Notisia di polis di djaluna 13 di yanüari te ku djárason 15 di yanüari 2025
Kralendijk - Detenshonnan pa manehá bou di influensia - Djamars 14 di yanüari, alrededor di 9.30 or di anochi, ‘meldkamer’ sentral a risibí un notifikashon. A meldu ku un shofùr di un pikòp, probablemente fuma, tabata kore riba Kaya Nikiboko Sùit. Durante e yamada ku e persona ku a mèldu, e shofùr di e pikòp menshoná a aksidentá den un otro outo na altura di e rotònde riba Kaya Nikiboko Sùit i Kaya Industria. Durante kòmbersersashon ku e shofùr di e pikòp, por a konstatá ku e tabata mustra vários karakterístika di un persona ku ta bou di influensia di alkohòl. A hasi un tèst di supla kuné di kua a resultá ku el a konsumí mas alkohòl ku ta permití na momentu ku bo ta manehá un vehíkulo. A detené e hòmber di inisial S.U.C.D. di 53 aña di edat i a hib’é warda di polis pa un análisis di rosea. A konsekuensia di e resultado di esaki a konfiská su reibeweis. Esaki ta e di dos biaha ku ta detené e sospechoso pa manehá bou di influensia di alkohòl i ademas a dun’é un but pa manehá sin seguro bálido.
Djamars 14 di yanüari, alrededor di 6.45 or di atardi, ‘meldkamer’ sentral a risibí notifikashon ku un outo a dal den kurá di un sitio di stashoná outo di un establesimentu di hóreka riba Bulevar Gobernador N. Debrot i seguidamente a kore bai. A dirigí un patruya den e direkshon menshoná i a topa ku un vehíkulo na un otro establesimentu di hóreka na Bulevar Gobernador N. Debrot. E vehíkulo aki tabata kuadra ku e deskripshon di e notifikashon. Pa motibu ku na e momentu ei e shofùr a trata di kore bai, e agentenan a dun’é un señal pa para. Na momentu ku e agentenan a bai papia ku e shofùr, nan a ripará ku e tabata mustra vários karakterístika di un persona ku ta bou di influensia di alkohòl. A hasi un tèst di supla kuné di kua a resultá ku el a konsumí mas alkohòl ku ta permití na momentu ku bo ta manehá un vehíkulo. A detené e hòmber di inisial W.J.M. di 62 aña di edat i a hib’é warda di polis pa un análisis di rosea. A konsekuensia di e resultado di esaki a konfiská su reibeweis. Esaki tambe ta e di dos biaha ku ta detené e sospechoso pa manehá bou di influensia di alkohòl.
Aksidente outo i skuter
Djaluna 13 di yanüari, alrededor di 4.55 or di atardi, un aksidente entre un outo i un skuter a tuma lugá riba Kaya Neerlandia. Pa e motibu aki e shofùr di e skuter a resultá heridá i ambulans a transport’é pa hòspital pa tratamentu médiko. Shofùr di e outo a deklará ku e tabata ke sali for di Kaya Maria C. Hellmund-Boom pa subi Kaya Neerlandia. Na e momentu ei el a mira un skuter ku su ‘richtingaanwijzer’ na banda drechi sendé. El a pensa ku e shofùr di e skuter tabata ke lora i drenta Kaya Maria C. Hellmund-Boom i p’esei el a kuminsa kore pa subi Kaya Neerlandia. Sinembargo el a ripará ku e shofùr di e skuter no a lora i un aksidente a tuma lugá. E dokumentunan di ámbos shofùr tabata na òrdu.
Entrada hudisial ku detenshon
Djaluna 13 di yanüari, den oranan di atardi a tene un entrada hudisial na un kas situá na Kaya Mazurka en konekshon ku un investigashon relashoná ku violashon di Lei di Opio BES. Aki a detené un hòmber di inisial K.E.S.T. di 39 aña di edat. Durante di e entrada hudisial a konfiská diferente artíkulonan relevante pa e investigashon. Investigashon den e kaso ta kontinuá.
‘Hit & run’
Ultimo tempu mas i mas kaso di ‘hit & run’ ta tuma lugá. Bo ta enbolbí den un aksidente? Semper keda na e sitio i mèldu e aksidente mesora na polis. Ta kastigabel pa bandoná e sitio di aksidente sin laga bo datonan òf ofresé yudansa.
Si tòg bo a bandoná e sitio di aksidente, bo tin 3 ora pa mèldu bo mes na warda di polis. Si bo no hasi esaki, e víktima por entregá keho pa violashon di artíkulo 31 di e buki di ‘Wegensverkeersverordening Bonaire’. Esaki por kondusí na un investigashon ku por yega na konsekuensianan penal.
Bo ta víktima di un ‘hit & run’? Purba kompilá mas tantu informashon posibel:
- E plachi di number di e vehíkulo
- e tipo di vehíkulo i koló di vehíkulo
- Un deskripshon di e shofùr (si ta posibel).
- Saka potrèt òf video si ta posibel
Bo a mira algu òf bo tin mas informashon tokante un kaso di ‘hit & run’? E ora ei tuma kontakto ku polis via 715 8000, 911 òf via e liña di tep anónimo 9310.
