Notisia di polis di djaluna 6 di yanüari te ku djaluna 13 di yanüari 2025
Kralendijk - Detenshonnan pa manehá bou di influensia - Djadumingu 12 di yanüari, alrededor di 8.40 or di anochi. A detené un hòmber di inisial C.A.M. riba Kaya Grandi pa manehá bou di influensia di alkohòl. E detenshon a tuma lugá despues ku e sospechoso tabata enbolbí den un aksidente entre dos vehíkulo i seguidamente a bandoná e sitio. Despues di un ratu el a regresá na e sitio i tabata mustra vários karakterístika di un persona ku ta bou di influensia di alkohòl. Konforme e maneho ‘botsen is blazen’, a hasi un tèst di supla ku ámbos shofùr di kua a resultá ku e sospechoso a konsumí mas alkohòl ku ta permití na momentu ku bo ta manehá un vehíkulo. Seguidamente a detené i a hib’é warda di polis pa un análisis di rosea. Despues di investigashon mas aleu a resultá ku e sospechoso no ta den poseshon di un reibeweis bálido i el a haña un but pa esaki.

Djasabra 11 di yanüari, alrededor di 5.15 or di atardi, ‘meldkamer’ sentral a risibí notifikashon tokante un aksidente entre un outo i un skuter na e krusada di Hanchi Amboina i Kaya Nikiboko Nort. Konforme e maneho ‘botsen is blazen’, a hasi un tèst di supla ku ámbos shofùr di kua a resultá ku ámbos a konsumí mas alkohòl ku ta permití na momentu ku bo ta manehá un vehíkulo. A detené e shofùr di e outo, un hòmber di inisial F.J.A. di 44 aña di edat pa manehá bou di influensia di alkohòl i el a haña un prohibishon di manehá di 3 ora. A detené tambe e shofùr di e skuter, un dama di inisial V.J.H. di 30 aña di edat pa manehá bou di influensia di alkohòl. Pa motibu ku e sospechoso a resultá heridá, ambulans a transport’é promé pa hòspital pa tratamentu médiko i despues a hib’é warda di polis pa un análisis di rosea. Durante kòntròl a resultá ku e no ta den poseshon di un reibeweis i ku e skuter tampoko no ta sigurá. Pa e motibu aki el a haña un but i a hiba e skuter warda di polis.
Outo a dal den muraya di supermerkado
Djadumingu 12 di yanüari, alrededor di 4 or di atardi, ‘meldkamer’ sentral a risibí notifikashon tokante un insidente na kua un outo a dal den muraya di un supermerkado. Na yegada di polis i ambulans, e shofùr a deklará ku durante ku e tabata stashoná su outo, e no tabata sinti su kurpa bon, i a primi riba tròt i a dal den muraya. El a duna di konosé ku e no ta den poseshon di un reibeweis i e no por a mustra tampoko papelnan di seguro bálido. Pa e motibu aki a hiba e vehíkulo warda di polis te na momentu ku e doño por mustra e dokumentunan korekto. Ambulans a transportá e shofùr pa hòspital pa kòntròl médiko. Durante kòntròl e agentenan a topa ku diferente arma den e vehíkulo, entre otro un machete, un kuchú i un bara di heru. A konfiská e armanan aki.
Tiroteo ku herido
Djasabra 11 di yanüari, alrededor di 10 or di anochi, un tiroteo a tuma lugá den bario di Amboina, di kua dos persona a resultá heridá. Ku outo partikular a hiba e personanan heridá hòspital pa tratamentu médiko.
En konekshon ku e tiroteo, a tene un entrada hudisial djadumingu 12 di yanüari, na un kas situá na Kaya Herman J. Pop. Durante di e entrada hudisial a konfiská diferente artíkulo ku ta relevante pa e investigashon. En konekshon ku e investigashon detené un hòmber di inisial O.O.C. di 21 aña di edat. Investigashon den e kaso ta kontinuá.
Polis ta pidi kualke persona ku por a mira, tende òf sa algu di e insidente, pa tuma kontakto ku polis via 715 8000 òf via di e liña di tep anónimo 9310.
Skuter ta dal patras di outo
Djasabra 11 di yanüari, alrededor di 7.45 or di anochi, ‘meldkamer’ sentral a risibí notifikashon tokante un aksidente entre un skuter i un outo riba Kaya Industria. Na e sitio a resultá ku e skuter a dal patras di e outo. E shofùr di e skuter a resultá heridá i personal di ambulans a dun’é tratamentu médiko na e sitio mes. Konforme e maneho ‘botsen is blazen’, a hasi un tèst di supla ku ámbos shofùr ku un resultado negativo.
Insidente
Djasabra 11 di yanüari, alrededor di 2.15 or di mardugá, ‘meldkamer’ sentral a risibí notifikashon tokante un insidente ku un skuter riba Kaya Leiden. Na e sitio polis a topa ku dos persona ku a kai for di e skuter i a resultá den mondi. Ambos persona tabata heridá i ambulans a transportá nan pa hòspital pa tratamentu médiko. Kousa di e insidente no ta konosí.
Listramentu preventivo
Den oranan di anochi di djaweps 9 di yanüari pa djabièrnè 10 di yanüari, entre 9 or di anochi i 2.15 or di mardugá, a tene kòntròlnan na vários sitio den kuadro di listramentu preventivo. Durante e kòntròl aki a kontrolá tantu persona komo vehíkulo.
Durante e kòntròl aki a topa i konfiská diferente artíkulo prohibí, di kua un kantidat di supstansianan probablemente narkótiko, vürwèrk ilegal, munishon i un kuchú.
Listramentu preventivo ta un instrumento importante den e lucha kontra poseshon di arma i otro ophetonan peligroso. Ku e akshon aki, polis ta enfatisá su kompromiso pa oumentá seguridat di siudadanonan i prevení echonan kastigabel.
Aksidente krusada Kaya Kanari/Kaya Pos di Amor
Djaweps 9 di yanüari, alrededor di 3 or di atardi, ‘meldkamer’ sentral a risibí notifikashon tokante un aksidente entre un pikòp i un skuter na e krusada di Kaya Kanari i Kaya Pos di Amor. Na yegada di polis, personal di ambulans tabata duna tratamentu na e dos personanan ku tabata riba e skuter. Ounke ku ámbos a resultá heridá, no mester a transportá nan pa hòspital. Shofùr di e pikòp a deklará ku e tabata kore riba Kaya Pos di Amor i na e krusada na altura di Kaya Kanari i Kaya Flamingo, un skuter a sigui kore stret sin para i duna preferensia. Ambos shofùr tabatin nan dokumentunan na òrdu.
Ladronisia for di vehíkulo
Djaweps 9 di yanüari a drenta keho di ladronisia for di un pikòp ku tabata stashoná dilanti di un kas na Kaya Mandolin. Entre 12.15 or di mardugá i 7 or di mainta riba e fecha menshoná, deskonosínan a bai ku un generator koló bèrdè di e modèl ‘DuroMax 5500 watt 224CC Elec Start Dual’ for di e baki di pikòp. Ta investigando e kaso.
Detenshon pa violashon di Lei di Opio
Djárason 8 di yanüari, alrededor di 10 or di anochi, a detené un hòmber di inisial R.G.R.S. di 21 aña di edat riba Kaya Kanari pa violashon di Lei di Opio BES. En konekshon ku un notifikashon ku a drenta tokante un situashon sospechoso, un patruya a para tres hóben riba Kaya Kanari. E tres hóbennan aki tabata kuadra ku e deskripshon di e notifikashon ku a drenta.
Durante e kòntròl a bin haña vários saku di plèstik ku ta kontené supstansianan probablemente narkótiko den e tas di e sospechoso. A konfiská e sakunan i a hiba e sospechoso warda di polis.
Ladronisia na bich
Djárason 8 di yanüari a drenta keho di ladronisia na Playa Pal’i Mangel (Donkey’s Beach) situá na E.E.G. Bulevar. Entre 11.30 or i 11.45 or di mainta, deskonosínan a bai ku un ‘cooler bag’ koló kòrá i pretu i un tas di bich koló blou ku strepi blanku miéntras e doñonan tabata snòrkel. Den e tasnan tabatin entre otro dos iPhone, yabi, paña, diferente tarheta, dos brel di solo di marka Sundogs, un ‘verrekijker’ den su estuche di e marka Bushnell, sèn kèsh i bòter di awa. Ta investigando e kaso.
Ladronisia di skuter
Djárason 8 di yanüari a drenta keho di ladronisia di un skuter koló pretu di e modèl NIU, tipo NQi1S, ku plachi di number MF-391. E skuter tabata stashoná ku un lòk di stür dilanti di un kompleho di apartamentu na Kaya Papa Cornes. Entre djamars 7 di yanüari, alrededor di 11 or di anochi i 7.50 or di mainta riba djárason 8 di yanüari, deskonosínan a bai ku e skuter. Djadumingu 12 di yanüari un siudadano a mèldu ku el a topa ku un skuter probablemente hòrtá den mondi na Antriol. Durante kòntròl a resultá ku ta trata di e skuter ku a hasi denunsia di ladronisia di dje. A konfiská e skuter pa investigashon mas aleu.
Djaluna 6 di yanüari a drenta keho di ladronisia di un skuter koló pretu/shinishi di e marka SYM, modèl MIO, ku plachi di number MF-3801. E skuter tabata stashoná ku un lòk di stür dilanti di un kas na Kaya Heerlen. Entre 11 or di anochi riba djadumingu 5 di yanüari i 11 or di mainta riba djaluna 6 di yanüari, deskonosínan a bai ku e skuter.
Ta investigando e kasonan.
Detenshon pa menasa
Djamars 7 di yanüari, alrededor di 7.15 or di anochi, a detené un hòmber di inisial R.G.C. di 24 aña na Bario Mamparia Kutu pa menasa. Ta investigando e kaso.
Aksidente
Djaluna 6 di yanüari, alrededor di 4.25 or di atardi, un aksidente ku un skuter a tuma lugá riba Bulevar Gobernador Nicolaas Debrot. E shofùr di e skuter, ku tabata kore den direkshon nort riba Bulevar Gobernador Nicolaas Debrot, a wanta brek diripiente pa un outo ku a trata na sali for di Kaya P.N. Antonio Neuman pa subi Bulevar Gobernador Nicolaas Debrot. Pa e motibu aki e shofùr di e skuter a pèrdè kòntròl i kai. Komo resultado, e shofùr di e skuter a risibí algun leshon. Personal di ambulans a duna tratamentu na shofùr di e skuter na e sitio mes. Konforme e maneho “botsen-is-blazen”, a hasi un tèst di supla ku ámbos shofùr, ku resultado negativo.
Ladronisia for di kònteiner
Djaluna 6 di yanüari a drenta un keho di ladronisia for di un kònteiner na un sitio di konstrukshon na Kaya Pos di Amor. Entre djadumingu 5 di yanüari, alrededor di 4.30 or di atardi i 8 or di mainta riba djaluna 6 di yanüari, deskonosínan a destruí un kandal pa haña akseso na e kònteiner. A bai ku entre otro shete bentana i un porta for di e kònteiner. Ta investigando e kaso.