Notisia di polis di djabièrnè 15 di mart te ku djaluna 18 di mart 2024

Aksidente entre skuter i bùs

Riba djaluna 18 di mart, alredor di 7.25 or di mainta, un aksidente entre un skuter i un bùs a tuma lugá riba Kaya Aruaco. E shofùr di e skùter i un pasahero ménor di edat a resultá levemente heridá i personal di ambulans a trata nan na e sitio mes. Pa motibu di no duna preferensia, e dos vehíkulonan a dal den otro.

Kachó peligroso

Den oranan di mainta riba djaluna 18 di mart, ‘meldkamer’ sentral a risibí notifikashon tokante un kachó agresivo ku a bula kurá di un kas i tabata ataká hende riba Kaya Libertador Simon Bolivar. E persona ku a mèldu a deklará ku ta trata di un kachó koló pretu. E polis di bario ku a bai opservá e situashon, a konstatá ku en berdat tabata trata di un kachó koló pretu i ademas a enkontrá dos kachó koló blanku na e mesun adrès. Na momentu ku e agente a bai mas serka pa wak si tabatin hende na e kas, e kachó a bula kurá i a bini den direkshon di e agente. Pa evitá ku e kachó ta mord’é, e agente a spùit e kachó ku ‘pepperspray’. Finalmente no a enkontrá ku e doño di e kachó. Ta investigando e kaso.

Detenshon pa maltrato

Riba djadumingu 17 di mart, alrededor di 11.15 or di anochi, a detené un hòmber di inisial D.A.N. di 39 aña di edat riba Kaya Comanche pa maltrato. E sospechoso a maltratá un dama i un ménor di edat. Durante su detenshon, e sospechoso no tabata ke koperá ku su detenshon i a resistí fuertemente. Na promé instante a bui solamente su mannan pero despues ku e sospechoso a kuminsá skòp den direkshon di e agentenan, a bui e na su pianan tambe durante transporte. Investigashon den e kaso ta andando.

Detenshon pa maltrato ku arma

Riba djadumingu 17 di mart, alrededor di 9.35 or di anochi, ‘meldkamer’ sentral a risibí notifikashon tokante un hòmber ku a maltratá un otro hòmber ku un pida palu na Kaya Rebecca. E hòmber tabatin un machete tambe den su man na e momentu ei. Na yegada di e patruya a konstatá ku e víktima tabata drumi na suela. E tabata keha di doló i ambulans a transport’é pa hòspital pa tratamentu médiko. A konfiská e palu ku e sospechoso a maltratá e víktima kuné. Presentenan a deklará na polis ku despues di e maltrato, nan a purba evitá ku e sospechoso ta hui, pero el a kue un machete i a menasá nan ku esaki. Despues el a somentá. Algun ratu despues e sospechoso a presentá na warda di polis. Aki a detené e hòmber di inisial M.O. di 40 aña di edat pa maltrato ku un arma. Na warda di polis e sospechoso a duna nòmber falsu diferente biaha i a mustra e agentenan dokumentonan falsu. Pa esaki el a haña un but. E departamentu di Supervishon di Estranhero (Vreemdelingen Toezicht) di KPCN i reshèrshi ta investigando e kaso.

‘Buggy’ na kandela

Alrededor di 7.15 or di anochi riba djadumingu 17 di mart, ‘meldkamer’ sentral a risibí notifikashon tokante un vehíkulo ku tabata na kandela riba un sitio di stashoná outo di un restaurant na Bulevar Julio A. Abraham. Na yegada di e patruya, entretantu presentenan a paga e vehíkulo na kandela, un ‘buggy’ koló blou, ku un slan di kurá. E doño a deklará ku e tabata kore i na dado momentu un persona a pit’é. Na momentu ku el a bira wak patras, el a mira su vehíkulo na kandela. Seguidamente el a stashoná e vehíkulo kantu di kaya. Brantwer tambe a bini na e sitio pa kontrolá ku e kandela tabata bon pagá. No tabatin herido.

Detenshon pa manehá bou di influensia

Riba djadumingu 17 di mart, alrededor di 3 or di mardugá, a detené un hòmber di inisial I.P.v.D. di 19 aña di edat riba Kaya Industria Pariba pa manehá bou di influensia di alkohòl. E sospechoso tabata manehá un skuter i un patruya a par’é pa un kòntròl rutinario. Durante e kòntròl por a nota vários karakterístika ku ta indiká ku e sospechoso tabata bou di influensia di alkohòl. En konekshon ku e resultado di un tèst di supla, a detené e sospechoso i a hib’é warda di polis pa un análisis di rosea. E sospechoso a haña un prohibishon pa manehá di 3 ora.

Detenshon

Riba djasabra 16 di mart, alrededor di 1.45 or di mardugá, a detené un dama di inisial L.C.M.M. di 38 aña di edat riba Kaya Korona pa no kumpli ku òrdu di polis. Un patruya a mira e sospechoso tabata kore zeilu riba kaminda i a para e sospechoso pa un kòntròl. Durante e kòntròl a duna e sospechoso òrdu pa hasi un tèst di supla. Despues di diferente intento, E sospechoso no por a kumpli ku e tèst di rosea ku a orden’é pa hasi. El kuminsá bira arogante ku e agentenan i tabata keda drenta den diskushon. Despues el a kuminsá ignorá e agentenan. Despues a splik’é diferente biaha ku e ta detené i ku e mester baha for di outo. Pero el a keda sintá den e outo. Despues di un diskushon kaminda mester a bolbe dun’é splikashon, el a baha porfin for di e outo. A transport’é pa warda di polis.

Aksidente entre dos outo

Den oranan di anochi riba djabièrnè 15 di mart, un aksidente entre dos outo a tuma lugá riba Kaya Parapeta. Ambulans a transportá un persona pa hòspital pa tratamentu médiko. Un di e shofùrnan a haña un but pa manehá sin un reibeweis bálido.

Diferente but pa violashon den tráfiko
Entre djaluna 11 di mart i djaluna 18 di mart a duna diferente but pa violashon den tráfiko durante kòntròlnan rutinario.

E butnan tabata pa lo siguiente:

1x pa manehá sin hèlm bistí;

1x pa tene telefòn den man miéntras ta manehá;

4x pa manehá sin seguro bálido;

4x pa manehá sin reibeweis bálido;

2x pa stashoná robes.

KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. 

Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.