Notisia di polis di djárason 15 di yanüari te ku djárason 22 di yanüari 2025
Kralendijk - Detenshonnan pa manehá bou di influensia - Djárason 22 di yanüari, alrededor di 1.40 or di mardugá, a detené un hòmber di inisial T.V.B. di 18 aña di edat riba Kaya Italia pa manehá bou di influensia di alkohòl. E detenshon a tuma lugá despues ku un patruya a para un skuter ku dos persona riba dje pa un kòntròl rutinario. E shofùr por a mustra un reibeweis bálido pero no un prueba di seguro bálido. Pa esaki el a haña un but. Durante di e kòntròl, por a konstatá ku e tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta permití. A detené e sospechoso i a hib’é warda di polis pa un análisis di rosea. A konsekuensia di e resultado di esaki el a haña un prohibishon di manehá di 2 ora.
Djadumingu 19 di yanüari, alrededor di 1:20 di mardugá, un aksidente a tuma lugá entre un outo i un pikòp riba Kaya Grandi. Konforme e maneho di ‘botsen is blazen’, a hasi un tèst di supla ku ámbos shofùr enbolbí, ku e resultado ku un di e shofùrnan a konsumí mas ku e kantidat permití di alkohòl. A detené un hòmber di inisial F.A.M., di 60 aña pa manehá bou di influensia di alkohòl. A konsekuensia di esaki a konfiská su reibeweis.
Djaweps 16 di yanüari, alrededor di 6:35 di anochi, ‘meldkamer’ sentral a risibí notifikashon tokante un aksidente entre dos vehíkulo riba Bulevar E.E.G. Na yegada polis a tuma nota di un outo i un pikòp enbolbí. Shofùr di e outo a kore baha for di kaminda i dal kontra un pikòp i pa despues bai bòltu. E outo a resultá riba santu kantu di laman. E shofùr a mustra vários karakterístika di un persona bou di influensia di alkohòl. Di akuerdo ku e maneho di ‘botsen is blazen’, a hasi un tèst di supla ku e shofùr. Komo resultado esaki a mustra ku el a konsumí mas ku e kantidat permití di alkohòl. A detené un dama di inisial M.A.H. di 36 aña, di edat pa manehá bou di influensia di alkohòl. Dor ku e tabata heridá, a hibá e dama hospital promé pa tratamentu médiko. Despues di esaki a hib’e warda di polis pa hasi un análisis di rosea. A konsekuensia di e resultado di esaki, a konfiská su reibeweis.
Detenshon pa intento di asesinato
Djaluna 20 di yanüari, alrededor di 7:45 di anochi, a detené un hòmber di inisial K.P.T. di 22 aña di edat na Bulevar Gobernador Nicolaas Debrot pa intento di asesinato i maltrato severo. E detenshon a tuma lugá despues ku a drenta informe tokante un vehíkulo ku a dal dos persona. Despues e shofùr a hui na pia for di e sitio. Na yegada, polis a tuma nota di un vehíkulo kontra di muraya di un kas. E víktimanan, kende tabata hopi spanta, tabata skonde den kura di un kas. Personal di ambulans a trata ámbos víktima na e sitio mes. Un ratu despues, un hòmber deskonosí a presentá na e sitio i a deklará ku e ta e shofùr di e vehíkulo enbolbí den e aksidente. Mesora a detené. E kaso ta bou di investigashon.
Persona ku a bai snòrkel a fayesé
Djaluna 20 di yanüari, alrededor di 12:25 di mèrdia, ‘meldkamer’ sentral a risibí notifikashon ku a topa ku un persona deskonosí ta drif den laman. Personanan riba un boto supmarino a saka e víktima femenino for di laman i a hib’é kantu. E personanan riba e boto a kuminsá ku ehersisio pa reanimá e víktima te ora ku ambulans i polis a yega na e sitio. Na yegada, personal di ambulans a tuma e reanimashon ofer, pero sin resultado. Dòkter ku a presentá na e sitio i a deklará morto di e dama di inisial E.K. di 69 aña di edat, nasé dia 16 di ougùstùs 1955 na Alemania.
Aksidente entre outo i motosaikel
Djadumingu 19 di yanüari, alrededor di 2:20 di atardi, un aksidente a tuma lugá entre un outo i un motosaikel na e krusada di Hanchi Amboina i Kaya Nikiboko Nort. Na yegada di polis ya e víktima tabata den ambulans i a hib’e hospital pa tratamentu médiko. Shofùr di e outo a deklará ku el a subi kaminda i no a mira e motosaikel ta biniendo. Komo resultado a keda zeta riba superfisie di kaminda. A pidi asistensia e kuerpo di bombero a plama santu riba e zeta.
A lòs tiru
Den oranan di atardi i anochi di djadumingu 19 di yanüari, ‘meldkamer’ sentral a risibí vários notifikashon tokante habitantenan ku a skucha tiru den bario Nort Saliña i den besindario di santana riba Kaya Maria C. Hellmund-Boom. A drenta tambe informe tokante un kandela den e santana. Brantwer a presentá na e sitio i a paga e kandela.
Den oranan di anochi di djaluna 21 di yanüari a bolbe drenta notifikashon ku a skucha tirunan den e bario di Nort Saliña.
KPCN ta pidi tur persona ku a mira òf tende algu, òf tin informashon relevante pa e investigashon, pa tuma kontakto ku polis na 715-8000 òf via e liña di tep anónimo 9310.
Ladronisia di pikòp i ladronisia di kas
Den oranan di mainta di djasabra 18 di yanüari, ‘meldkamer’ sentral a risibí notifikashon tokante un vehíkulo ku hòrta for di kurá di un kas situá riba Kaya Mandolin. E doño, kende tabata den eksterior e momento ei, a mira riba e imágennan di kámara kon dos hòmber deskonosí a kana drenta den su kura i despues a kue su pikòp blanku di marka Nissan, modelo Navara bai kuné. Tambe e sospechosonan a bai ku pòchi di fèrf di dak for di e den baki di e pikòp. Na yegada na e kas, agentenan a deskubrí ku un kiebro tambe a tuma lugá. E sospechosonan a listra e kas kompletamente. A rekonosé tur dos sospechoso riba e imágennan di e kámara.
Riba e mesun dia a detené ámbos hòmber pa ladronisia i kiebro den kas. A detené e promé sospechoso, un hòmber di inisial E.J.G.A.C. di 47 aña di edat, alrededor di 1.30 or di atardi na Kaya Macario (Cai) Sint Jago. E di dos sospechoso, un hòmber di inisial J.J.M. di 36 aña di edat, a detené alrededor di 8.10 or di anochi na un snek situá na Kaya Avelino J. (Abechi) Cecilia. A konfiská e pikòp hòrta ku tabata stashoná na e snek. Investigashon den e kaso ta andando.
Aksidente Kaya Korona
Djabièrnè 17 di yanüari, alrededor di 1.45 or di atardi, un aksidente a tuma lugá riba Kaya Korona.
E shofùr di outo a resultá herida i a keda pega den e outo. Brantwer a bin na e sitio pa saka e víktima for di e outo, despues di kua ambulans a transporte pa hospital pa tratamentu médiko. E pasahero ku tabata den e outo a deklará ku nan tabata manehando den direkshon nort riba Kaya Korona na momento ku nan a mira un pikòp ta kore bin for di direkshon kontrali riba nan banda di kaminda. E shofùr a purba desviá i a pèrdè kòntròl dor di kua el a pasa dor di matanan na rant di un sitio di stashoná, subi e tereno i a bai dal den un muraya. E outo tabatin bastante daño material na e parti dilanti. Den e outo a bin topa ku bebida alkohóliko i tantu e shofùr komo e pasahero tabata mustra karakterístika di uzo di alkohòl. Komo ku e shofùr mester a bai hospital mesora, no por a hasi un tèst di supla kuné.
Kiebro den kas
Djaweps 16 di yanüari a drenta keho tokante kiebro den un kas situá na Kaya Playa Lechi. Entre djárason 15 di yanüari, alrededor di 6 or di atardi i djaweps 16 di yanüari, alrededor di 8 or di mainta, deskonosínan a kibra e porta di patras di e kas i a bai bai ku un televishon for di den e sala. Ta investigando e kaso.
Detenshon pa maltrato di bestia
Djaweps 16 di yanüari, alrededor di 2.25 or di atardi, a detené un hòmber di inisial R.S.D. di 70 aña di edat pa maltrato di bestia na un kas situá na Kaya Karko. Mas trempan riba e dia a drenta un notifikashon tokante dos persona ku tabatin diskushon tokante un kachó na un kas situá na e adrès menshoná. Durante di e diskushon e sospechoso a spùit un líkido venenoso riba e kachó i a dal e kachó. Ora ku polis a yega na e sitio nan a topa ku un kachó seriamente herida ku un herida habri na su kabes. Mas aleu por a nota ku e bestia tabata yen di karpata i tabata ekstremadamente flaku dor di kua por a wak su repchi i hepnan klaramente. Polis a hiba e kachó klínika di bestia pa tratamentu. Apesar di e esfuerso di e dòkter di bestia, e kachó a fayesé a konsekuensia di su heridanan. A investigá e kaso i manda e dosié pa Ministerio Públiko.
Hit & Run
Djárason 15 di yanüari, alrededor di 11 or di anochi, a drenta un notifikashon tokante un ‘Hit & Run’ ku a tuma lugá den Centrumgebied. Un outo pretu mester a dal tras di otro outo ku velosidat haltu. Komo ku ta trata di un kaminda di un direkshon (éénrichtingsweg) e outo pretu a pusha e outo ku el a dal aden pa asina por a bandoná e sitio di e aksidente. Pasahero di e outo ku a keda na e sitio a resultá herida i personal di ambulans a trat’e na e sitio mes. Despues di investigashon mas aleu a topa ku e outo pretu ku a kousa e aksidente na un kas situá na Kaya Korona. E shofùr a deklará ku e no a para komo ku e tabata den shòk i dor di spantu a kore bai kas. Investigashon den e kaso ta andando.
Ladronisia na bich
Djárason 15 di yanüari a drenta keho di ladronisia na ‘Te Amo Beach’ situá na Kaya Internashonal. Entre 3.10 i 3.40 or di atardi, deskonosínan a bai ku un tas kolo blanku ku kosnan di balor komo kontenido, miéntras e doñonan tabata snòrkel. Den e tas tabatin entre otro un Brel di solo di marka Oakley i un di marka Serengety, sèrbètè, paña, un ‘powerbank’, un GoPro Hero 5 i yabinan di outo. Ta investigando e kaso.
Djárason 15 di yanüari a drenta keho di ladronisia na Playa Pal’i Mangel (Donkey’s Beach) situá na Bulevar E.E.G. Alrededor 1.30 or deskonosínan a bai ku un tas ku kontenido kolo hel, bèrdè i ros di marka Rituals, miéntras e doñonan tabata landa. De e tas tabatin entre otro yabi di outo i sèrbètè. Ta investigando e kaso.
