Number di emergensia: 911 Liña di tep di Polis: 9310

Notisia di polis di djaluna 30 di desèmber 2024 te ku djabièrnè 3 di yanüari 2025

Adaptá pa último biaha riba:

Kralendijk - Terser detenshon den kaso atrako mashin di saka sèn - Djárason, 1 di yanüari, den oranan trempan di mainta, a logra detené e di tres sospechoso den e kaso di atrako na un mashin di saka sèn situá na Kaya Monseigneur Nieuwindt. E atrako aki a tuma lugá den e mardugá di djadumingu 15 di desèmber último. Ta trata di un hòmber di inisial E.A.J. C. di 26 aña di edat. Investigashon den e kaso ta kontinuá.

Detenshon pa manehá bou di influensia

Den oranan di mardugá di 1 di yanüari a detené un dama di inisial V.C.C. di 46 aña di edat pa manehá bou di influensia di alkohòl. Un patruya a para e sospechoso pa kòntròl riba Kaya Internashonal despues ku nan a nota e outo ta kore zeilu riba kaminda. A hasi un tèst di supla ku e sospechoso; en konekshon ku esaki a detené i bai kuné warda di polis pa hasi un análisis di rosea. A konsekuensia di e resultado di esaki a kita e reibeweis di e sospechoso.

Detenshonnan relashoná ku kasonan di atrako resien

Djaluna 30 di desèmber den oranan di anochi e ‘Groep Bijzonder Opdrachten’ (GBO) di Kuerpo Polisial Hulanda Karibense a hasi dos detenshon na Kaya Tintorero na Antriol, relashoná ku e investigashon andando di atrakonan ku a tuma lugá últimamente.

A detené un hòmber di inisial S.J.J.C. di 32 aña di edat en konekshon ku sospecho pa ku kasonan di atrako i un dama di inisial S.I.W.di 18 aña di edat en konekshon ku e no a duna oido na òrdu di polis i a intentá di kore bai. A konfiská un kantidat di droga durante di su detenshon.

Relashoná ku e detenshonnan aki un  entrada hudisial tuma lugá den un kas situá den e bario di Antriol Pariba. Durante di e entrada a konfiská diferente artíkulo ku ta relevante pa e investigashon.

Investigashon den e kaso ta kontinuá.

Aksidente Sabana Piedra Krus

Alrededor di 3 or di atardi di djaluna 30 di desèmber un aksidente ku un bròmer a tuma lugá riba kaminda di Rincon na altura di Sabana Piedra Krus. Shofùr di e bròmer a kai for di e bròmer pa motibu ainda deskonosí. Ambulans a transporte pa hospital pa tratamentu médiko.

Ladronisia for di sitio di sambuyá

Den oranan trempan di atardi di djaluna 30 di desèmber a drenta keho di ladronisia di dos tas di lomba for di e sitio di sambuyá Red Slave Huts situá na Bulevar E.E.G. Deskonosínan a bai ku e tasnan miéntras e doñonan tabata snòrkel. Den e tasnan tabatin entre otro dos telefòn selular, vários tarheta, yabi, sèn kèsh, paña i brelnan di solo. Ta investigando e kaso.

Artíkulonan hañá

Djaluna 30 di desèmber a haña un skuter stashoná kantu di kaminda riba Kaminda Djabou. Probablemente e skuter tabata enbolbí den un aksidente komo ku e tabatin basta daño material. Ta trata di un skuter di marka Kymco, modèl Agility, numerá MF-2344.

E mesun dia a haña un yabi di outo pa un outo di marka Hyundai riba Kaya Korona.

Doño di e artíkulonan hañá aki por mèldu na warda di polis Playa ku un prueba di kompra, un ID bálido i mester kumpli ku e lei- i reglanan pa loke ta konserní uso di vehíkulo.

Kòntròlnan di tráfiko ta kontinuá ku regularidat

Den e dianan tras di lomba a duna vários but pa entre otro manehá sin dokumentunan bálido di seguro, sin reibeweis bálido, pa tene telefòn den man miéntras ta manehá i pa manehá sin faha di seguridat bisti.

Faha di seguridat

Bisti bo faha pa bo mes seguridat. Un faha di seguridat ta protehá okupante di un outo durante di un aksidente. Dor di uza e faha e persona protehá ta keda sinta riba su stul, no tin e posibilidat pa dal su kabes den winshil i no ta keda bentá den e outo p’aki p’aya. Dor di bisti bo faha di seguridat bo chèns di tin un aksidente mortal ta baha ku 30 pa 40%. Tambe patras den outo bo tin 20% ménos chèns di keda herida seriamente ora bo tin bo faha bistí.

Telefòn

Uzando bo telefòn selular miéntras bo ta manehá, bo ta hinka bo mes, pero tambe otronan den peliger. Pasobra ora nos ta uza nos telefòn nos ta ménos alertá.

Pone bo telefòn for di bista. Asina bo ta prevení e tentashon pa wak tòg. Ora bo ta partisipá den tráfiko, sea ta ku outo òf riba baiskel, ta importante pa bo ta konsientemente presente. Si bo tin un persona ku ta ferwagt un mensahe òf yamada di bo, mèldu nan promé ku por ehèmpel bo subi outo, ku bo no ta bai ta alkansabel pa un ratu.

Dokumentonan bálido

KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.

Bo no ta kumpli ku reglanan? Bo por haña un but.

E suma di un but pa e violashonnan menshoná ta varia entre $30 te ku $225.

Disfrutá, pero bebe na midi

Atrobe ta kasi wikènt. KPCN ke avisá pa konsumí alkohòl ku límite si bo ta partisipá den tráfiko. Asina bo ta prevení situashonnan fèrfelu pa bo mes i pa otronan. Ta prohibí pa partisipá den tráfiko si bo a konsumí mas ku e kantidat máksimo permití. Si bo mester bai warda i ta haña un but ta dependé di e resultado di e tèst di supla.

Tèst di supla

Ku un tèst di suplá polis ta kontrolá si bo ta bou di influensia di alkohòl. Bo ta obligá di partisipá na e tèst di supla. E tèst aki ta mustra si bo a bebe mas ku ta permití pa lei. Resultado di e tèst aki ta determiná si bo mester bai warda pa investigashon mas aleu. Bo ta nenga di hasi e tèst? E ora ei bo ta haña un prosèsferbal. Dependiendo di e resultado di e tèst di supla bo mester bai warda di polis pa un análisis di rosea. Durante e investigashon aki polis ta midi presis kuantu alkohòl bo a konsumí ku un aparato spesial.

Bo ta manehá bou d influensia di alkohòl? E ora ei bo ta haña un but, un prohibishon (temporal) pa manehá, un kastigu di prisòn òf un kombinashon di e kastigunan aki. E peso di e kastigu ta dependé di e seriedat di e situashon. Bo ta involukrá den un aksidente? E ora ei standart ta hasi un tèst di supla ku bo konforme e maneho di  ‘botsen is blazen’.

Mi ta kastigabel si mi ta fuma komo peaton?

Esaki ta posibel. Polis por duna un prosèsferbal pa buracheria públiko. Polis a topa bo den estado burachi? E ora ei polis ta uza bo aparensia di buracheria i bo aktitut. E ora ei no ta hasi un tèst di supla.

KPCN ta deseá un i tur un wikènt seif i plasentero!