Notisia di polis di djaluna 18 di mart te ku djárason 20 di mart 2024
Kralendijk - Entradanan hudisial ku detenshon - Den oranan trempan di mainta riba djamars 19 di mart, a tene dos entrada hudisial den Rincon. Ta trata di un kas na Kaya Shoshori i un kas na Kaya Taki. E entradanan tabata den kuadro di un investigashon relashoná ku kasonan di ladronisia di último tempu di vehíkulonan, entre otro E-bikes i skuter. Na e kas na Kaya Shoshori a detené un hòmber di inisial P.L.P. di 21 aña di edat i un hòmber di inisial J.S.P. di 19 aña di edat. Na Kaya Taki a detené un hòmber di inisial R.S.D.W. di 19 aña di edat. Durante e entradanan a konfiská diferente artíkulo relevante pa e investigashon. Investigashon den e kaso ta kontinuá.
Ladronisia na Atlantis Beach
Riba djamars 19 di mart a drenta keho di ladronisia na un bich situá na E.E.G. Bulevar. Entre 3.30 or i 3.35 or di atardi, deskonosínan a bai ku dos tas di kompras koló hel, ku kontenido. Esaki na momentu ku e doño tabata snòrkel. Despues, mas o ménos 200 meter mas leu, a enkontrá e tasnan di kompras koló hel. Durante kòntròl a resultá ku a bai ku e siguiente pertenensianan:
Un kaha koló blanku ku ‘oordopjes’ koló pretu di e marka Samsung, modèl Buds 2;
Un brel di solo koló pretu di e marka Ray-Ban;
Un shùrt deportivo koló blòu, sin manga, di e marka Nike.
Ta investigando e kaso.
Búskeda pa sa paradero di mucha muhé pèrdí ta sigui
Alrededor di 4.15 or di atardi riba djamars 19 di mart, ‘meldkamer’ sentral a risibí notifikashon ku tin un hobensita ku ta pèrdí. Ta trata di Ashley Schouw di 17 aña di edat. Riba e mesun dia, alrededor di 7 or di mainta a mira e hobensita aki pa último biaha na skol riba Kaya Frater Odulfinus. Na momentu ku a bah’é na skol e tabatin un ünifòrm koló shinishi ku logo di VMBO i un djins koló blòu bistí. Huntu kuné e tabatin tambe un tas di lomba grandi koló pretu.
Polis tin gran atenshon pa e kaso aki i ta supliká Ashley Schouw pa mèldu su mes físikamente na warda di polis. Tambe ta pidi kualkier persona ku por a mira òf sa paradero di Ashley, pa tuma kontakto ku polis na 715 8000, 911 òf via di e liña di tep anónimo 9310.
