Notisia di polis di djaluna 4 di mart te ku djárason 6 di mart 2024
Kralendijk - Detenshonnan pa manehá bou di influensia - Riba djárason 6 di mart, alrededor di 2.15 or di mardugá, a spòt un skuter ku tres persona riba dje riba Kaya L.D. Gerharts. Niun di e tres personanan tabatin un hèlm bistí tampoko. Pa e motibu aki a duna e shofùr òrdu pa para. Despues di un investigashon por a konstatá ku e shofùr tabata bou di influensia di alkohòl i a hasi un tèst di supla kuné. A konsekuensia di e resultado di esaki, a detené un hòmber di inisial P.v.d.H. di 23 aña di edat pa manehá bou di influensia di alkohòl. Ademas, e shofùr no por a mustra un reibeweis tampoko i a dun’é un but pa tantu esaki i pa manehá sin un hèlm bistí. E sospechoso a haña un prohibishon di manehá di 4 ora. E otro dos pasaheronan tambe a haña un but pa manehá sin un hèlm bistí.
Riba djamars 5 di mart, alrededor di 1.35 or di mardugá, a detené un hòmber di inisial L.E.C.L. di 37 aña di edat riba Kaya Prinses Marie pa manehá bou di influensia di alkohòl. A para e sospechoso pa un kòntròl rutinario. Durante e kòntròl a resultá ku e tabata bou di influensia di alkohòl. En konekshon ku e resultado di e tèst di supla ku a hasi kuné, a detené. E sospechoso a haña un prohibishon di manehá di 2 ora.
Detenshon pa pegamentu di kandela intenshonal i violashon di Lei di Arma
Riba djamars 5 di mart, alrededor di 6 or di mainta, un entrada hudisial a tuma lugá na un kas situá na Kaya Caranjito. E entrada tabata den kuadro di un investigashon relashoná ku e kasonan di kandela di outo ku a tuma lugá riba e anochi di djabièrnè 12 di yanüari último den e área di Tera Kòrá. A detené un hòmber di inisial L.S.d.P. di 43 aña di edat pa pegamentu di kandela intenshonal i pa violashon di Lei di Arma BES. Ademas, a konfiská diferente artíkulo relevante pa e investigashon. Durante e entrada hudisial a topa tambe ku un arma di kandela ku munishon. A konfiská esakinan tambe. Investigashon den e kaso ta kontinuá.
Aksidentenan entre outo i skuter
Riba djaluna 4 di mart, alrededor di 7.45 or di anochi, un aksidente entre un outo i un skuter a tuma lugá riba Kaya Industria. Personal di ambulans a trata shofùr di e skuter na e sitio mes. A duna e shofùr di e outo but pa manehá sin prueba di seguro.
Riba djaluna 4 di mart, alrededor di 12.35 or di mèrdia, un aksidente entre un outo i un skuter a tuma lugá riba Kaya Gilberto F. Croes. Shofùr di e outo no a duna preferensia na e skuter motibu pa kua e skuter a dal den e outo. Personal di ambulans a trata shofùr di e skuter na e sitio mes i e no mester a bai hòspital.
Detenshon
Riba djasabra 2 di mart, alrededor di 8 or di anochi, e Grupo di Tarea Spesial (Groep Bijzondere Opdrachten, GBO) a detené un hòmber di inisial M.E.S. di 35 aña di edat riba Kaya Caribe pa menasa, maltrato ku arma i violashon di Lei di Arma BES. E sospechoso a maltratá un persona i a menasá diferente persona ku un arma di kandela. Ta investigando e kaso.
