3 di mart, a drenta keho di ladronisia di un skuter koló pretu di marka Kymco, modelo Agility, ku numerá MF-1676. E skuter tabata stashoná riba un sitio di stashoná skuter, dilanti di entrada di un kompleho di apartamento na Kaya Yuma. E skuter tabata na lòk ku un lòk di stür i un kadena pegá na e tayer di patras. Entre 6 or di atardi riba djasabra 2 di mart i 10.30 or di mainta riba djadumingu 3 di mart, deskonosínan a bai ku e skuter. Ta investigando e kaso.

Persekushon ta kaba ku aksidente

Den oranan di anochi riba djasabra 2 di mart, alrededor di 11.20 or di anochi, un persekushon a tuma lugá ku despues a terminá den un aksidente riba Kaya Korona. Un patruya ku tabata kore riba Kaya Monseigneur Nieuwindt, a spòt tres vehíkulo ku tabata kore ku velosidat haltu den mesun direkshon riba Kaya Nikiboko Sùit. Pa motibu ku e vehíkulonan a pasa ku velosidat haltu, e patruya a bai tras di e vehíkulonan.

Na e rotònde riba Kaya Nikiboko Sùit, tur tres vehíkulo a pasa na banda robes di e ‘eilandje’ ku tin mei mei di kaminda miéntras tabatin vehíkulonan aserkando den direkshon kontrali. E vehíkulonan ku tabata aserkando mester a desviá pa evitá un aksidente ku e tres vehíkulonan. E shofùrnan a sigui kore ku velosidat haltu den direkshon di rotònde Soeurnan di Roosendaal kaminda seguidamente un di e vehíkulonan a subi Kaya Nikiboko Nort direkshon Amboina. E patruya a bai tras di e outo aki i a duna e shofùr òrdu diferente biaha pa para pero e no a duna oido na esaki i a sigui kore. Debí na e velosidat haltu ku e shofùr tabata manehá, e agentenan a konsiderá pa stòp ku e persekushon debí na e peliger pa un aksidente. Ademas e shofùr tabata mustra un komportashon di manehá imprudente i tabata pasa diferente vehíkulo miéntras tabatin otro vehíkulonan aserkando for di direkshon kontrali. Na e momentu ei un otro patruya a para skeins riba kaminda pa intentá di obligá e shofùr imprudente pa para. E shofùr no a baha su velosidat i a sigui kore den direkshon di e outo di polis i a desviá den banda nèt promé ku el a yega dilanti di e outo di polis i a sigui kore den direkshon di Playa. Na e momentu ei a sigui ku e persekushon. Durante e persekushon den Playa, e shofùr a dal den un outo i a sigui kore bai.

Algun ratu despues, e outo a dal tras di un vehíkulo ku tabata kore su dilanti riba Kaya Korona dor di kua e shofùr a pèrdè kòntròl, bai dal den un palu di lus ku konsekuensia ku e vehíkulo a drenta den algun mata i para riba un sitio di stashoná outo di un kompania. Seguidamente dos persona a baha via e porta di dilanti na banda di pasahero di e vehíkulo i a purba kore bai. A duna òrdu na ámbos persona pa keda pará pero nan no a duna oido na esaki. Pa e motibu aki a lòs tirunan di atvertensia den laira. Riba esaki tampoko e sospechosonan no a reakshoná i a sigui kore. Despues di un persekushon kòrtiku na pia, un agente a logra tene un di e sospechosonan. Durante e detenshon, e sospechoso tabata komportá di forma agresivo. Algu mas leu a detené e di dos sospechoso tambe.

A detené e promé sospechoso, un hòmber di inisial R.J.S.M.P. di 19 aña di edat pa intento di asesinato, pa delito kontra órden públiko, pa manehá sin reibeweis, pa manehá sin seguro bálido, i pa no mustra un prueba di identifikashon bálido. A detené e di dos sospechoso, un hòmber di inisial J.S.P. di 19 aña di edat pa delito kontra órden públiko i pa no mustra un prueba di identifikashon bálido.

A detené e dos otro pasaheronan di e vehíkulo, un hòmber di inisial K.R.W.T. di 20 aña di edat i un hòmber di inisial Q.J.J.H. di 19 aña di edat, pa no mustra un prueba di identifikashon bálido. A konfiská e outo i a hib’é warda di polis.

Detenshon pa menasa, delito kontra órden públiko i destrukshon

Riba djabièrnè promé di mart, alrededor di 5.55 or di atardi, ‘meldkamer’ sentral a risibí notifikashon tokante un pleitu entre bisiña na Hanchi Amboina. E patruya a intermediá entre e persona ku a mèldu i e persona enbolbí i despues a bai for di e sitio. Algun ratu despues, ‘meldkamer’ sentral a risibí un notifikashon atrobe ku tin un pleitamentu andando entre e mesun bisiñanan i ku tin tiramentu di bòter. A detené un hòmber di inisial O.D.A.M. di 32 aña di edat pa destrukshon i delito kontra órden públiko, un hòmber di inisial A.M.D. di 33 aña di edat pa menasa i un dama di inisial L.C.M.P. di 30 aña di edat pa delito kontra órden públiko.

Bringamentu

Alrededor di 10.10 or di anochi riba djaweps 29 di febrüari, ‘meldkamer’ sentral a risibí notifikashon tokante un bringamentu entre diferente persona na un bar riba Kaya Korona. Na yegada di patruya, niun hende na e sitio no kier a bisa nada tokante e bringamentu. Algun ratu despues un persona ku tabata enbolbí den e bringamentu, a mèldu su mes na hòspital ku diferente herida. Ta investigando e kaso.

Bo a mira algu sospechoso? Yama 717 8000 òf e liña di tep anónimo 9310.