Notisia di polis di djabièrnè 31 di yanüari te ku djaluna 3 di febrüari 2025
Kralendijk - Tiroteo ku herido - Djadumingu 2 di febrüari, alrededor 7.35 or di anochi, 'meldkamer' sentral a risibí notifikashon tokante un kaso di tiroteo na altura di Kaya Grandi i Kaya L.D. Gerharts. A lòs tiru for di un arma di kandela riba un outo ku tabata pasando riba e kaya menshoná. E shofùr a resultá heridá i e mes a bai hòspital pa tratamentu médiko. E tabata konsiente. E departamentu di Investigashon Forénsiko (FO) a hasi investigashon na e sitio. A konfiská outo di e víktima pa mas investigashon. KPCN ta pidi un i tur ku por a mira algu di e suseso, a tende òf sa algu, pa tuma kontakto ku polis na 715 8000, 717 8000 òf via e liña di tep anónimo 9310.
Kiebro na akomodashon turístiko
Djadumingu 2 di febrüari a drenta keho di kiebro den un akomodashon turístiko na Bulevar Julio A. Abraham. Entre 7 or di anochi i 9 or di anochi, deskonosínan a haña akseso na e apartamentu i a bai ku un kaha di kosmétika koló kòrá ku kontenido, diferente tarheta, dos ‘headphone MX4’ koló pretu di e marka Sony, un Airpod koló blanku di e marka Apple, un MacBook Air M2, un drone DJI Mini PRO 4 den un tas pretu i un tas koló blou/bèrdè di e marka Eastpack ku komo kontenido un Macbook Pro koló pretu, yabinan i un djèket koló pretu di e marka UNIQLO. Ta investigando e kaso.
Kaso di maltrato
Djabièrnè 31 di yanüari, alrededor di 10.40 or di anochi, ‘meldkamer’ sentral a risibí notifikashon tokante un kaso di maltrato ku a tuma lugá na e stadion situá na Kaya Bototé den Rincon. Durante un partido di futbòl, un hungadó lo mester a agredí un rèfri. E víktima e resultá heridá i a transport’é pa hòspital pa tratamentu médiko. Na yegada di polis, e sospechoso ya a banda e sitio. Ta investigando e kaso.
Atrako na Altamira Unjo
Djabièrnè 31 di yanüari, a mèldu un kaso di atrako ku a tuma lugá na Altamira Unjo den Rincon. Un hòmber deskonosí a atraká un turísta i a bai ku entre otro sèn kèsh, un reibeweis i un tarheta di barku. Despues di a atraká e víktima, e hòmber deskonosí a hui kore drenta mondi. E situashon tin atenshon di polis.
