Notisia di polis di djabièrnè 22 di novèmber te ku djaluna 25 di novèmber 2024
Kralendijk - Detenshon pa enkubrimentu - Djaluna 25 di novèmber, alrededor di 1.05 or di mardugá, a detené un hòmber di inisial S.D.L.A. di 29 aña di edat riba Kaminda Djabou pa enkubrimentu. Un patruya ku tabata kore riba Kaya J.N.E. Craane, a nota un skuter ku tabata bini for di Kaya Bonaire den direkshon prohibí. E agentenan a purba hala atenshon di e shofùr dor di duna seña ku e lusnan di dilanti di e vehíkulo polisial, pero el a neglishá esaki. Na momentu ku e skuter a pasa bai, e agentenan a grita e shofùr ku e mester para. E shofùr a neglishá nan i a siguí kore bai den direkshon prohibí. E patruya mesora a bai buska e skuter i a mira esaki tabata kore riba Kaya Carlos A. Nicolaas. Riba Kaminda Djabou a duna e shofùr òrdu ku lusnan óptiko i señal di zonido pa para. Na esaki si e shofùr a kumpli i a para e skuter. Despues di investigashon mas aleu e shofùr a entregá un reibeweis inbálido na e agentenan i no por a mustra un prueba di seguro na e sitio. E agentenan a konstatá tambe ku e plachi di number riba e skuter tabata falsifiká i e suich tabata borá. Tampoko no por a lesa e number di chasis. A detené e sospechoso i a konfiská e skuter pa mas investigashon.
Atrakonan ku arma di kandela
Djadumingu 24 di novèmber, alrededor di 7.50 or di anochi, ‘meldkamer’ sentral a risibí notifikashon tokante un atrako armá ku a tuma lugá na un supermerkado na Kaya Sonmontuno. Dos hòmber bistí ful na pretu ku kara tapá, i ku arma di kandela a drenta e supermerkado i bou di menasa a eksigí e personal sèn. Nan a kue sèn kèsh for di e kaha i a hui bai na pia den direkshon nort riba Kaya Sonmontuno.
Djabièrnè 22 di novèmber, alrededor di 11.30 or di anochi, ‘meldkamer’ sentral a risibí notifikashon tokante un atrako armá pafó di un kas na Kaya Deseado. Dos hòmber bistí ful na pretu ku kara tapá i ku arma di kandela, a menasá un mucha hòmber di 17 aña ku tabata riba un skuter bou di un palu, pa entregá e skuter. E hóben a baha for di e skuter i a kore bai paden di e kas pa informá e otronan di loke a sosodé. Na momentu ku e doño di e skuter a sali pafó, a menasá e tambe. E sospechosonan a bai ku e skuter den direkshon di Kaya Tapajos. Ta trata di un skuter koló pretu di e marka Gilera, modèl Runner, ku plachi di number MF-3915.
Polis ta hasi un yamada na un i tur ku por a mira, a tende òf ku tin informashon relevante tokante e kasonan di atrako armá aki, ku por sigui yuda e investigashon, pa tuma kontakto ku polis via 715 8000 òf via di e number di tep anónimo 9310.
Ladronisia na bich
Djadumingu 24 di novèmber a drenta keho di ladronisia na Te Amo Beach, situá na Kaya Internashonal. Entre 3.05 or di atardi i 3.15 or di atardi riba e fecha menshoná, deskonosínan a bai ku un tas di lomba koló blou, shinishi i blanku, ku tabata banda di un stul, miéntras e doño tabata landa. Den e tas tabatin entre otro yabinan i sèn kèsh. Ta investigando e kaso.
Ladronisia
Djadumingu 24 di novèmber a drenta keho di ladronisia na un establesimentu di hóreka ku ta den konstrukshon na Kaya Nikiboko Nort. Deskonosínan a destruí parti patras di un kasita di baño i a bai ku un bentana di drai koló pretu. Ta investigando e kaso.
Insidente
Djasabra 23 di novèmber, alrededor di 7.15 or di anochi, ‘meldkamer’ sentral a risibí notifikashon tokante un persona ku a kai for di su skuter riba E.E.G. Bulevar. Pa e motibu aki e shofùr a resultá heridá na su kabes. Na yegada di polis nan a topa ku un dama heridá. Un testigu a deklará ku e víktima kier a baha for di kaya ku su skuter pa bai den direkshon di e bich, pero dor di burakunan hundu kantu di e kaminda, a pone ku el a kai ku e skuter. Ambulans a transportá e dama pa hòspital pa tratamentu médiko.
A hiba skuter sin ningun dokumentu warda di polis
Djasabra 23 di novèmber, alrededor di 5.10 or di atardi, un polis di bario a nota un skuter sin plachi di number i e shofùr sin hèlm bistí na e rotònde di Kaya Nikiboko Sùit i Kaya Industria. E agente a siguí e skuter i a mira esaki a para na un establesimentu di hóreka riba Kaya Andres A. Emerenciana. Despues di investigashon mas aleu, e shofùr no por a mustra ningun dokumentu bálido, manera un prueba di identifikashon, un reibeweis òf dokumentunan di seguro. Na momentu ku e agente a puntr’é pa su adrès, e shofùr por a indiká solamente ku e ta biba den besindario. A tou e skuter hiba warda di polis.
Aksidente ku detenshon pa manehá bou di influensia
Djabièrnè 22 di novèmber, alrededor di 6.15 or di atardi, un aksidente entre un outo i un skuter a tuma lugá riba E.E.G. Bulevar. Na yegada di polis por a konstatá ku tabatin un skuter na suela i ku e skuter a dal den un SUV. Banda di e skuter tabatin e shofùr drumí ku tabata gravemente heridá. E shofùr di e outo a deklará ku el a bai lora na su man robes i diripiente el a tende un sla fuerte kontra su vehíkulo. E no a mira ku e skuter tabata aserkando den direkshon kontrali. Konforme e maneho ‘botsen is blazen’, a hasi un tèst di supla ku shofùr di e outo i a resultá ku el a konsumí mas alkohòl ku ta permití ora ta manehá un vehíkulo. Seguidamente a detené e hòmber di inisial R.S.B. di 63 aña di edat i a hib’é warda di polis pa un análisis di rosea. A konsekuensia di e resultado di esaki a konfiská su reibeweis.
A lòs tiru i detenshon
Djabièrnè 22 di novèmber, alrededor di 5.30 or di atardi, ‘meldkamer’ sentral a risibí notifikashon tokante un insidente ku tiramentu ku a tuma lugá na un establesimentu di hóreka na Kaya Macario (Cai) Sint Jago den bario Wanapa. Un sospechoso a menasá un hòmber ku un arma di kandela na su kabes, despues di kua e sospechoso a lòs tiru den laira i a kore bai. No tabatin herido.
Djasabra 23 di novèmber, alrededor di 4.15 or di atardi, e sospechoso ku tabata enbolbí den e kaso di tiroteo aki, a entregá su mes na warda di polis. Ta trata di un hòmber di inisial Q.B.d.P. di 19 aña di edat. Investigashon den e kaso ta kontinuá.
