Notisia di polis di djabièrnè 15 di novèmber te ku djaluna 18 di novèmber 2024

Outo ta dal den palu di lus

Den oranan di mainta, alrededor di 6’or, riba djaluna 18 di novèmber, un aksidente ku un outo a tuma lugá riba Kaya Korona. Pa motibu deskonosí un outo a kore bai dal den un palu di lus. Ningun hende tabata na e sitio ora ku e patruya a yega. Testigunan a deklará ku e tres okupantenan di e outo en kuestion, tur maskulino, a kita e plachi di number for di e outo despues di e choke i a bandoná e lokalidat na pia. E kaso ta bou di investigashon.

Kaso di tiroteo

Durante oranan di mardugá, alrededor di 1’or, riba djaluna 18 di novèmber, ‘meldkamer’ sentral a risibí notifikashon ku a tende tiru na Nort Saliña. Na yegada di polis a topa ku huls di bala. E kaso ta bou di investigashon.

KPCN ta hasi un yamada na tur persona ku a mira, tende òf tin informashon tokante e suseso aki pa tuma kontakto ku polis na 715 8000, 717 8000 òf via e liña di tep anónimo 9310.

Bo a mira algu sospechoso? Yama 717 8000 òf e liña di tep anónimo 9310.

Detenshon

Riba djadumingu 17 di novèmber alrededor di 11’or di anochi, a detené un hòmber di inisial L.J.A.A.  di 22 aña di edat pa enkubrimentu . A mira e sospechoso riba un skuter hòrta riba Kaya Bonaire, despues di kua a detené.

Kiebro den negoshi

Den oranan di mardugá di djadumingu 17 di novèmber a drenta keho di kiebro den un ‘sporthal’ situá  na Kaya Ramona. Aki tin un espasio kaminda ta almasená komestibel ku ta uza pa ‘Voedselbank’. Deskonosínan a forsa e lòk di e porta patras y a haña akseso na e lugá di almasená for di unda nan a bai ku diferente komestibel. E kaso ta bou di investigashon.

Destrukshon

Djadumingu 17 di novèmber a drenta keho di vandalismo. Riba e anochi di djadumingu 17 di novèmber un persona deskonosí a bora dos tayer di un pick-up ku tabata stashoná dilanti di un kas situá na Kaya Ruth. A kòrta un slan di mashin di laba paña tambe.

Den oranan di atardi di djadumingu 17 di novèmber, a drenta keho di vandalismo. Entre 12 or i 5 or di mardugá di djaluna 18 di novèmber, deskonosínan a kibra e winshil di un outo ku tabata stashoná den kurá di un kas situá na Kaya Hoba.

Tur dos kaso ta bou di investigashon.

Ladronisia di skuter
Den oranan di mainta di djadumingu 17 di novèmber a drenta keho di ladronisia di un skuter pretu, modelo Sym, numerá MF-452. Un kompania di skuter tabata transportá skuter for di Kaya Grandi pa nan depósito na Kaya Jean B.F. Vitte. E skuter tabata stashoná riba kaminda públiko i no tabata na lòk na momento ku deskonosínan a bai kuné.

Djasabra 16 di novèmber a drenta keho di ladronisia di un skuter shinishi/plata di marka Kymco, modelo Agility numerá MF-3362. E skuter tabata stashoná na un establesimentu di horéka situá na Bulevar Gobernador N. Debrot. Entre 12 or di mèrdia  i 8 or di anochi, deskonosínan a bai ku e skuter.

Djasabra 16 di novèmber a drenta keho di ladronisia di un skuter maron metallic di marka Kymco, modelo Agility, numerá MF-1639. E skuter tabata stashoná pafó di un akomodashon turístiko riba Bulevar Gobernador N. Debrot, ku un lòk di stür i un lòk di kadena. Entre 6.45 or i 11 or di anochi deskonosínan a bai ku e skuter.

E kasonan ta bou di investigashon.

Insidente di tiramentu
Djadumingu 17 di novèmber alrededor di 3 or di mardugá, ‘meldkamer’ sentral a risibí notifikashon tokante un posibel kaso di tiramentu ku a tuma lugá na altura di Mamparia Kutu. Na yegada na e sitio, patruyanan a haña vários huls di bala di arma di kandela. Un kas i dos outo tabatin perforashon di bala. A konfiská e dos outonan pa investigashon mas aleu. Investigashon den e kaso ta andando.

KPCN ta pidi tur persona ku a mira, tende òf tin informashon tokante e suseso aki pa tuma kontakto ku polis na 715 8000, 717 8000 òf via e liña di tep anónimo 9310.

Aksidente Bulevar E.E.G.
Den oranan di mardugá di 16 di novèmber, alrededor di 4.15 or, un aksidente ku un outo a tuma lugá riba e Bulevar E.E.G. den besindario di Punt Vierkant. Pa motibu deskonosí un pikòp ku tabata bayendo den direkshon di Playa a kore dal den un palu. Ambulans a transportá e shofùr femenino di e pikòp pa hospital pa tratamentu médiko. Konforme e maneho ‘botsen is blazen’, a hasi un tèst di supla ku e shofùr ku resultado negativo.

Hit & Run
Den oranan di atardi di 16 di novèmber, alrededor di 4 or, un hit & run a tuma lugá riba Kaya Grandi, na altura di e krusada ku Kaya Aruba. Un bròmer a bai dal patras di un outo ku a wanta brek debí ku e outo su dilanti a para. Despues e bròmer a bai dal den banda robes di un outo stashoná i despues a siguí kore bai. Investigashon den e kaso ta andando.

Ultimo tempu mas i mas kaso di ‘hit & run’ ta tuma lugá. Bo ta víktima di un kaso di ‘hit & run’? Purba identifiká plachi di number di e vehíkulo, e tipo di vehíkulo, koló di vehíkulo i e posibel shofùr. Mèldu esaki mesora na polis.

E persona ku a kometé e akto aki i kore bai, tin 3 ora pa mèldu su mes na warda di polis. Si dentro di 3 ora e no mèldu, e víktima por entregá keho pa violashon di artíkulo 31 di e buki di ‘Wegensverkeersverordening Bonaire’. E ora ei, polis ta kuminsá ku un investigashon ku por yega na konsekuensianan penal.

Bo a mira algu òf bo tin mas informashon tokante e ‘hit & run’ aki? E ora ei tuma kontakto ku polis via 715 8000, 911 òf via e liña di tep anónimo 9310.

Ladronisia for di outo
Djabièrnè 15 di novèmber a drenta keho di ladronisia for di un outo. E outo tabata stashoná den un sitio di stashoná di un negoshi situá na Kaminda di Lagun. Entre 8 or i 10.15 or di mainta, deskonosínan a bai ku e lus di dilanti na banda robes i e plachi di number na e parti dilanti di e outo. E kaso ta bou di investigashon.