Notisia di polis di djárason 13 di mart te ku djabièrnè 15 di mart 2024
Kralendijk - Molèster di kachó - Riba djaweps 14 di mart, ‘meldkamer’ sentral a risibí notifikashon tokante 2 kachó ku a ataká diferente kabritu na Kaminda di Lac. Na yegada di patruya por a nota ku e kachónan a morde por lo ménos 5 kabritu mata. E agentenan a haña deskripshon di e kachónan aki i seguidamente a sali en buska di e kachónan aki. Algu mas lat un yamada a drenta na ‘meldkamer’ sentral, bisando ku e kachónan aki tabata den kurá di un kas. E habitante di e kas a deklará ku e kachónan no ta di dje ni e no sa di ken nan ta. E tin algun luna ta duna e kachónan kuminda, motibu kua nan ta keda bin bèk den su kurá. En konekshon ku e notifikashon aki dòkter di bestia a pasa e kachónan angua.
Aksidentenan
Riba djaweps 14 di mart, alrededor di 4.55 or di atardi, un aksidente entre un pikòp i un skuter a tuma lugá riba e krusada di Kaya Korona i Kaya Neerlandia. Dor di keda sin duna preferensia, e dos vehíkulonan a dal den otro. Personal di ambulans a atendé ku shofùr di e skuter na e sitio mes. Polis a regla e tráfiko temporalmente te ora ku e servisionan konserní tabata kla ku nan trabounan.
Riba djaweps 14 di mart, alrededor di 7.45 or di mainta, ‘meldkamer’ sentral a risibí notifikashon tokante un aksidente entre tres vehíkulo riba Kaya Amsterdam. Dor di no duna preferensia, outo 1 a dal den un pikòp ku na su turno a bai dal den outo ku tabata pará pa sali. Personal di ambulans a trata shofùr di un di e outonan na e sitio mes i e no mester a bai hospital.
Riba djárason 13 di mart, alrededor di 5.05 or di atardi, un aksidente entre dos vehíkulo a tuma lugá riba Kaya Grandi. Na yegada di e patruya a resultá ku un outo a dal patras di un otro outo. Personal di ambulans a trata shofùr di un di e outonan na e sitio mes. Ambos shofùr tabatin nan dokumentonan na òrdu.
Outo na kandela
Alrededor di 11.10 or di mainta riba djárason 13 di mart, ‘meldkamer’ sentral a risibí notifikashon tokante un outo na kandela riba Kaya Industria Pariba. Na yegada di e patruya, e doño di e outo a deklará ku e tabata rumbo pa un garashi dor ku su vehíkulo tin problema ku ‘radiator’. Na dado momentu el a mira huma tabata sali for di su vehíkulo i a disidí pa stashoná kantu di kaminda pa baha for di e outo. Una bes ku e tabata pafó di e outo, el a mira kandela na e tapa di mashin. Personal di brantwer ku a bini na e sitio a paga e kandela. No tabatin herido.
