Notisia di polis di djárason 27 di novèmber te ku djabièrnè 29 di novèmber 2025
Kralendijk - Detenshonnan pa manehá bou di influensia - Djabièrnè 29 di novèmber, alrededor di 3.15 or di mardugá a detené un hòmber di inisial C.P.G. di 52 aña di edat na Kaya Piedra Presioso pa manehá bou di influensia di alkohòl. E detenshon a tuma lugá despues ku ‘meldkamer’ sentral a risibí notifikashon tokante un vehíkulo ku tabata stashoná riba banda robes di kaminda riba e kaya menshoná. Na yegada di polis por a konstatá ku en bèrdat e outo tabata stashoná riba e banda robes di kaminda nèt den un bògt loke ku tabata hasi e situashon pa e tráfiko ku ta bin di direkshon kontrali, peligroso. Ademas e shofùr tabata mustra diferente karakterístika di un persona ku ta bou di influensia di alkohòl. A hasi un tèst di supla kuné for di kua a resultá ku el a konsumí mas alkohòl ku ta permití. Seguidamente a bai kuné warda di polis kaminda hasi un análisis di rosea. En konekshon di e resultado di esaki el a haña prohibishon di manehá pa 5 ora i a konfiská su yabi di outo te ora e prohibishon di manehá vense.
Djabièrnè 29 di novèmber, alrededor di 12.10 or di mardugá, a detené un hòmber di inisial P.C.B. di 55 aña di edat na Kaya J.N.E. Craane pa manehá bou di influensia di alkohòl. E detenshon a tuma lugá despues ku e sospechoso kasi a kousa un aksidente ora e tabata bèk. Na momentu ku un agente a bai atendé kuné tokante esaki, el a kore bai ku e vehíkulo dilanti i a subi asera parsialmente. Durante di e kombersashon, e tabata mustra vários karakterístika di un persona ku ta bou di influensia di alkohòl. E hasi un tèst di supla kuné for di kua a resultá ku el a konsumí mas alkohòl ku ta permití. A bai kuné warda di polis kaminda a hasi un análisis di rosea. A konsekuensia di e resultado di esaki a dun’é un prohibishon di manehá pa 1 ora.
Aksidente entre tres vehíkulo
Djaweps 28 novèmber, alrededor di 7.30 or di mainta, un aksidente a tuma lugá riba Kaya Korona kaminda tabatin tres vehíkulo enbolbí. Motibu di e aksidente tabata dor ku un di e shofùr nan no a paga tinu i a dal den e outo su dilanti dor di kua e outo ku el a dal su tras na su turno tambe a bai dal den e outo su dilanti. Komo ku tabatin un menor di edat ku tabata keha di doló den un di e outonan enbolbí, personal di ambulans a hasi chekeo médiko kuné na e sitio mes. E no mester a bai hòspital. Segun e maneho di ‘botsen is blazen’ a kontrolá tur shofùr enbolbí riba uzo di alkohòl dor di un tèst di supla. Resultado di e tèstnan di supla tabata negativo. Polis a regla tráfiko temporalmente.
Detenshon pa maltrato
Djárason 27 di novèmber, alrededor di 11 or di anochi, a detené un hòmber di inisial M.A.A.V. di 64 aña di edat na Kaya Aurora pa maltrato. Ta investigando e kaso.
A konfiská skuter hòrtá
Djárason 27 di novèmber, alrededor di 11.15 di mainta, un patruya ku tabata kore riba Kaminda Djabou a nota un skuter riba kua tabatin dos persona sin hèlm. E agentenan a rekonosé e shofùr mesora. E skuter a lora na su man drechi i subi Kaya Patachi, despues di kua e pasahero di e skuter a baha for di esaki i a kore bai. A duna e shofùr di e skuter señal pa para despues di kua el a para e skuter. Durante di kòntròl e shofùr no por a mustra un reibeweis bálido i dokumentunan di seguro bálido. El a deklará ku e no tin reibeweis ni seguro. Sí el a entregá e agentenan su pasport. Despues di investigashon mas aleu a resultá ku e skuter ta hòrtá. Na momentu ku a konfrontá e shofùr ku esaki i ku e ta keda detené, el a hui bai na pia i a pèrdè for di bista. A konfiská e skuter pa mas investigashon.
