Notisia di polis di djárason 20 di novèmber te ku djabièrnè 22 di novèmber 2024
Kralendijk - A topa ku skuternan prosedente di ladronisia - Djaweps 21 di novèmber, alrededor di 3.45 or di atardi, ‘meldkamer’ sentral a risibí notifikashon ku a kaba di hòrta un skuter na Kaya L.D. Gerharts. Algu despues despues, e persona ku a mèldu a bolbe yama i bisa ku durante di un búskeda den besindario, el a bin topa ku dos skuter ku probablemente ta prosedente di ladronisia, riba un tereno habrí na Kaya General C.M. Piar.
Na yegada di polis a resultá ku un di e skuternan no tabatin plachi di number. E otro skuter, ku tabata bou di un matras, a resultá di ta e skuter ku algun ratu promé a hòrta na Kaya L.D. Gerharts. E doño di e skuter tambe a bini na e sitio i mesora a rekonosé su skuter. E skuter aki tabata intakto i e doño a bai ku esaki. A konfiská e skuter sin plachi di number pa mas investigashon.
E siguiente mainta, alrededor di 9 or riba djabièrnè 22 di novèmber, ‘meldkamer’ sentral a risibí notifikashon ku a bolbe topa ku un skuter, tambe probablemente prosedente di ladronisia, na e mesun sitio. E skuter aki tabata falta algun piesa i tabatin un tas ku ekiponan di sambuyá banda di dje. A konfiská e skuter aki i e artíkulonan hañá pa mas investigashon.
Entradanan hudisial ku detenshon
En konekshon ku e kasonan di tiroteo di último tempu, den oranan di mèrdia di djaweps 21 di novèmber, reshèrshinan di Kuerpo Polisial Hulanda Karibense a tene dos entrada hudisial. E entradanan hudisial a tuma lugá den kamber di un akomodashon turístiko situá na Kaya Internashonal i e otro den un kunuku situá na Nieuw Amsterdam.
E entradanan tabata en konekshon ku violashon di Lei di Arma di Kandela BES. Durante di e entrada hudisial na e akomodashon turístiko, e Grupo di Tarea Spesial (Groep Bijzondere Opdrachten, GBO) a detené un hòmber di inisial S.C.W.R. di 30 aña di edat. Tambe a konfiská algun artíkulo ku ta relevante pa e investigashon. Investigashon ta kontinuá den ful swing.
