Notisia di polis di djabièrnè 29 di novèmber te ku djaluna 2 di desèmber 2024
Kralendijk - Detenshon pa intento di kiebro den kas - Djaluna 2 di desèmber, alrededor di 4.55 or di mardugá, a detené un hòmber di inisial J.S.L. di 27 aña na Kaya Tuba pa intento di kiebro den kas.
Mas trempan durante e mardugá ei, e hòmber a purba haña akseso na e kas via di un bentana di kamber. E habitante di e kas a spièrta dor di e zonido i a mira un hòmber pará na su bentana den kurá. El a kuminsá grita pa yudansa despues di kua e hòmber mesora a hui. E habitante a rekonosé e hòmber komo e mesun persona ku tabata den su kas sin pèrmit na sèptèmber.
Miéntras e agentenan tabata den kombersashon ku e habitante, nan a mira un persona un tiki mas leu pará den e kaya. Nan a aserk’é mesora, pero e hòmber a kana drenta un kurá. Durante e kombersashon ku e hòmber aki el a deklará ku el a mira polis den e kaya i p’esei el a sali pafó pa wak kiko ta pasando. Na momentu ku e agentenan a kompará e deskripshon di e persona ku a purba kometé e kiebro ku esun di e hòmber ku nan a kaba di atendé kuné, nan a konkluí ku tabata trata di e mesun persona. Nan a bai bèk na e kas i a konfrontá e hòmber. E habitante a rekonosé e hòmber mesora.
A base di e echonan aki a detené e hòmber i a hib’é warda di polis pa mas investigashon.
Aksidente entre dos vehíkulo
Djasabra 30 di novèmber, alrededor di 12 or di mèrdia, ‘meldkamer’ sentral a risibí notifikashon tokante un aksidente entre dos vehíkulo riba Kaminda Gurubu. Na yegada di polis a konstatá ku un pikòp i un outo a dal den otro. Investigashon mas aleu a mustra ku e outo tabata kore direkshon Playa i e pikòp direkshon Rincon. Un outo ku tambe tabata kore den direkshon di Playa, dilanti e outo enbolbí, a wanta brek diripiente. Pa e motibu aki e outo enbolbí a slep i a bai dal den e pikòp ku tabata aserkando. Dor di e impakto e pikòp a bai resultá parsialmente den mondi.
Personal di ambulans a hasi un chekeo médiko ku esnan enbolbí, pero nan no mester a bai hòspital. Konforme e maneho ‘botsen is blazen’, a hasi un tèst di supla ku ámbos shofùr, ku un resultado negativo. Dokumentunan di ámbos vehíkulo tabata na òrdu i ‘takelwagen’ a tou e vehíkulonan for di e sitio.
Detenshon pa manehá bou di influensia
Djasabra 30 di novèmber, alrededor di 3.25 or di mardugá, a detené un hòmber di inisial K.M.R. di 36 aña di edat riba Kaya Carlos A. Nicolaas pa manehá bou di influensia di alkohòl. Un patruya ku tabata kore riba Kaya Grandi, a nota un pikòp ku tabata bini for di direkshon kontrali ku diripiente a bai riba e banda robes di kaminda i bini den nan direkshon. E patruya mester a desviá i hala na kantu di kaminda pa evitá un aksidente ku e vehíkulo menshoná.
E vehíkulo a sigui kore den direkshon di Kaya Carlos A. Nicolaas dor di kua pa motibu di e komportashon di manehá peligroso i imprudente di e shofùr, e patruya a disidí di bai tras di e vehíkulo menshoná pa hasi un kòntròl. A duna e shofùr òrdu pa para ku lusnan óptiko i señal di zonido di kua e shofùr a kumpli. Durante e kombersashon ku e shofùr e tabata mustra diferente karakterístika di un persona ku ta bou di influensia di alkohòl.
A hasi un tèst di supla kuné i a resultá ku el a konsumí mas alkohòl ku ta permití na momentu ku bo ta manehá un vehíkulo. Seguidamente a hib’é warda di polis pa un análisis di rosea. A konsekuensia di e resultado di esaki, pa di dos biaha a konfiská su reibeweis.
Ladronisia di skuter
Djabièrnè 29 di novèmber a drenta keho di ladronisia di un skuter koló pretu di e marka AKT, ku plachi di number MF-2206. Entre 7.30 or di anochi i 8.15 or di anochi riba e fecha menshoná, deskonosínan a bai ku e skuter. E skuter tabata stashoná riba un sitio di stashoná na un establesimentu di hóreka na Kaya Nikiboko Sùit. Ta investigando e kaso.
Ladronisia
Djabièrnè 29 di novèmber a drenta keho di ladronisia di un telefòn selular di e marka iPhone modèl 13. E doño, kende a publiká riba ‘facebook’ ku e ta bende e telefòn, a topa ku un supuesto kumpradó den un outo na e plenchi na Mentor pa mira i kumpra e telefòn. Pa e motibu aki e doño a entregá e telefòn na e supuesto kumpradó. Miéntras ku e sospechoso tabata wak e telefòn, el a kuminsá kore bai. Na e momentu ei, e doño a purba habri e porta di e outo, pero esaki tabata na lòk. E doño no a logra habri e porta di e outo via di e bentana di outo tampoko, despues di kua e outo a kuminsá kore mas duru miéntras e doño su man tabata den e outo ainda. Pa e motibu aki e doño a kai na suela i a resultá heridá. Ta investigando e kaso.
Bo a mira òf tende algu, ku por yuda e investigashon mas aleu? Bo por mèldu esaki via 715 8000 òf anónimo via e number di tep anónimo 9310.
