Notisia di polis di djárason 13 di novèmber te ku djabièrnè 15 di novèmber 2024
Kralendijk - Detenshon pa destrukshon i maltrato - Djabièrnè 15 di novèmber, alrededor di 8.35 or di mainta, a detené un hòmber di inisial G.A.B. di 25 aña di edat riba Kaya Nikiboko Nort pa destrukshon i maltrato. E sospechoso a destruí un outo i a maltratá un dama. Ta investigando e kaso.
A konfiská skuter probablemente prosedente di ladronisia
Djabièrnè 15 di novèmber, alrededor di 1.30 or di mardugá, un patruya ku tabata kore riba Bulevar Julio A. Abraham, a nota dos skuter ku a sali for di un akomodashon turístiko i subi kaminda. Riba ámbos skuter tabatin dos persona. Niun di e personanan no tabatin un hèlm bistí. Ademas un di e skuternan no tabatin plachi di number. Pa e motibu aki e agentenan a sende e lusnan óptiko (zwaailicht) pa para e shofùrnan, pero nan a neglishá e òrdu pa para i a lora na man robes, den direkshon prohibí riba Kaya C.E.B. Hellmund. E patruya a sigui kore tras di e skuternan, pero e shofùrnan a keda sin duna oido un biaha mas na e òrdu pa para i a purba kore bai. Na dado momentu, dos di e personanan a laga nan skuter kai i a kore bai na pia den direkshon di Bulevar Julio A. Abraham. E otro dos personanan a kore bai riba nan skuter. E agentenan a konstatá ku e skuter ku a laga keda tras, su suich tabata kibrá i ta probablemente prosedente di ladronisia. A konfiská esaki i a hib’é warda di polis pa investigashon mas aleu.
Ladronisia di plachi di number
Djaweps 14 di novèmber a drenta keho di ladronisia di un plachi di number ku tabata pegá parti dilanti di un pikòp di hür. E pikòp tabata stashoná na Kaya C.E.B. Hellmund. Deskonosínan a lòs e plachi di number V-7604 i a bai kuné. Ta investigando e kaso.
Ladronisia di skuter
Djárason 13 di novèmber a drenta keho di ladronisia di un skuter pretu di marka Kymco, modèl Sento ku plachi di number MF-3482. Entre 10 or di anochi riba djamars 12 di novèmber i 10.30 or di mainta riba djárason 13 di novèmber, deskonosínan a bai ku e skuter. E skuter tabata stashoná, ku un lòk di stür, na un kas na Kaya Utrecht. Ta investigando e kaso.
