Notisia di polis di djabièrnè 24 di yanüari te ku djabièrnè 31 di yanüari 2025

Ladronisianan di skuter

Den e último dianan a mèldu kuater kaso di ladronisia di skuter na polis, di kua tres a entregá un keho. Djaweps 30 di yanüari a drenta keho di ladronisia di un skuter koló shinishi di marka Sym, modèl Orbit 2 ku plachi di number MF-3131. Entre 12 or di mardugá i 6.30 or di mainta riba e fecha menshoná, deskonosínan a bai ku e skuter. E skuter tabata stashoná ku un lòk di stür den kurá di un kas na Kaya Maria. Ta investigando e kaso.

Djaluna 27 di yanüari a drenta keho di ladronisia di un skuter koló pretu di e marka Sym, modèl Fiddle2 ku plachi di number MF-4202. Entre 8 or di anochi riba djadumingu 26 di yanüari i 12.15 or di mèrdia riba djaluna 27 di yanüari, deskonosínan a bai ku e skuter. E skuter tabata stashoná na lòk pafó di un kurá di un apartamentu na Kaya Nikiboko Nort. Ta investigando e kaso.

Djaluna 27 di yanüari a drenta keho di ladronisia di un skuter koló shinishi skur di marka Kymco, modèl Agility, ku plachi di number MF-4211. Entre 12.15 or di mardugá i 3.30 or di mardugá di djadumingu 26 di yanüari, deskonosínan a bai ku e skuter. E skuter tabata stashoná ku un lòk di stür dilanti di un kas na Kaya Adela. Ta investigando e kaso.

Detenshonnan pa manehá bou di influensia

Djárason 29 di yanüari, alrededor di 8.15 or di anochi, a detené un hòmber di inisial E.S.W. di 67 aña di edat riba Bulevar Gobernador Nicolaas Debrot pa manehá bou di influensia di alkohòl. E detenshon a tuma lugá despues ku ‘meldkamer’ sentral a risibí notifikashon tokante un outo ku a dal den un pikòp i seguidamente a kore bai. E shofùr di e pikòp a sigui e outo i a blòkia esaki riba un sitio di stashoná di un parke riba e kaya menshoná, despues di kua polis a yega. E agentenan ku a bini na e sitio a konstatá ku e shofùr di e outo tabata mustra diferente karakterístika di un persona ku ta bou di influensia di alkohòl. E por a mustra un reibeweis bálido pero no un prueba di seguro. A hasi un tèst di supla kuné ku tabata mustra ku el a konsumí mas alkohòl ku ta permití na momentu ku bo ta manehá un vehíkulo. A detené i a hib’é warda di polis pa un análisis di rosea. A konsekuensia di e resultado di esaki a konfiská su reibeweis.

Djasabra 25 di yanüari, alrededor di 01.45 or di mardugá, un aksidente entre un outo i un pikòp a tuma lugá riba un sitio di stashoná di un akomodashon turístiko na Bulevar Julio A. Abraham. Segun e persona ku a mèldu, e kontra partido kier a kore bai. Na yegada di polis, konforme e maneho di ‘botsen is blazen’, a hasi un tèst di supla ku ámbos shofùr enbolbí i a resultá ku unu a konsumí mas alkohòl ku ta permití na momentu ku bo ta manehá un vehíkulo. A detené e dama di inisial C.P.d.J. di 56 aña di edat pa manehá bou di influensia di alkohòl. A konsekuensia di e resultado di esaki el a haña un prohibishon di manehá di 5 ora.

Detenshonnan pa violashon di Lei di Arma di Kandela

Den oranan di mainta riba djárason 29 di yanüari, e 'Groep Bijzondere Opdrachten' (GBO) i Tim di Aresto a tene un akshon.

Durante di e akshon tabatin dos detenshon i dos entrada hudisial.

E promé detenshon tabata en konekshon ku e investigashon di e kasonan di tiroteo ku a tuma lugá últimamente. A detené un hòmber di inisial S.R.A.V. di 28 di edat pa violashon di Lei di Arma di Kandela BES. En konekshon ku e detenshon aki a tene un entrada hudisial na un kas situá na Kaya Konfó. Aki a konfiská un arma di kandela.

E di dos detenshon ta en konekshon ku e promé akshon di listramentu preventivo kaminda a konfiská un arma di kandela. A detené un hòmber di inisial J.L.N.T.D. di 23 aña di edat pa violashon di Lei di Arma di Kandela BES. En konekshon ku e detenshon aki a tene un entrada hudisial na un kas situá na Kaya Mandolin.

Investigashon den ámbos kaso ta kontinuá.

Pikòp a bòltu

Djamars 28 di yanüari, alrededor di 3 or di atardi, ‘meldkamer’ sentral a risibí notifikashon tokante un aksidente riba Kaminda Gurubu. Un pikòp a bòltu i a bai resultá den labadó, di kua e vehíkulo a risibí hopi daño. E shofùr a resultá heridá i a keda pegá den e vehíkulo. Brantwer a bin na e sitio pa saka e víktima for di e vehíkulo, despues di kua ambulans a transport’é pa hòspital pa tratamentu médiko. Tambe a konstatá ku dor di un ‘lekkage’, tabatin gasolin paden i rondó di e pikòp. Kousa di e aksidente no ta konosí.

Ladronisia for di bich

Djaluna 27 di yanüari a drenta keho di ladronisia di un tas di bich koló maron for di Playa Pal’i Mangel (Donkey’s Beach) situá na Bulevar E.E.G. Alrededor di 3.30 or di atardi, deskonosínan a bai ku e tas miéntras e doñonan tabata snòrkel. Den e tas tabatin entre otro, un ‘iPhone SE’ koló pretu, un brel di solo di marka Polaroid, paña, ‘make-up’ i yabi di kas. Ta investigando e kaso.

Detenshon pa menasa i violashon di Lei di Arma

Djaluna 27 di yanüari, alrededor di 4.35 or di atardi, a detené un hòmber di inisial J.F.R.F. di 41 aña di edat pa menasa i violashon di Lei di Arma BES. E detenshon a tuma lugá despues ku ‘meldkamer’ sentral a risibí notifikashon tokante un hòmber ku tabata kana zuai ku un kuchú riba kaya den Rincon.

Na yegada di polis a topa ku e hòmber dilanti di un bar na Bulevar Miguel Pourier. E agentenan a mira ku e hòmber tabatin un kuchú den rant di su karson. Na momentu ku e agentenan kier a aserká e hòmber, e no a duna oido i a kuminsá grita. Na dado momentu e hòmber a saka e kuchú for di su rant di karson i a pone esaki na suela. Despues e hòmber a bira i a kuminsá grita i kana bai. A dun’é òrdu pa keda pará, pero e no a duna oido na esaki. E agentenan a tené na su skouder, despues di kua el a kuminsá resistí, lòs su mes i a kuminsá kore bai. Despues di esaki, e hòmber a trompeká riba su mesun pianan, di kua e agentenan a ha؜ña e chèns pa pone na suela i detené. Durante transport’é e sospechoso a menasá un agente diferente biaha.

Ademas a duna keho di menasa. Mas trempan riba e mesun dia, e sospechoso a nenga di paga na un supermerkado riba Kaya Commerce na Rincon i despues a menasá un kahera ku un kuchú. Ta investigando e kaso.

Diferente notifikashon di ladronisia na Altamira Unjo

Djaluna 27 di yanüari a drenta dos keho tokante ladronisia for di un gòlfkar na Altamira Unjo na Rincon. Miéntras e okupantenan tabata saka potrèt, deskonosínan a bai ku sèn kèsh for di nan tasnan ku a keda den e gòlfkar. Ta investigando e kaso.

Djabièrnè 24 di yanüari a drenta keho di ladronisia for di un pikòp na Altamira Unjo na Rincon. Miéntras e okupantenan tabata saka potrèt, un hòmber deskonosí a bai ku un pèchi di e marka ‘Under Armour’ i un tenedó di tarheta ku sèn kèsh den dje for di un tas di bich ku a keda den e vehíkulo. Na momentu ku e hòmber deskonosí a mira ku e okupantenan tabata bini bèk na e vehíkulo, el a kore drenta mondi i pèrdè. Ta investigando e kaso.

Aksidente Kaya Avelino J. (Abechi) Cecilia

Djaluna 27 di yanüari, alrededor di 2.15 or di atardi, ‘meldkamer’ sentral a risibí notifikashon tokante un aksidente riba Kaya Avelino J. (Abechi) Cecilia. Un outo a drenta mondi, di kua e pasaheronan a keda pegá. Brantwer a bin na e sitio pa saka e víktimanan for di e vehíkulo, despues di kua personal di ambulans a hasi un chekeo médiko ku ámbos. Niun di dos no a sufri leshon i no mester a bai hòspital, pero nan tabata hopi spantá. E shofùr a deklará ku durante ku e tabata manehá, diripiente el a haña un kram na su pia. Na momentu ku e kier a primi brek, aksidentalmente el a primi riba tròt, ku konsekuensia ku e outo a drenta mondi.

A reanimá persona ku no tabata reakshoná

Den oranan di anochi riba djadumingu 26 di yanüari, alrededor di 11.45 or di anochi, ‘meldkamer’ sentral a risibí notifikashon tokante un persona ku tabata bentá abou den serkania di un bar na Kaya L.D. Gerharts. Mesora ‘meldkamer’ sentral a pone ambulans na altura, ku na e sitio a eksaminá e hòmber, pero a disidí di no transportá e hòmber pa hòspital. 

Algun ratu despues a drenta un di dos notifikashon tokante e mesun persona debí ku probablemente e no tabata hala rosea. A pone un patruya i ambulans na altura pa bai na e sitio. E patruya ku a yega na e sitio a kuminsá mesora ku reanimashon te na momentu ku ambulans a yega. Na yegada di ambulans a transportá e hòmber pa hòspital.