Notisia di polis di djárason 6 di mart te ku djabièrnè 8 di mart 2024
Kralendijk - But pa manehá di forma imprudente - Riba djabièrnè 8 di mart, alrededor di 3.50 or di mardugá, un patruya a spòt un vehíkulo ku tabata kore ku velosidat haltu den direkshon nort riba Kaya Korona. Esaki tabata motibu pa e patruya a bai tras di e vehíkulo. A sende e lusnan óptiko (zwaailicht) i señal di zonido pa para e shofùr. E shofùr tabata mustra un komportashon di manehá imprudente i tabata pasa diferente vehíkulo riba Kaya Korona. Debí na e velosidat haltu ku e shofùr tabata manehá, e agentenan a disidí di stòp ku e persekushon riba Kaminda Tras di Montaña. Algun ratu despues a topa ku e vehíkulo i e shofùr na un adrès den Rincon. E shofùr a haña un but pa manehá di forma imprudente.
Ladronisia di outo
Riba djaweps 7 di mart a drenta keho di ladronisia di un Toyota Tercel koló blanku, ku plachi di number B-4115. Entre 6 or di atardi riba djárason 6 di mart i 7 or di anochi riba djaweps 7 di mart, deskonosínan a bai ku e outo. E outo tabata stashoná dilanti di un kunuku na Kaminda México. Ta investigando e kaso.
Bo a mira e outo aki? Tuma kontakto ku polis via 911 òf 112 òf via di e liña di tep anónimo 9310.
Detenshon pa insulto
Riba djárason 6 di mart, alrededor di 7.30 or di anochi, a detené un mucha hòmber di inisial L.H.E.N. di 16 aña di edat pa insultá un ámtenar den funshon, pa intenshonalmente no kumpli ku òrdu di polis i pa resistí kontra su detenshon. Un agente polisial a spòt dos mucha hòmber ku tabata kore baiskel sin lus den ‘centrumgebied’ na Playa, i a bai atendé ku nan tokante esaki. Un di e muchanan a insultá e agente i a sigui kore bai. Despues di un persekushon kòrtiku, ku yudansa di mirónes, a para e sospechoso riba Kaya Jean B.F. Vitte na altura di un mini market i a detené.
Aksidente Kaminda Djabou
Riba djárason 6 di mart, alrededor di 2.30 or di atardi, ‘meldkamer’ sentral a risibí notifikashon tokante un aksidente riba Kaminda Djabou. Un outo a dal den un palu di lus i seguidamente a dal den kurá di un kas. Dor di e impakto, e palu di lus a kai riba e outo. Na yegada di patruya por a konstatá ku wayanan di koriente tabata kologá riba e outo. Pa motibu ku un pipa di awa tambe a kibra, awa tabata spùit riba e kabelnan di koriente. Komo ku e situashon no tabata seif pa tantu e víktima ku tabata den e vehíkulo ainda i tambe komo ku tabatin un kantidat di mirónes presente na e sitio, e agentenan a disidí pa hala tur hende for di den serkania di e sitio di e aksidente i sera esaki pa seguridat.
Na momentu ku e agentenan tabata atendé ku esaki, un grupo di mirónes a saka e víktima for di den e vehíkulo. E agentenan a atendé fuerte ku e personanan aki. Ambulans a transportá e víktima pa hòspital pa tratamentu médiko. Personal di WEB tambe a bini na e sitio pa kita koriente for di e palu di lus pa asina eliminá e peliger pa esnan presente.
Mas despues a resultá ku e víktima tabata pasahero di e outo i ku e shofùr a bandoná e sitio. Despues di un investigashon pa sa kousa di e aksidente, a resultá ku tres outo tabata kore ku velosidat haltu tras di otro. Pa motibunan ainda deskonosí, e shofùr di e último outo a pèrdè kòntròl i a okashoná e aksidente.
Kuerpo Polisial Hulanda Karibense ke hasi un apelashon an pueblo pa semper sigui òrdu di polis. Move un víktima òf mishi ku un víktima ku ku ta enbolbí den ki tipo di aksidente ku por ta, por tin konsekuensia fatal pa e víktima i konsekuensia hurídiko pa esun ku a hasi su mes kulpabel na esaki. Den kaso di un aksidente di tráfiko, laga personal di ambulans òf brantwer, saka e víktima for di den outo.
