Notisia di polis di djabièrnè 8 di mart te ku 11 di mart 2024
Kralendijk - Pikòp a bòltu - Riba djadumingu 10 di mart, alrededor di 5.25 or di atardi, ‘meldkamer’ sentral a risibí notifikashon tokante un aksidente riba Kaminda Tra’i Montaña. Un pikòp a bòltu. Na yegada di e patruya e shofùr tabata sintá banda di e vehíkulo. E shofùr a deklará ku e tabata bini for di Rincon, direkshon Playa i a pèrdè kòntròl den un bògt, pa kual motibu e vehíkulo a bòltu. Ambulans a transportá e shofùr pa hòspital pa tratamentu médiko.
Mondi na kandela
Alrededor di 2.10 or di mardugá riba djadumingu 10 di mart, ‘meldkamer’ sentral a risibí notifikashon tokante di un kandela di mondi na Kaya Veronica kaminda kasnan den serkania tabata kore peliger. Na yegada di e patruya por a konstatá ku e kandela tabata banda di un kas ku no ta abitá i esaki tabata menasá di ekspandé. Durante e kandela, un outo bieu tambe a pega kandela. Brantwer a paga e kandela. No tabatin herido.
Aksidente entre outo i skuter
Riba djasabra 9 di mart, alrededor di 5.10 or di atardi, un aksidente entre un outo i un skuter a tuma lugá riba Kaya Korona. E shofùr di e outo a deklará ku e tabata kore riba Kaya Korona i a lora na su man robes pa drenta Kaya Esther i diripiente un skuter a dal patras di su vehíkulo. Pa e motibu aki e shofùr di e skuter a kai. Ambulans a transportá e shofùr pa hòspital pa tratamentu médiko.
Detenshon pa enkubrimentu
Riba djabièrnè 8 di mart, alrededor di 11.10 or di mainta, a detené un hòmber di inisial G.A.R. di 36 aña di edat riba Kaya Nikiboko Sùit pa enkubrimentu. Un patruya a para e sospechoso pa un kòntròl rutinario i despues di un investigashon a resultá ku e tabata kore riba un skuter hòrtá. Ta investigando e kaso.
But pa violashon den tráfiko
Entre djaluna 26 di febrüari i djaluna 11 di mart a duna vários but pa violashon den tráfiko durante di kòntròlnan rutinario.
Esakinan tabata lo siguiente:
8x pa manehá sin hèlm bisti;
21x pa manehá sin reibeweis bálido;
16x pa manehá sin seguro bálido;
6x pa tene telefòn den man miéntras ta stür;
21x pa manehá sin faha di seguridat bistí;
2x pa manehá den direkshon prohibí;
1x pa no transportá mucha den stul pa mucha.
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko.
Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.
