Notisia di polis di djárason 27 di mart te ku djárason 3 di aprel 2024

Kandela den vehíkulo

Riba djamars 2 di aprel, alrededor di 1.05 or di mardugá, un patruya a konstatá ku tabatin huma tabata sali for di un pikòp sin okupante ku tabata stashoná den kurá di un kompleho di apartamentu riba Kaya Pos di Amor. Ademas tabatin otro vehíkulonan stashoná banda di e pikòp menshoná di kua a pone brantwer mesora na altura di e situashon. Brantwer a paga e kandela i no tabatin herido. Brantwer a hasi un investigashon pa sa kousa di e kandela i por a konstatá ku e stul di shofùr a kima.

Aksidente Kaya Internashonal

Riba djaluna 1 di aprel, alrededor di 4.25 or di mardugá, ‘meldkamer’ sentral a risibí notifikashon tokante un aksidente riba Kaya Internashonal. Na yegada di e patruya a resultá ku un outo di famia a dal den un kurá i despues den un edifisio. E shofùr a deklará ku e tabata kore den direkshon di Belnem i dor di velosidat haltu el a pèrdè kòntròl. Un di e pasaheronan a resultá heridá durante e aksidente i ambulans a transport’é pa hòspital pa tratamentu médiko.

Detenshonnan pa manehá bou di influensia

Riba djadumingu 31 di mart, alrededor di 10.30 or di anochi, a detené un dama di inisial J.K.N.L. di 28 aña di edat riba Kaminda di Lac pa manehá bou di influensia di alkohòl. E sospechoso tabata enbolbí den un aksidente. A hasi un tèst di supla kuné i a resultá ku el a konsumí mas alkohòl ku ta pèrmití. Pa motibu di e resultado aki a detené i hib’é warda di polis pa un análisis di rosea. A kita reibeweis di e sospechoso.

Riba djabièrnè 29 di mart, alrededor di 4.15 or di mardugá, a detené un hòmber di inisial A.E.A. di 50 aña di edat riba Kaya Korona pa manehá bou di influensia di alkohòl. E sospechoso tabata enbolbí den un aksidente entre dos vehíkulo. A hasi un tèst di supla ku e sospechoso i a resultá ku el a konsumí mas alkohòl ku ta pèrmití. A kita e reibeweis di e sospechoso. E shofùr di e kontrapartido a haña un but pa manehá sin reibeweis.

Kandela den restourant

Riba djadumingu 31 di mart, alrededor di 3.30 or di atardi, ‘meldkamer’ sentral a risibí notifikashon tokante kandela den kushina di un restourant riba Bulevar Julio A. Abraham. E doño a deklará ku el a laga un panchi ku zeta riba kandela i a lubidá di paga e kandela pa kual motibu e panchi a pega kandela. Pa motibu ku tabatin persona ta permanesé den algun apartamentu riba e restourant, a evakuá nan for di e edifisio. Brantwer a bini na e sitio i a paga e kandela. Personal di ambulans a hasi un chekeo médiko na e sitio mes ku e doñonan.

Detenshon pa intento di asesinato

Riba djadumingu 31 di mart, alrededor di 11.35 or di mainta, a detené un hòmber di inisial G.G.G.P. di 21 aña di edat na warda di polis pa maltrato severo ku un arma i intento di asesinato. Durante un asistensia di un destrukshon na un kas situá na Kaya Pedro P. Silie, e sospechoso no a duna oido na òrdu di polis. A duna e sospechoso òrdu pa no bandoná e sitio i seguidamente el a dal un agente polisial ku outo i a kore bai. Ambulans a transportá e agente polisial pa hòspital pa tratamentu médiko. Algun ratu despues e sospechoso a presentá na warda di polis i a detené. Ta investigando e kaso.

Mondi na kandela

Alrededor di 12.50 or di mèrdia riba djasabra 30 di mart, ‘meldkamer’ sentral a risibí notifikashon tokante un kandela den bisendario di Bario Mexico. Na yegada di brantwer a konstatá ku tabata trata di un kandela grandi den un kunuku. Tabata trata di un kandela grandi di mondi den un kunuku ku tabata menasá di ekspandé. A pidi habitantenan den bisendario pa sera bentana ku porta debí na e desaroyo di huma. Doño di e kunuku a sòru pa un ‘loader’ pa basha tera pa yuda paga e kandela i minimalisá e huma.

Detenshon pa buracheria públiko

Riba djabièrnè 29 di mart, alrededor di 5 or di atardi, ‘meldkamer’ sentral a risibí notifikashon tokante un grupo di persona ku tabata bringa riba Kaya Korona. Na yegada e patruya a topa ku un grupo di hòmber, di kua dos tabata den diskushon ku otro. E agentenan a kore ku e grupo for di e plenchi. Un di e hòmbernan, ku tabata parse di ta bou di influensia di alkohòl, no tabata den estado pa para riba su pianan i e agentenan a hib’é kas. Algun ratu despues, alrededor di 6.45 or di anochi, ‘meldkamer’ sentral a bolbe haña notifikashon ku e hòmber ku e patruya a hiba kas algun ratu promé riba e dia, tabata enbolbí den un diskushon ku un grupo di hòmber na altura di un supermerkado riba Kaya Korona. Mirando ku e hòmber tabata bou di influensia fuerte di alkohòl i tabata kousa molèster atrobe, a detené pa buracheria públiko. Ta trata di un hòmber di inisial L.J.A.A. di 21 aña di edat.

Ladronisia di tayer di outo i tapa di wil

Riba djabièrnè 29 di mart a drenta keho di ladronisia di dos tayer di outo di ‘14 inch’ i kuater tapa di wil di un Hyundai Accent ku tabata stashoná riba un sitio di stashoná outo di un akomodashon turístiko riba Kaya Internashonal. Entre 11 or di anochi riba djaweps 28 di mart i 8 or di mainta riba djabièrnè 29 di mart, deskonosínan a bai ku e tayernan di outo i tapanan di wil. Ta investigando e kaso.

Polis ta pidi kualkier persona ku por a mira algu, a tende algu òf tin informashon relevante pa e investigashon, pa tuma kontakto ku polis na 715-8000 òf via di e liña di tep anónimo 9310.

Kòntròl di tráfiko

Riba djaweps 28 di mart, alrededor di 6 or di atardi, a tene un kòntròl di tráfiko riba Kaya Industria. Durante e kòntròl a para i kontrolá 15 vehíkulo i a duna 3 but. Un pa manehá seguro bálido i dos pa manehá sin reibeweis, di kua a tou un outo bai warda di polis kuné te na momentu ku e doño por mustra e dokumentonan konserní. Mas aleu a konfiská un machete.

KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla.

Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.

Wikènt di kamper a bai trankil

Di djaweps 28 di mart te ku djárason 3 di aprel tabata pèrmití pa kamper riba bichnan di Boneiru. Durante e periodo aki e kampamentu a kana relativamente trankil. Si tabatin algun notifikashon ku tabata rekerí asistensia di polis. Esakinan tabata entre otro notifikashon di molèster di zonido, estorbo den tráfiko i petishon pa intermediashon entre personanan ku a bai kamper.

Por konkluí pues ku e wikènt tabata unu trankil kaminda personanan ku ta bai kamper a laga mira atrobe ku huntu nos por sòru pa un periodo di kampamentu seif i dushi. Huntu nos ta karga e responsabilidat pa un isla seif.

Depositamentu di sushi ilegal

Riba djaweps 28 di mart, alrededor di 4.55 or di atardi, ‘meldkamer’ sentral a risibí notifikashon tokante un hòmber ku tabata benta sushi ilegal riba Kaya Bareta na altura di Kaya Parapeta. Na momento ku bisiñanan a bai atendé ku e hòmber riba su komportashon, el a bira agresivo. E persona ku a mèldu a duna deskripshon di e hòmber na kua e patruya por a señal’é. A duna e hòmber un bon skual i e patruya a bai huntu kuné na e sitio kaminda el a benta e sushinan pa e piki tur sushi.

Detenshon

Riba djárason 27 di mart, alrededor di 8.40 or di anochi, un hòmber a presentá na warda di polis relashoná ku e kaso ku a sosodé den oranan di anochi riba djamars 26 di mart, di kua un víktima ku herida di bala a presentá na hòspital. A detené e hòmber di inisial J.M.M.M. di 28 aña di edat na warda di polis en konekshon ku e kaso aki. E sospechoso tambe tabatin herida di bala i a haña tratamentu médiko. Investigashon den e kaso ta kontinuá.

Polis ta pidi kualkier persona ku por a mira algu, a tende algu òf tin informashon relevante pa e investigashon, pa tuma kontakto ku polis na 715-8000 òf via di e liña di tep anónimo 9310.